السكتة الدماغية معناها ببساطة إن فيه جزء من المخ مبيوصلوش د

🧠السكتة الدماغية معناها ببساطة إن فيه جزء من المخ مبيوصلوش دم🩸, وطبعاً الدم هو مصدر الأكسجين, والأكسجين هو إكسير الحياة اللى مفيش خلايا فى الجسم تقدر تعيش من غيره.
فمعنى كون جزء من المخ🧠 ميوصلوش دم إن بعض خلايا المخ هتموت, والنتيجة بتكون على حسب وظيفة الخلايا اللى ماتت, ببساطة الجزء من الجسم اللى خلايا المخ دى مسؤولة عن التحكم فى وظيفته بيفقد وظيفته.

السكتة الدماغية من الحالات اللى بعض مدعي الطب بيستغلوها كوسيلة للكسب غير المشروع بإعلان إنهم بيعالجوا (جلطة المخ)‼️لأن الناس عموماً فاكرين إن مفيش غير نوع واحد من السكتة الدماغية هو جلطة المخ🩸, والحقيقة مش عيب ولا حرام إنهم يبقوا فاهمين كده, هما مش أطباء وده مش تخصصهم, مش مفترض إن الطبيب مثلاً يكون بيفهم فى أنواع الصبات الخرسانية واستعمالاتها, دى شغلة المهندس‼️كذلك مش مفترض إن اللى مش طبيب يكون عارف أنواع السكتة الدماغية وطرق علاجها‼️لكن العيب إنه يفتح عيادة ويعالج الناس من السكتة الدماغية اللى هو أصلا ميعرفش أنواعها وفاكرها نوع واحد هو الجلطة‼️
وللأسف مازال عندنا ناس, بتسافر بالمريض من بلد لبلد, علشان توديه للمعالج فلان علشان يعالجه من (الجلطة) اللى جاتله‼️
مبدأياً السكتة الدماغية فيه منها نوعين🤞 عكس بعض تماماً, والإتنين بيعملوا نفس الأعراض على فكرة‼️
أول نوع👇
❇️ السكتة الدماغية الناتجة عن جلطة🩸, ودى معناها ببساطة إن فيه جلطة أو انسداد حصل فى أحد الأوعية الدموية المغذية للمخ🧠, وبالتالي الجزء من المخ اللى مفروض الوعاء ده بيغذيه مبيوصلوش دم, وطبعا بيموت إذا متمش إسعافه‼️
والنوع التانى هو 👇
❇️ السكتة الدماغية الناتجة عن النزيف🩸, ودى معناها إن فيه وعاء دموى فى المخ تمزق, وبناء عليه الجزء اللى مفروض إن الوعاء ده بيوصله الدم🩸, برضه مبقاش واصله دم, فبتحصل نفس النتيجة.

أعراض السكتة الدماغية بنوعيها بتكون كالآتي👇👈 صعوبة فى المشي🧎🏻👈 صعوبة الكلام😑👈 تنميل أو شلل فى نصف الجسم🤦🏻‍♂️👈 زغللة الرؤية😵‍💫👈 الصداع🤕لو لاحظت على أى حد عرض واحد منهم وشكيت إنه فى حالة سكتة دماغية, إطلب منه👇👈 يكرر أى جملة بسيطة أو يقولك إسمه بالكامل مثلا, لو هو سكتة دماغية مش هيقدر يكملها بشكل مفهوم.👈 إطلب منه يبتسم😁, هتلاقيه بيبتسم بنص وشه بس.👈 إطلب منه يحط إيديه عل راسه🙆‍♀️, هيحط إيد واحدة والتانية مش هيقدر يرفعها ولو رفعها هتقع تاني.ساعتها لازم تاخد العيان ده على المستشفى فورا, لأن عامل الوقت بيكون حاسم فى حالات السكتة الدماغية, لو العيان تم إسعافه بسرعة ممكن يتعافى بدون أى مضاعفات ويرجع طبيعي💁‍♀️, وكل ما تأخر الوقت بتزيد أحتمالات الوفاة و المضاعفات المستديمة للحالة.

ومينفعش يتم التشخيص والعلاج إلا في المستشفى🏥, لأنه التشخيص بيحتاج للفحص بالأنواع المختلفة من الأشعة علشان يتم تحديد نوع السكتة ومكانها ومجال تأثيرها وإيه اللى لازم يتعمل فى علاجها.

وطبعاً علاج النوعين من السكتة الدماغية عكس بعض تماما, يعنى مش أى سكتة دماغية علاجها مذيبات الجلطة زى ما الغالبية فاكرين💉, لو السكتة دى نتيجة نزيف وإديت العيان مسيل للدم فأنا كده ببساطة بزود الطين بلة‼️
و حتى لو الحالة جلطة فعلاً, فأحيانا الجلطة مبتأثرش فيها مذيبات الجلطة وبتحتاج التدخل عن طريق القسطرة, فطبعا كل ما أسرعنا فى علاج المريض إحنا كده بنكسب وقت ممكن التصرف خلاله بأكتر من خيار.علشان كده مينفعش لما تلاقي حد عنده أعراض سكتة دماغية, تفضل تلف بيه من المعالج الفلاني للمعالج العلاني, انت بكده بتعرضه لخطر الإعاقة أو حتى الوفاة‼️
طبعاً بعض حضراتكم هيقولولي بس فيه حالات إحنا نعرفها شخصياً إتعالجت بالشكل ده فعلا وخفت‼️
أنا هقول لحضراتكم ليه ده ممكن يحصل أحياناً؟🤔لأكتر من إحتمال👇👈 فيه نوع من السكتة الدماغية بنسميها السكتة العابرة, أو النوبة الإفقارية العابرة, ودى بتكون سكتة بسيطة جداً نتجت عن مجرد ضعف مؤقت للدورة الدموية فى جزء معين من المخ, ودى لها نفس الأعراض هى هى , ممكن تستغرق وقت قليل جداً ممكن يبقى دقايق, وممكن يمتد ليوم كامل, بعد كده بتنتهى من نفسها من غير أى مضاعفات, وطبعا لو المريض خلال اليوم ده راح لواحد من المعالجين دول, وخف بعدها بيتصور إن المعالج ده هو اللى خففه حتى لو كان المعالج ده مدالوش أى علاج أصلا‼️👈 لو تصادف إن العيان كان فعلا عنده جلطة مش نزيف, وراح للمعالج والمعالج إداله مسيل للدم لأنه أصلا ميعرفش علاج للسكتة الدماغية غير مسيلات الدم, ممكن الجلطة تعدي فعلا والعيان يشفى‼️👈 لو العيان أصلا مكانش عنده سكتة دماغية, كان عنده نوبة هستيرية مثلا وأهله إفتكروا إنها (جلطة), فهنا لا المريض مريض ولا الطبيب طبيب.يعني الخلاصة إن العلاج غير الطبي للسكتة الدماغية بيندرج تحت بند التجربة و الصدفة مش أكتر‼️
فطبعاً لازم يتم نقل المريض للمستشفى لأن الدقيقة بتفرق فى مسار حياته, كمان مهم نعرف إن النوبة الإفقارية العابرة اللى انا اتكلمت عنها دى حت لو عدت على خير, فمعناها إن الشخص ده عنده إستعداد عالي لإنه يحصلة سكتة شديدة, فلازم يراجع الطبيب علشان يتجنب إن ده يحصل.
دي كانت بعض المعلومات عن السكتة الدماغية🧠, ارجو إنها تكون أفادت حضراتكم🙏🏻تمنياتنا للجميع بدوام الصحة والعافية ولجميع المرضى بالشفاء العاجل🤲

د. خالد طلبة الشبراوي من جمهورية مصر الشقيقه

(سماعة حكيم)