بسم الله نبدأ بقى في الـProgramming وندخل شوية في أساسيات الـComputer Science، في السلسلة دي هنتكلم عن الخوارزميات، هياكل البيانات، رياضيات وحبة فيزياء كدة على جمب، ومتخافش بإذن الله الموضوع سهل وبسيط
كنت قاعد محتار الحقيقة هل نشتغل بـPesudo Code ونبقى نخش بعدين على الـJavaScript؟ ولا نتعلم JavaScript الأول وبعدين نتكلم عن علوم الكمبيوتر؟ وفي الحقيقة لقيت الحل الأفضل هو اننا نشرح الاتنين مع بعض، عارف ان الـJavaScript مش أنسب لغة نتعلم بيها Computer Science ولكن إحنا هنحتاج منها حاجات بسيطة عشان نقدر بس نطبق على اللي بنتعلمه
ومالقيتش حاجة نبدأ بيها أفضل من الرياضيات! هتقولي إزاي يا عم الحاج؟ خليني أشرحلك
في عالم البرمجة “كبرمجة فقط” انت مش هتحتاج تبقى عالم رياضيات، محتاج منك بس تعرف الجمع والطرح والضرب والقسمة، تفهم يعني إيه معادلة ويعني إيه دالة، تعرف يعني إيه منحنيات ومستوى الإحداثيات، تفهم يعني إيه قوى (أسس) ولوغارتميات، دي خلينا نقول الـBasics اللي محتاج تعرفها طالما هتشتغل في البرمجة
مش محتاج تبقى تنين في التفاضل ولا تشرب الديناميكا شرب، في تخصصات أه الرياضيات جزء لا يتجزء منها ولكن إحنا مش هنتكلم عنهم دلوقتي (زي الـAI, ML, Gaming Development لو حبيت تبحث مع نفسك)، فـ خلينا نبدأ أول حاجة بالمعاملات الرياضية الأساسية جدًا، (الجمع – الطرح – الضرب)
في البداية الأعداد بتنقسم لأنواع كتير، في أعداد العد، زي 1 2 3، الأعداد اللي تقدر تعدها (بديهيات)، وفي الأعداد الطبيعية، وهي ببساطة كل أعداد العد ولكن زودلهم الصفر، ليه الصفر مش من أعداد العد؟ لأنك ماتقدرش تعد الصفر.
طيب يبقى لحد دلوقتي أقل رقم عندنا الصفر، في أقل منه؟
الإجابة بإختصار أه، وهنا نبدأ نتكلم عن مجموعة الأعداد الصحيحة، ودي فيها كل أعداد العد بس بنسميها مجموعة الأعداد الصحيحة الموجبة
وفيها كل أعداد العد بس بالسالب، ودي بنسميها الأعداد الصحيحة السالبة، وفيها الصفر ده لوحده على باب الله مالوش في السكة
كلمة سالب وموجب بتعبر عن موقع العدد بالنسبة للصفر على خط الأعداد، الأرقام السالبة كلها هي أرقام بتقع قبل الصفر على خط الأعداد، فـ هي أرقام أقل منه، والأرقام الموجبة هي أرقام بتقع بعد الصفر على خط الأعداد
كل اللي بنتكلم فيه احنا لحد دلوقتي مفيهوش كسور اطلاقًا، وده اللي بنسميه Integers أو أعداد صحيحة، تمام؟ باقي الأعداد بإذن الله هنتكلم عليها في الجزء التاني (الأعداد العشرية – الأعداد الحقيقية – الأعداد التخيلية)
الأعداد كلها ممكن نطبق عليها المعاملات الرياضية المختلفة، وخلينا نبدأ نتكلم عن الجمع
الجمع (+) هو عملية إضافة، بتضيف رقم على رقم والناتج هو مجموعهم، يعني لو بتضيف 1 على 1 يبقى حاصل مجموعهم هو 2، لأنك ضيفت الواحد على الواحد فـ النتيجة كانت 2 في النهاية
ومن التعريف ده نقدر نستنتج إن عملية الجمع هي عملية إبدالية بالكامل، بمعنى لو بتجمع 1 و2 و3 على بعض، فـ مش هتفرق إذا جمعت 2 و3 الأول ولا 1 و2 الأول، لأن في النهاية النتيجة هي مجموع إضافتهم على بعض، وفي كل الحالات النتيجة هتبقى 5
الطرح (-) بقى عكس عملية الجمع بالظبط، إنت بتنقص من الرقم الأول الرقم التاني، يعني لو قولنا ان الرقم الأول هو 5، والرقم التاني هو 2، فـ حاصل عملية الطرح في النهاية هو المقدار المتبقى من الرقم الأول بعد إزالة الرقم التاني، يعني 3.
ومن التعريف ده نستنتج إن عملية الطرح عملية غير إبدالية، لأن إزالة 2 من 5 بالتأكيد مش بتساوي إزالة الـ5 من الـ2، ببساطة -3 مش بتساوي 3، ده عدد صحيح موجب وده عدد صحيح سالب
الضرب (*) من العمليات المهمة جدًا، وفهمك ليها بشكل صحيح هيساعدك على فهم أغلب العمليات اللي هنتكلم عنها بعدين، ببساطة الضرب هو عملية تكرار عدد معين وليكن X بعدد مرات معين وليكن Y
يعني لو عندك رقم 3 مثلًا، وعاوز تعمل عملية الضرب بينه وبين رقم 5 على سبيل المثال، فـ هنا انت هتكرر رقم 3 بعدد 5 مرات، فـ النتيجة هتبقى 3+3+3+3+3 = 15، أو تكرر رقم 5 نفسه بعدد 3 مرات، فـ النتيجة هتبقى 5+5+5 = 15، خدت بالك؟ أه عملية الضرب برضه عملية إبدالية.
بالنسبة لعملية القسمة فـ خلينا نتكلم عنها البوست اللي جاي أفضل، لأنها محتاجة شرح أطول الحقيقة والبوست النهاردة طويل بما فيه الكفاية 😂، لو مهتم باللي بقدمه ممكن تعمل متابعة عشان مايفوتكش أي محتوى بنزله، وبس كدة.
كالعادة، ده الموضوع ببساطة
الجينيص
الجينيص