أكياس العين الدهنية =الأكياس الدهنية فى جفون العين مشكلة من

أكياس العين الدهنية 👁
=الأكياس الدهنية فى جفون العين مشكلة منتشرة عند ناس كتير من مختلف الأعمار, تقريبا محدش مننا مشافش حد موجودة عنده المشكلة دى 🤷‍♂️, أو حتى تكون حصلتله هو شخصياً.
🔴 طيب هى الأكياس الدهنية دى بتحصل ليه⁉️
علشان نرد على السؤال ده لازم الأول نكون فاهمين إن جفون العينين فيها خلايا متخصصة فى إفراز الدهون ….الخلايا الدهنية دى طول الوقت بتفرز كميات من الدهون بتعمل طبقة رقيقة جدا على سطح العين علشان العين ميحصلهاش جفاف , وكمان علشان حركة العين تبقى سهلة, وحركة الجفون عليها كمان تبقى سهلة, ببساطة العين بتزيت.
🔴طبعاً الخلايا الدهنية دى لها فتحات بتخرج منها إفرازاتها الدهنية دى لسطح العين, ولازم الفتحات دى تفضل طول الوقت مفتوحة علشان الإفراز الدهني ده ميتراكمش جوه الخلايا الدهنية نفسها.
🔴لو حصل إن الفتحة اللى بتخرج الإفرازات دي إتسدت, الدهون هتتراكم جوه الخلية الدهنية وتخليها تنتفخ وتورم, وهو ده ببساطة الكيس الدهنى اللى بيطلع فى جفن العين. 👁
🔴 أسباب الحالة متلخصة فى العامل الوراثى, فيه عائلات بتلاقيها شائعة عندهم 👨‍👩‍👧‍👦, لكن طبعا ممكن برضه تحصل من غير عامل وراثى ولا حاجة, كمان بعض الناس بالطبيعة الشخصية بيكون إفراز الخلايا الدهنية عندهم سميك عن الطبيعى فبيشجع ظهور الأكياس الدهنية.
🔴الأكياس الدهنية لما بتحصل بتسبب الأعراض دى ..👨‍🏫..
👈 فى البداية جفن العين يحمر ويلتهب ويتورم.
👈 الشخص يبقى حساس للضوء الساطع, مش عارف يفتح عينه فى النور بشكل طبيعى.
👈 بعد كده تظهر كتلة بارزة فى الجفن شبه الدمل اللى بيظهر فى الجلد.
👈 بعدين الكيس طلع وبقى موجود, يحصل فيه حاجة من تلاتة ..
🔸️ يكبر فى الحجم لفترة, وبعد شوية يصغر تانى ويختفى.
🔸️ يوصل لحجم ثابت ويفضل كده موجود وخلاص.
🔸️ يحصل فيه عدوى بكتيرية فيلتهب ويسبب مضاعفات.
🔴 طيب يعنى اللى ظهر عنده كيس دهنى فى الجفن ده يعمل إيه⁉️
طبعا مبدأيا لازم يستشير طبيب 👨‍⚕️, والطبيب بنفسه يأكدله إن ده كيس دهنى ويفهمه إيه اللى مفروض يتعمل.
بالإضافة لده ولغاية ما يروح للطبيب, يعمل على الجفن ده كمادات مية دافية لمدة تلت ساعة اربع خمس مرات يوميا, مع تدليك خفيف للجفن, ميعملش أكتر من كده, لا أدوية ولا وصفات شعبية ولا حاجة أبدا, هى الكمادات الدافية وبس.
تتمة البوست غداً ان شاء الله ♥️

د. خالد طلبة الشبراوي

(سماعة حكيم)