الربو – الجزء التاني .
ماعلاقة الربو بالموسيقا ⁉️
مافي أي علاقة 🤭 .بس حبيت قلكم إن عملية تقلص القصبات بتشبه حركة هالآلة لما تقترب من بعضها .
وعملية التقريج القصبي بتشبهها لما بتتباعد .
وكمان هي العملية كل يوم بتصير عنا بالجسم حتى لو ماحسينا .عند كل العالم مريض ربو أو غيره .
🤔طيب مين يلي بخلي القصبة تعمل هالحركات 🤨.
قال حركة التقارب تبع الآلة او القصبة (تقبض – تشنج ) في ناقل عصبي اسمه
استيل كولين بيعملها .
اما حركة التباعد او التفريج القصبي بيأديها ناقل عصبي اسمه نورابنفرين .
وهلأ خلونا نحل وظيفة الاسبوع الماضي اذا متذكرين🙃؟
السؤال كان : شو اكتر ابرة مشهورة بتحرض نوبة ربو عند مريض الربو ؟
الجواب :ابرة الديكلون وكلكم ربحتوا معنا .🥳🥳
بس للصراحة مو بس ابرة الديكلون ممنوعة .الديكلون هو فرد من عيلة كبيرة اسمها مضادات الإلتهاب اللاستيروئيدية NSAIDs ومن اعضاءهالعيلة كمان ( البروفين .الاسبرين .النابروكسين .حمض الميفيناميك )وغيرهم كتااااار😞
بس ماضروري نحفظ اسمائهم .المهم نحفظ اسم العيلة و نعرف انو اي فرد فيها عند مريض ربو رح تزيد حالة التقبض اضعاف مضاعفة .
🥺طيب مو اتفقنا نحكي كيف نساعد مريض الربو ؟
صحيح بس قبل لازم نعرف ان الربو بس يجي بيجي على شكل نوبتين .
الاولى خلال دقائق من تعرضه للعوامل يلي حكينا عنهم المرة الماضية من روائح وغيرو .
والتانية : بتجي بعد النوبة الاولى بحوالي ساعتين او اكتر و بتكون اقوى من الاولى .
لهيك لازم نعرف ان ادوية اسعاف الربو هي ادوية بتشتغل بسرعة بالجسم وهدول لازم نعطيهم بالهجمة الاولى .
لازم ندور على بخاخات عندو فيها احد الاسماء التالية : سالبوتامول – تيربوتالين .البوتيرول .هدول شغلتن يعملو توسيع بالقصبات متل شغل النورابنفرين بالضبط بجسمنا.
اذا مالقينا هالأسماء مندور على اسم تاني وهو ابراتروبيوم .
طيب كل هالأسماء ليش ما منعطيه كورتيزون ونرتاح من هالحفظ 🥲.
رح جاوبك . بعلم الادوية في شي اسمه زمن بدء التأثير .يعني بعد اديش الدوا ببلش يشتغل بالجسم. والكورتيزون بدو وقت طويل ليشتغل . لهيك بعطيه ياه لاحميه من الهجمة التانية يلي بعد ساعتين . اما اسعافياً هدنك اسرع بيشتغلوا خلال 3 دقايق اول مجموعة .بينما اذا بدي اعطيه كورتيزون واستغني عن اول مجموعتين رح يضل يتعذب ويسعل شي ساعتين ليبلش الكورتيزون يشتغل.
ملاحظة : يجب رج البخاخات كلها قبل الاستخدام ..
وبعد البخاخ يلي فيه كورتيزون منتمضمض .لأن ايام بتنزل قطرات منه و بتعمل قلاعات بالتم .
طولت عليكم 😅.وهلأ دوركم شو اسم الآلة الخارقة اللي استعملناها للشرح؟!! كتبولنا بالتعليقات .
ويلي مابيعرف يكتب اذا عجبه صوتها .
انا عني اجاني صداع 😁؟
روجين عمر
(سماعة حكيم)
Rojin Omar