ميددوز .. الألم الرجيع
فليباغ عم تعاني من الم باسنانها و راحت لعند اكتر من طبيب اسنان و عم يخبروها انه اسنانها سليمة و هي راجعة بالميترو كانت عم تفكر بكلام طبيب الاسنان اخصائي الم الوجه و الفكين بالأسباب الممكنة لألم الاسنان غير الاسنان نفسها…
🔴لما يكون الألم السني غير سني بالحقيقة…
الألم الرجيع
أحياناً بيكون في ألم بالأسنان بس الأسنان ما دخلها و بريئة تماماً و ممكن المتهم يكون العضلات او الأعصاب او أي عضو تاني بالجسم بس مو الأسنان الحبابة…
بهي الحالة المهم نعرف سبب الألم قبل أي اجراء ممكن نعمله، فتحديد سبب الألم بدقة هو الطريقة الأفضل للتشخيص و المعالجة
الأسباب الممكنة
🔰الاضطرابات العصبية :
ألم عصب مثلث التوائم الشهير و اللي بيختلط مع الألم الشديد بالاسنان فالالتهاب بهل العصب او ضغط وعاء دموي عليه بالدماغ ممكن يكون السبب، غالباً بيحدث بجهة واحدة و بمكان معالج فيه اسنان سابقا او مقلوعة…
ممكن الألم يكون على أيّ جزء من مسار العصب وبيتضمن الاسنان و اللثة و الفك
🔰 اضطرابات المفصل الفكي الصدغي :
سبب رئيسي للالم السني من منشا غير سني , هاد المفصل اللي بيحمل الفك السفلي و بيربطه بالقحف ممكن يسبب ألم بعيد عنه بسن من الاسنان و اللي اذا تداخلنا على السن ما رح نستفيد شي لهيك الأفضل نركز على معالجة المفصل
🔰 التهاب الأذن :
أي ممكن تتفاجأوا بس الاذن و التهابها ممكن يأثر على الاسنان و يخلينا نحس ألم فيهم لأنه الأذن و الفك قراب من بعض و اعصابهم متداخلة , لهيك من الصعب نقرر سبب الألم اذا كان من الأذن أو الأسنان…
مثلاً ممكن سبب ألم الأذن أحيانا يكون سن خلفي عليه خراج او سبب ألم الأسنان مجرد احتقان او ضغط بالاذن…
🔰حالات الجيوب :
الأسنان العلوية جارتها للجيوب لهيك ممكن احتقان الجيوب يضغط على الاعصاب اللي بيظهر عنا كألم بالاسنان و بهي الحالة استخدام مضادات الاحتقان او مضادات الهيستامين بيعطي تاثير مخفف للالم بشكل واضح و من الأفضل مراجعة طبيب الانف و الاذن و الحنجرة الاخصائي…
🔰حت الأسنان:
صرير الاسنان او حت الاسنان هي عادة سيئة كتير للاسنان ممكن تحصل اثناء ساعات العمل او وقت النوم وتسبب الم بالفك او صداع او الم بالاسنان
وهون ممكن يساعدنا جهاز واقي ليلي يستخدم وقت النوم و طرق أخرى للمعالجة بتتضمن تمارين شد للعضلات وادوية و أساليب تخفيف التوتر بالحياة اليوغا مثلا…
🔰 الشقيقة :
معاناة الشقيقة ممكت تمتد للوجه و الفك العلوي تحديدا و تختلط مع ألم الاسنان و الجيوب.
⚠️ ولسا في أسباب كتيرة بتتضمن عوز الفيتامينات والحلأ النطاقي والوروم العضلي الليفي و ممكن أسباب خطيرة اكتر متل امراض القلب و سرطان الرئة…
و من الميددوز منقلكم لا تهملوا اسنانكم ابداً و لا ألمها لانه متل ما عرفنا اله أسباب كتيرة و تضلوا بخير وصحة ❤️
و برأيكم شو صار مع فليباغ ؟😅
مسابقة ميددوز
إعداد وتحرير : د. ريام محمد النجار
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة .
مواضيع صحة الاسنان والفم