إذا دمّاتـك حلويـن فهالبـوسـت الـك… 😌
🔘 السكري يلي هو ارتفاع نسبة السكر بالدم يعتبر من الأمراض الشائعة بمجتمعنا و متل ما الو تأثير عل كامل الجسم سواء كان من النمط الاول او التاني منلاقي انو الو تأثير كمان على الاسنان واللثة ومجمل الحفرة الفموية…
🔘 طيب شو هنن هالتأثيرات و كيف منقدر نتجنبا لنحافظ عصحتنا الفموية بأفضل حالاتها!؟
🔰 الآثار يلي لازم ندير بالنا منها :
✳️ قابلية عالية لتطور النخور السنية يلي سببها اللويحة السنية الناتجة عن تفاعل البكتريا الموجودة بالفم مع السكريات يلي بتكون ببقايا الطعام المتراكمة بالفم؛ وبحالة داء السكري منلاحظ انو هي السكريات بتزداد و هاد بأهب للنخور بشكل أكبر….
✳️ التهابات اللثة المبكرة يلي بتتظاهر عشكل ◀️ احمرار لثة ونزف وممكن تطور معنا لمشاكل اكبر هيي التهابات النسج الداعمة (بتصيب النسج الرخوة والعظم المرتبط بالأسنان)…
✳️ فطريات الفم او القلاع ممكن نشوفوا ◀️ عشكل بقع بيضاء او حمراء مؤلمة داخل الفم….
✳️ جفاف الفم ◀️ نقص افراز اللعاب وهو اكثر اعراض السكري شيوعاً…
و يلي يعتبر من المؤهبات الشديدة لحدوث النخور و التهابات اللثة…
🔰 وهلق منجي للعادات الصحية يلي لازم تكون صديقتنا الدائمة و وسيلتنا بالحماية :
✴️ كمريض سكري لازم حط ببالي انو مفتاح حمايتي من كل هالاعراض هو يكون عندي السكري مضبوط دائماً و ذلك بالمراقبة المستمرة و اتباع تعليمات الطبيب…
✴️ تفريش الأسنان على الأقل مرتين و بشكل مثالي بعد كل وجبة…
–> وتكون فرشاة الاسنان ذات شعيرات ناعمة مع معجون الاسنان الحاوي على الفلورايد…
✴️ التنظيف بالخيط السني على الأقل مرة باليوم
✴️ حاول تكون زيارتي لطبيب الاسنان بشكل دوري واتأكد انو عنده علم بالسكري يلي معي و ضل عتواصل معو أول بأول مع أي تغيير بشعر فيه بالفم…
✴️ التدخين ابتعد عنو بشكل مطلق ❌
بالنهاية السكري مرض بيتطلب منا نكون صبورين و يكون عنا الوعي والعلم الكافي بكل يلي عم يصير بجسمنا و الميددوز هون دائماً معكن لتساعد بهاد الشي ❤️
● إعداد وتحرير: د. مي المير تامر.
● المصدر العلمي : https://www.mayoclinic.org/diseases-conditions/diabetes/in-depth/diabetes/art-20043848
مـنظمة ميـددوز ~ مـصدرك الـموثـوق للـمعلومـة الطبيـة 🛡
مواضيع صحة الاسنان والفم