اضطرابات المفصل الفكّي الصّدغي

🚩 اضطرابات المفصل الفكّي الصّدغي…

فتحت تمّك سمعت طقّة❗
أو إجيت تسكّره سمعت فرقعة❗
أنت و عم تتاوب أخدت راحتك زيادة و فتحت تمّك بكل ما عندك من عزم و ما عاد سكّر معك ❗

شو مصدر هالصوت و شو المضاعفات الجّانبية للمشكلة اللي موجودة عنا بهيك حالة؟
هاد اللي رح نتعرّف عليه سوا بهالبوست….

⛔ بدايةً شو هو المفصل الفكّي الصّدغي ( TMJ ) ؟

⚠️ هو مفصل بيربط الفك بالعظام الصّدغية للجمجمة اللي بتتوضّع أمام كل أذن ; بيسمح بتحريك الفك للأعلى و الأسفل و من جانب للتاني لنتمكن من التحدّث و المضغ و التثاؤب ….

⛔ اضطرابات المفصل الفكّي الصّدغي أو ما يُعرف ب ( TMD ) :

⚠️ هي المشاكل اللي بتصيب الفك و عضلات الوجه و بتأثر على المفصل الفكّي .

⛔أسباب الاضطرابات في المفصل الفكّي :

⚠️ ما في سبب واضح لحد الآن ؛؛ لكن الكتير من أطباء الأسنان بيعتقدوا أنه الأعراض بتنشأ من مشاكل في عضلات الفك أو مشاكل بمكوّنات المفصل بحد ذاته .

⚠️ إصابة بالفك أو المفصل أو إصابة بعضلات الرأس أو العنق (متل ضربة قوية بإحدى هالأماكن ) .

⚠️ صرير الأسنان و اللي بسبّب تطبيق جهد كبير على المفصل .

⚠️ حركة في القرص المفصلي

⚠️ التهاب في المفصل .

⚠️ التوتّر ( الإجهاد ) اللي ممكن يتسبّب بشدّ عضلات الوجه و الفك أو الكزّ على الأسنان .

⛔ الأعراض اللي بتتظاهر عنّا في حال الإصابة بهالاضطرابات هي :

⚠️ ألم في الوجه و منطقة المفصل الفكّي الصّدغي و الرّقبة و الكتفين و داخل الأذن أو حولها عند المضغ أو التحدّث أو فتح الفم بشكل كبير .

⚠️ انغلاق أو انخلاع المفصل عند محاولة إغلاق أو فتح الفم .

⚠️ صوت طقطقة أو فرقعة عند فتح أو إغلاق الفم أو أثناء المضغ .

⚠️ شعور بعدم الراحة في منطقة الوجه .

⚠️ مشكلة بعمليّة المضغ أو حدوث عضّة غير مُريحة مُفاجِئة ( الشعور بأنّ الأسنان العلويّة و السفليّة لا تتلاءم معاً بشكل صحيح ) .

⚠️ تورّم في جانب الوجه .

⚠️ ألم بالأسنان .

⚠️ صداع .

⚠️ آلام بالرّقبة .

⚠️ دوخة .

⚠️ مشاكل في السّمع .

⚠️ آلام أعلى الكتف .

⚠️ طنين في الأذن .

⛔ كيف بتتشخّص هالاضطرابات؟

⚠️ ممكن بعض الحالات المَرضيّة متل مشاكل الجيوب الأنفيّة أو التهاب المفاصل أو أمراض اللّثة أو حتى النّخور السنيّة تسبّب أعراض مشابهة لأعراض اضطرابات المفصل الفكّي لذلك تشخيصها بشكل دقيق بيتطلب قصّة مرضيّة كاملة و فحص فيزيائي للمفصل بقوم فيه الطبيب .

⛔ أمّا عن العلاج :

⚠️ الأدوية : بيوصفها الطبيب مضادات التهاب غير ستيروئيدية بجرعات عالية في حال وجود ألم و تورّم بالإضافة للأدوية المرخّية للعضلات أو مضادات القلق لتخفيف التّوتر .

⚠️ الجَبيرة أو الواقي اللّيلي لفصل الأسنان العلويّة عن السّفلية و بالتالي التقليل من الصّرير و تصحيح العضّة .

⚠️ التّعويض عن الأسنان المفقودة ( تيجان جسور …).

⚠️ التّحفيز الكهربائي للأعصاب .

⚠️ الأمواج فوق الصّوتية ( الحرارة العميقة المُطبّقة تؤدّي إلى تخفيف الألم أو تحسين الحركة ) .

⚠️ حقن مسكّنات الألم أو التّخدير في عضلات الوجه .

⚠️ تقنيّة غَسل ( بزل ) المفصل الفكّي الصدغي .

⚠️ الجراحة ( في حال ما نفعت العلاجات السّابقة ) .

⛔ لذلك لما تمضع طعامك أنت و مستمتع فيه أو تتاوب وتاخُد راحتك لا تنسى أنه في مفصل إله عليك حق تداريه و تحميه من الانخلاعات و الاضطرابات اللي بتسبّب مشاكل ما بتقتصر على المفصل فقط متل ما شفنا…

تبقوا بخير أنتوا و مفاصلكُن الصّدغيّة😁❤

● إعداد و تحرير : د. سارة جوني .
● التدقيق العلمي : د. علي سقر .

● المصدر العلمي : https://wb.md/3dDu0yi

🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.

مواضيع صحة الاسنان والفم