رحت لعندو وسألتو شو الشي الجديد يلي صار فجأة لحتى صار يضرب الانفرتر قلي مافي شي جديد غير بس ركبنا من كم يوم طاقة شمسية للمي السخنة وبنفس اليوم ضرب الانفرتر واتصلنا بكهربجي واجى شافو وقال الانفرتر مضروب بدو صيانة وفعلا فكو واخدو عالصيانة وهو عم يركبو بس شغلو رجع انضرب .!
رجع فكو واخدو عالصيانة وصلحو وجابو ركبو بعد ساعتين انضرب الانفرتر
قلي هلئ بدي تشوف ليش عم يضرب الانفرتر قبل مانصلحو ويرجع يضرب دغري
بالبداية شكيت يكون في مشكلة بخط النتر إذا كان مشترك وشيكت عالخطوط بحيث يكون كل خط بمكانة وكلو تمام وبعدها
بلشت بدارة الطاقة الشمسية تبع المي السخنة ولاحظت إنهم واصلينها على خط الانفرتر ويلي عم يصير وقت يشتغل سخان الطاقة بيضرب الانفرتر إذا مقطوعة الكهربا لانو إذا جاية الكهربا بكون الانفرتر بحالة باي باس
فصلت الدارة من خط الانفرتر واخدتو عالصيانة ورجعت ركبتو وطفينا الكهربا الرئيسية وشغلنا كل البيت عالانفرتر متل قبل وبدون أيا مشاكل بفضل الله…
النتيجة السخان كان يضرب الانفرتر وقت يشتغل
والزلمة مضطر يوصل دارة الطاقة الشمسية عالانفرتر مشان يعبيها إذا مقطوعة الكهربا ومافيها مي
الحل وصل دارة الطاقة عالانفرتر ومخرج السخان بروح على ريلية أو كونتكتور وتغذية السخان بتكون حصرا آخد من الشبكة بحيث إذا دارة الطاقة عطت أمر للريلي واشتغل السخان تغذيتو حصرا من عالشبكة …
الفكرة أكيد كتير ناس بتشتغلها بس كمان في ناس بتمرق عليهم وبيوقعو بمشاكل متل يلي صار بالقصة
في ناس بتوصل سخان الطاقة على قاطع مباشر وهاد غلط كبير لانو طاقة المي بعكس الأسطوانة يلي بتكون عالسقيفة أو القاظان يلي بالحمام
الأسطوانة والقاظان لو فضي خزان البيت من المي بضل فيهم مي لحماية السخان يلي بكون فيهم بس سخان الطاقة محمي إلكترونيا من الحساسات يلي بكونو بالسيليكون يلي داخل إسطوانة الطاقة ليتحكمو بحرارة المي ومستواها
إذا المي باردة الحساسات بتعطي أمر للسخان ليشتغل ويتوقف على حسب حرارة المي يلي مضبوطة على لوحة الطاقة وإذا مستوى المي تحت مستوى السخان بالاسطوانة الحساسات ما بتعطي أمر ليشتغل السخان وحتى لو عطيت أمر للسخان ليشتغل يدويا مابيشتغل أبدا ولهيك غلط توصل سخان الطاقة على قاطع مباشر لانو إذا فضيت الأسطوانة من المي رح يضل شغال السخان ويحترق ….
والأفضل وصل السخان على قاطع تفاضلي مجوز لوحدة مع العلم بدارة الطاقة يوجد بها برمجياً تفاضلي فإذا أصبح مشكلة في السخان وتسريب كهربا رح يفصل السخان من اللوحة بشكل أوتوماتيكي ولكن وقت نتحكم بالسخان من الشبكة عبر ريلية لن تتحسس دارة الطاقة ولهيك ضروري يركب تفاضلي مستقل على خط السخان من الشبكة لحماية الإنسان …
الصورة عندي بالبيت
الله يفتح عليك يا أبا عدنان
بالفعل ابن مصلحة متعلم على الأصول
وأنا أشهد
والله يجبر بخاطر يلي علمكم المصلحة ويكتب له طولة العمر بطاعة رب العالمين…
#المعلم الفهمان بأي مصلحة بريحك من كثير مصاريف…
الله يرزقك الرزق الحلال الطيب المبارك
الله يعطيك العافية كلام صحيح،بس بالنسبة للسخان انا واصلو عالقاطع بس مابشغلو حتى عبي مي