أنا مغرم جداً بكل الدعوات … دعوات الأمهات و الأخوات و الجدات

أنا مغرم جداً بكل الدعوات … دعوات الأمهات و الأخوات و الجدات و الجارات و الحبيبات و كل أنواع الدعوات …
بيظل في دعوة بتسحرني كلياً و بحس حالي إني ما بفهمها متل كأني عّم اقرا شعر .. بحبها بدون ما افهما و من زمان كتير و هي

” روح … الله يهدّي سرّك …”

و قبل ما افكر ادور ع اصل الجملة و ينتهي سحري فيها و منها ، اليوم حاولت اكتب شو فهمت من هالدعوة العظيمة … من هالمقطع الشعري العذب
طلع معي المرادفات التالية :

… روح … الله يطمن بالك
… روح … الله يهدّي قلبك و أفكارك
… روح … الله يطمنك على ما تعرفه و على ما لا تعرفه من هموم
… روح … الله يعطيك القدرة على توقيف رياح القلق جواتك
… روح … الله يهدي أمواج خوفك لتقدر تشكف السبب الحقيقي لقلقك
… روح … الله يخفف عليك كثرة أسئلتك
… روح … الله يحميك منك
… روح … الله يخلي سرك هادي مثل نبع عذب
…روح … الله يفتح بوابة عينك ع غرف قلبك ع جنينة روحك و ما يظل شي مخبى ع شي
… روح … الله يهدي سرك حتى تبطل تكون مشغول فيه و تنشغل ب الحياة اللي برا
…

” اللي عندو شرح مفردات للدعوة الشعرية .. يا ربت يمتّعنا و يسمعنا

روحو .. ربي يهدي سركم جميعاً

د. رفيف المهنا
صباحكن رواق ❤️

(سماعة حكيم)