الآنــــــســــة تــــعـــبــانـة : الآنسة تعبانة عمرها 25

الآنــــــســــة تــــعـــبــانـة :
الآنسة تعبانة عمرها 25 سنة .. بتحط راسها ع المخدة لتنام بتضل ساعتين تحاول تنام و تفكر بهموم الدنيا و تحس في تقل برجلها ولازم تحركها لتنام (رجلها مو مرتاحة )
وتفيق الصبح كتير تعبانة ما الها خلق تعمل شي و تضل تقول للناس جسمي مكسر و فعلاً معظم عضلات جسمها ومفاصلها توجعها
و عطول تشكي من صداع بكل الأوقات .. و إذا انجاب سيرة الكولون العصبي أول وحدة تشكي منو وتقول يا ريت لاقيلو حل
وطبعاً كل دورة شهرية تضطر تاخد مسكنات لتخفف الألم
الآنسة تعبانة ما عم تستمتع بشي بالحياة و احياناً تبكي بلا سبب
.
طبعاً كتار من القراء هلأ فتحو ادنهن وعم يقولو هي أنا >> رح يصير هيك لأنو الحالة شائعة بتصيب حوالي 4% من مجمل الشعب ومعظمهن إناث
.
شــــــو هالحالة ؟؟
هالحالة اسمها متلازمة الألم الليفي العضلي Fibromyalgia الحالة منتشرة و شائعة و مزمنة لازم تستمر ع الأقل 3 اشهر لنشخصها أما أعراضها فهي متنوعة وكتيرة
1- الآلم عضلية متعددة
2- اكتئاب
3- كولون عصبي
4- متلازمة القدم غير المرتاحة
5- صداع توتري او شقيقة
6- اضراب بالمثانة (مثانة عصبية )
7-اضراب بالنوم
8- ألم بالدورية الشهرية
وطبعاً في أعراض أكتر لا مجال لذكرها
كــــيــــف تـــتـــشخـــص ؟؟
صراحة ما في فحص مشخص للحالة ولازم نعتمد عدة معايير مع بعض للتشخيص رح نذكرهن بشكل مختصر
1- آلام واسعة منتشرة بالعضلات والمفاصل وطبعاً في مشعر معين لقياس النقاط الألمية
2- الأعراض مستمر بنفس الشدة على الأقل 3 أشهر
3- ما في مرض تاني يفسر الحالة متل قصور درق أو شي مرض رثوي لهيك حالتنا تتشخص باستبعاد الأمراض المحتملة
الـــعـــلاج :
العلاج يتناول محورين
الأول المحور اللادوائي >> هو نثقف المريضة عن حالتها – نحطلها برنامج للرياضة كونو مفيدة جداً بهالحالة – و ننصحها تمارس الرياضات اللي بتخفف التوتر متل اليوغا
الثاني هو المحور الدوائي>>> مسكنات الألم غير الستيريوئيدية حصرا وما نوصف الافيونية مهما كان شدة الألم لأنو الحالة مزمنة ممكن تسبب إدمان للمريضة
و الصنف التاني هو مضادات الاكتئاب ثلاثية الحلقة أو مثبطات إعادة قبط السيرتونين بتفيد كتير بحالتنا
دمتم سالمين 🙂

د. خالد جمعة

(سماعة حكيم)