النهاردة بإذن الله أكلمك عن الـVariables! في البوست اللي فات من ييجي اسبوعين كدة اتعرفنا على حبة أنواع للـData، زي الـNumber والـBoolean والـString، ولكن دلوقتي إحنا محتاجين نتعلم إزاي نخزن الـData دي في متغير عندنا بحيث نقدر نعمل عليه عمليات براحتنا
أولًا يعني إيه كلمة متغير أو Variable؟ متغير يعني قيمة مش ثابتة، هي قيمة عرضة لإنها تتغير، ببساطة قيمة الفلوس اللي معاك هل هي ثابتة؟ سنك ثابت؟ وهكذا، كل دي قيَّم متغيرة، يعني عُرضة للتغيير
طيب دلوقتي أنا حبيت أعبر عن السن مثلًا في متغير في الـJavaScript، هنا بنقوم بعمليتين مهمين جدًا، الـDeclaration والـAssignment، بالعربي عملية التعريف والإسناد، مش فاهم حاجة؟ إستنى معايا وماتقلقش مش هتطلع من البوست ده غير وانت فاهم بإذن الله
بص كدة ع الكود تحت، بنستخدم var وبعدها إسم المتغير اللي احنا عاوزينه، يعني على سبيل المثال
var age;
هنا بنقول للـJavaScript عندنا متغير إسمه age، مجرد عرفنا الـJS إن كلمة age دي هي متغير موجود عندي وهستخدمه، وده اللي إسمه التعريف أو الـDeclaration، وبعد كدة نقدر نعمل اللي إحنا عاوزينه مع المتغير ده، نسندله قيمة، نستدعيه، نطبعه، براحتنا خالص 😄
المرحلة التانية بقى وهي الـAssignment، إسناد قيمة للمتغير ده، زي كدة مثلًا
age = 19;
بمجرد ما تعمل Declare للـVariable بدون ما تسندله قيمة، هنا القيمة الإفتراضية بتاعته هي الـundefined، ودي معناها غير مُعَرَف، لسة المتغير ده مالوش قيمة معروفة
وبما إن الـJavaScript من اللغات الـDynamic Typing، فـ بمجرد إسناد قيمة للمتغير هي بتحدد النوع بتاعه لوحدها، يعني لما تسندله number فـ اوتوماتيك النوع بتاعه هيبقى number، تسندله string نوعه هيبقى string وهكذا، وبدون إسناد أي قيمة النوع الإفتراضي هو الـundefined
طيب من الحاجات المهمة برضه اللي لازم تعرفها، هي إنك مش لازم تعرف الـVariable الأول، وبعدين تسندله قيمة، إنت ممكن تعمل Initiate للـVariable بقيمة جاهزة! إزاي؟ زي اللي احنا كاتبينه تحت بالظبط، وهي إنك تعمل Declaration وAssignment في نفس السطر! إزاي الكلام ده؟
var age = 19;
هنا الجزء الأولاني هو عملية الـDeclaration، والجزء التاني عملية الـAssignment، وفي النهاية طلعلنا Variable بقيمة مبدأية، اللي هي في المثال هنا 19.
طبعًا بعد ما عرَّفنا الـVariable، نقدر بقى نعمل فيه كل العمليات اللي احنا عاوزينها، زي إننا نستخدم الـtype of Operator عشان نتعرف على النوع بتاعه، ولو واخد بالك من الكود تحت، فـ أيوة إحنا ممكن نعمل console.log لكذا قيمة مع بعض في نفس السطر، دي معلومة Bonus دي 😉
وبس كدة، ده كان الموضوع ببساطة ❤.
الجينيص
الجينيص