ترددنا كتير قبل ماننزل هالبوست، لأنو قبلو شي وبعدو شي
ليش بقا؟
لأنو رح نبدأ بتعريف وحدة قياس جديدة اسمها الأمبير الصيني
الأمبير الصيني، هوي وحدة قياس تمنيات المصمم، وفي علاقة ما بينو وبين التيار الحقيقي
هالعلاقة عادة أنو الأمبير الصيني بيساوي كذا أمبير حقيقي
القصة القصيرة:
الدايمر بالصورة بيصلح ل 5 أمبير بالكتير، لاتصدق كلشي بتقراه عالمنتجات الصينية
القصة التقنية الطويلة “للمهتمين والتقنيين”:
الصور المرفقة هيي للدارة اللي عملنا عليها مسابقة
طبعاً، لاشيء يذكر دارة دايمر تعتمد على الدارة المتكاملة الأشهر 555
اللي لفتنا بالتصميم اعتماد ترانزستور موسفت قناة N طراز
20N03
مواصفاتو باقتضاب
Vgs(max) = 30v
ID(max) = 20A
Rds(on) = 20milli ohm (max)
طبعاً لهون كلو تمام، والدايمر اللي بالصورة معرف على انو دايمر 12 – 24 فولط
تيار 8 أمبير
هون منفكر انو 20 أمبير أكبر من 8 أمبير ف أمورنا جيدة
وهون منبلش بتعريف الأمبير الصيني..
الترانزستور سابق الذكر بيجي ضمن تغليف يعرف باسم
TO-252
هاي البكيج على هيك بورد بأحسن أحوالها مقاومتها الحرارية (وصلة ل محيط خارجي) بحدود ال 92 درجة سليسيوس للواط
طيب شو يعني؟
يعني كل واط يبدد حرارياً ضمن الترانزستور، بيرفع حرارة الترانزستور عن حرارة المحيط 92 درجة، مع العلم أنو الحد الأقصى للحرارة هوي 150 درجة
شو الواط المبدد حرارياً؟
بأبسط صيغه، رح نتخيل تمرير تيار ثابت 6 أمبير عبر الترانزستور
الاستطاعة المبددة هيي مربع التيار ضرب مقاومة الترانزستور الداخلية
يعني
6 * 6 * 0.02
يعني 0.72 واط
يعني الرقم السابق بيرفع درجة الترانزستور
66 درجة
بالصيف، وقت تكون الحرارة مثلاً 35، رح يكون الترانزستور عم يموت بحرارة تقارب المية درجة مئوية
طبعاً بكج مغلق، مافي مروحة، مافي مبرد، مافي شي..
لهيك هالدايمر المعرف ك 8 أمبير، برأينا المتواضع يصلح لل 5 أمبير ك حد أقصى
عذراً عالإطالة، وعالحديث التقني اللي ممكن مو الكل بيفضلو
سايبرترون دايمر أمبير صيني
