التنفس الفموي

مع تقلبات هالجو الجوزائي أغلبنا عانى من حساسية أو زكام وصعوبة تنفس🤧…
والبطل لهي القصة دائماً هوي التنفس الفموي لِ بينقذنا من اي إعاقة بتعترض الطريق التنفسي الأنفي ‼️

لهيك رح نحكي عن التنفس الفموي
هل هو شي طبيعي وصحي؟ ولا عادة سيئة؟؟

بالبداية خلينا نأكد أنو الطبيعي يتنفس الإنسان من أنفه وطبعاً الأنف بقوم بعمليات لتنظيف وتنقية الهواء الداخل للرئتين…

ولكن ممكن بكتير أحيان نشوف أشخاص عندهم تنفس فموي … لحظة 👀 كيف منعرف هالشخص عندو تنفس فموي ؟!

⛔ أغلب الأشخاص الي بيتنفسوا من الفم ما بينتبهوا لهالشي…
ولكن في مجموعة من الأعراض لِّ بتدلنا على وجود التنفس الفموي مثل :

⚠️”الشخير جفاف الفم بحة بالصوت تعب مزمن هالات سوداء تحت العينين”

هي بالنسبة للأشخاص البالغين👆

⛔ لكن إذا أنا عندي طفل وما بدي يعاني من هالعادة كيف بعرف إذا طفلي عندو تنفس فموي أو لا⁉️

الطفل ما بيقدر يعبر عن الأعراض الي عم يحس فيها مثل الشخص البالغ ولكن ممكن نلاحظ عنده مجموعة من العلامات مثل:

⚠️” معدل نمو أبطأ من الطبيعي زيادة نوبات البكاء في الليل اللوزتين كبيرتين شفاه جافة متشققة مشاكل التركيز بالمدرسة النعاس أثناء النهار”

⛔ كيف نتخلص من هالمشكلة⁉️

طولو بالكم قبل ما نحل المشكلة بدنا نعرف سببها 💆
السبب الرئيسي والأشيع هو انسداد كامل أو جزئي بالمجرى الأنفي يكون إما بسبب مشاكل تشريحية مثل انحراف الوتيرة وغيرها أو مشاكل تلوث في الجو وحساسية من الغبار و أيضاً الاحتقان و الزوائد الأنفية.

⛔ هل التنفس الفموي خطير⁉️
خلينا نشوف تأثيراته على الصحة الفموية والشكل الخارجي للوجه:

⚠️رائحة كريهة ومزعجة
⚠️أمراض والتهابات اللثة
⚠️جفاف بالفم
⚠️تسوس الأسنان نتيجة جفاف الفم وغياب اللعاب المسؤول عن تنظيف الأسنان
⚠️التهابات حلق وأذن
⚠️سوء بالإطباق (ممكن يأثر عالناحية الجمالية والنطق والمضغ)
⚠️فوهات أنفية ضيقة وقبة حنك ضيقة
⚠️وجه متطاول

⛔ طيب أنا شخص عندي كل هالأعراض المذكورة فوق شو لازم أعمل ؟ كيف اتخلص من هالعادة ⁉️

⚠️ بالبداية إذا كان سببها تشريحي مثل ما ذكرنا منقوم بالجراحة اللازمة حتى يرجع الأنف يقوم بوظيفته التنفسية.

⚠️وأيضاً فيك خلال النهار تكون واعي وتجبر حالك عالتنفس الأنفي.

⚠️ممارسة التأمل واليوغا لأنه بتساعد عالاسترخاء والتنفس الأنفي العميق…

بالنهاية متل ما بيقولو هو نعمة ونقمة
نعمة لأن لو مافينا نتنفس من فمنا كنا متنا بهالجو 🤧
ونقمة لأنه ممكن إذا تحول لعادة دائمة رح يسببلنا مشاكل تقويمية وجمالية متل ما ذكرنا فوق…

من الميددوز كل الحب ومنقلكم:
❤️ ‏ Be calm and breath from your nose
‏
‏
●إعداد و تحرير: د. رشا هلال
‏●المصدر:
https://bit.ly/3vYW9Yi
https://bit.ly/3lPm1RE

🚩اعتماد:مِنصَّة صِحة الفَم السوريَّة MedDose” المتخصصة بنشر كُل ما يتعلق بطب الأسنان والصحة الفموية ومُحاربة المعتقدات الطبية الخاطئة.

مواضيع صحة الاسنان والفم