الشره العصبي

الليدي ديانا قالت أكثر عبارة مؤلمة :

لقد أحبني البيض والسُّود، و المثليّون واليهود وكل البشر، إلّا الرجل الذي أحببته .

بس يا ترى هل هيي كانت تحب حالها ومتصالحة مع نفسها ؟!؟

الميددوز يجيب …..

كثير منشوف عالم خاصّة بنات بسن المراهقة، بدهن ياكلوا كلشي و بالكمية اللي بدهن ياها بعدين بيشتغل ضميرهم وبقولوا « ياااا أنا ليش أكلت كل هاد والله بلا ما حس 💔 » ….

بتعرفوا حدا هيك، طيب شو هالحالة ؟!؟

الشره العصبي

⛔ حالة تحدث بشكل شائع عند الإناث المراهقات، وتتميز بالشراهة عند تناول الطعام، ثمَّ اتباع سلوكيات تعويضية غير ملائمة لمنع زيادة الوزن وهيك صار مع الليدي ديانا بفترة من الفترات، يعني شو بصير ؟!؟

⛔ المريض بيمرق بنوبات بيفقد السيطرة على نفسه وما بيقدر يوقف تناول الوجبة [بيتناول كميات أكثر مما قد يستهلكه معظم الناس بفترة مماثلة (عادة أقل من ساعتين) و في ظل ظروف مماثلة ] .

⛔ بعدين بيشعر أنو أكل كتير، وبخاف يسمن وما يحافظ على شكل جسمو المثالي فبيعمل كذا سلوك مثل :

⚠️ القيء الذاتي .

⚠️ تعاطي المسهلات .

⚠️ استخدام مدر للبول .

⚠️ النشاط البدني الشديد .

⚠️ الصوم .

⛔ طبعا أكيد مو كل حدا عمل سلوك من هدول👆 مرة بعمرو صار مصاب بالشره لا … لازم تصير النوبة مرة على الأقل كل أسبوع لمدة ثلاثة أشهر لنقول هاد الشخص عندو شره .

⛔ شو علاقة الصحة الفموية بهالحالة ؟!؟

⚠️ القيء المتكرر ممكن يسبب حدوث أضرار للأسنان بسبب احتواء القيء على أحماض المعدة (هي الاحماض ضرورية للتمكن من هضم الطعام في المعدة) لكن بالفم هي الاحماض بتسبب تآكل الميناء اللي بغطي أسنانك وبيحميها .

⚠️ تضخم الغدد اللعابية {لاسيما الغدة النكفية وأحيانا الغدة تحت الفك السفلي }، و تورّم الخدين .

⚠️ القلس المعدي المريئي “GERD” اللي هو تدفق عكسي لحامض المعدة إلى القناة الهضمية التنفسية العليا، بحيث يصل إلى البلعوم والحنجرة ويؤدي لـِ : السعال، بحة الصوت، التهاب الحلق، وعسر في البلع .

⛔ شو العلاج يا ترى ؟!؟

⚠️ مثبطات امتصاص السيروتونين الانتقائية قد تساهم في التقليل من أعراض الشره العصبي المرضي .

⚠️ العلاج السلوكي النفسي .

⛔ ونحنا كأطباء أسنان مهمتنا تنبيهك لتجنب تفريش الأسنان بعد القيء مباشرة (حتى لا تسبب تآكل أسنانك)، اكتفي بالمضمضة بالمي أو الفلورايد وبعد حوالي نصف ساعة فيك تفرشي أسنانك .

خلي ثقتك بنفسك كبيرة، واتذكر ع طول الخروج عن الاعتدال انتهاك لحق جسمك عليك ..

أيامكم سعيدة ❤ .

● إعداد : د. لمـا اسماعيل شجاع .
● تحرير : د. آيـة معـن محمود .
● التدقيق العلمي : د. عمـرو هنيدي .

● المصدر العلمي : pubmed https://bit.ly/3dgjoW3

🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.

مواضيع صحة الاسنان والفم