“لا تعالج السن اللبني رح يوقع ويطلع غيرو !! ”
“ليش السن اللبني الو عصب !!!”
وكتييييير كتيييير من الجمل يلي بتتكرر بشكل شبه يومي عنا 💔
أول شي بدنا نحكي فيه أنو السن المؤقت متل السن الدائم بالضبط بيتكون من تاج و جذر
التاج بيحتوي تلت طبقات : ميناء .. عاج .. لب ( عصب)
(( الاختلاف بس انو سماكة الميناء والعاج بتكون بالسن المؤقت أقل من الدائم))
وهاد الشي يلي بخلي النخر ينتشر بالسن المؤقت أسرع من الدائم و بوصل للب ( العصب )
وهون نحن منكون أمام احتمالين :
١- بعاني الطفل من ألم شديد كتير مابيهدأ الا عالمسكنات و ممكن ببعض الأحيان حتى عالمسكنات ما يستجيب.
٢-اللب (العصب) يتموت ببطء وهون الطفل مابيشعر بأي ألم أو اعراض تانية . بس فجأة بفيق من النوم بهاد المنظر يلي بسموه “خراج” .. وبعاني الطفل من انتفاخ بالوجه مع حرارة..
وهاد يلي صار مع طفلنا يلي عمرو ٣ سنين ونصف.
لحتى نتفادى هالشي لازم :
١- نحرص على الزيارات الدورية لطبيب أسنان الأطفال كل ٦ أشهر.
٢- نعالج أي نخر بيكتشفه الطبيب بمراحله البدئية .
وتضلو بخير
د.إيناس الحلاق
ماجستير بطب أسنان الأطفال
(سماعة حكيم)
…