الشعرانية ماهي الشعرانية هي عبارة عن نمو شعر زائد غامق

📌الشعرانية 🧔🙅‍♀️ 😱

📌ماهي الشعرانية ⁉️

🔺️هي عبارة عن نمو شعر زائد غامق وسميك في جسم المرأة بأماكن ذات توزع ذكوري مثل منطقة الشارب اللحية🧔 الصدر البطن الظهر الوجه الداخلي للفخذين 🦵

⬅️يلي بالعادة بيكون الشعر فيها عند المرأة ناعم وفاتح

📌أسباب الشعرانية⁉️

🔺️تنتج الشعرانية عن زيادة ⬆️ بإفراز أو بتأثير الأندروجينات (الهرمونات الذكرية) عند المرأة 👩🏻‍🦰

🔺️كيف أنثى وعندها هرمونات ذكرية 😒🙄

⬅️نعم 😁 هي الهرمونات بتنفرز عند المرأة من مكانين هنن المبيض والكظر (غدة صغيرة بتتوضع فوق الكلية)

⬅️لكن بتنفرز بكميات قليلة وضمن مستوى معين
والزيادة عن هالمستوى بتسبب ظهور عدة مشاكل منها الشعرانية 🧔

هلأ منجي للأسباب 👇

1️⃣شعرانية فيزيولوجية:
يعني هون بتكون الشعرانية شي طبيعي وما في داعي للعلاج✅

⬅️ايمتا بيكون هالشي⁉️

✳عند الفتيات بسن البلوغ 👧🏼منلاحظ زيادة للشعر وخاصة بمنطقة الشارب او بالوجه

✳كمان عند المرأة الحامل🤰 بتلاحظ زيادة وسماكة بالشعر بالجسم

✳و عند المرأة بعد سن اليأس👵🏻

2️⃣متلازمة المبيض متعدد الكيسات وهي اشيع سبب للشعرانية

⬅️هون بيكون عند المريضة :

🔺️عدم انتظام بالدورة الشهرية
🔺️ مظاهر ارتفاع هرمون الذكورة (الأندروجين)
ومنها حب الشباب والشعرانية و الصلع (تساقط الشعر و فراغات بمقدمة الرأس) او اثبات ارتفاع هالهرمونات بالتحليل
🔺️وجود كيسات متعددة بالمبيض (بالايكو)

3️⃣الشعرانية الأساسية أو مجهولة السبب

هون بيكون في شعرانية ولكن كل التحاليل طبيعية ومافي اي مشاكل بالدورة ولا أي سبب للشعرانية

4️⃣مشاكل غدية :

متل ارتفاع هرمون الحليب (البرولاكتين) او نقص نشاط الغدة الدرقية او زيادة افراز هرمون الكورتيزول

5️⃣بعض الأدوية 💊
متل المينوكسيديل، سيكلوسبورين و الستيروئيدات البنائية

6️⃣بعض أورام المبيض أو الكظر
وبهالحالة بتكون الشعرانية شديدة وبتنمو بسرعة

👈بحال كنتي عم تعاني من الشعرانية راقبي وجود اعراض تانية عندك ممكن تدل على المبيض متعدد الكيسات متل :

☝عدم انتظام الدورة
✌حب الشباب
👌زيادة الوزن او البدانة
🤚تساقط الشعر بمقدمة الفروة

📌طيب لازم راجع الطبيب⁉️

🔺️طبعا لازم تراجعي الطبيب👩🏻‍⚕️👨‍⚕️

☝ اولا لحتى نتاكد من التشخيص ونأكد اذا كانت هالحالة تعتبر فعلا شعرانية او انها شي طبيعي ومافي داعي لعلاجه

✌تانيا لحتى نحدد السبب يلي أدى لظهور الشعرانية ونقدر نعالجه بالشكل الصحيح

⭕وخاصة اذا ظهرت الشعرانية بشكل مفاجئ او كانت عم تزيد بسرعة يفضل تراجعي طبيب الجلدية فورا ✅

📌شو التحاليل يلي ممكن تحتاجها المريضة⁉️🧪🩺

🔺️بالبداية يتم الفحص من قبل الطبيب وتقييم الشعرانية حسب معيار خاص لحتى نأكد التشخيص ونحدد شدة الحالة

🔺️بعدين حسب حالة المريضة و المشاكل التانية يلي عم تعاني منها ممكن يطلب الطبيب👇

1️⃣تحاليل دموية لقياس مستوى الهرمونات بالدم
2️⃣تحاليل لتحري وظيفة الغدد بالجسم متل الغدة الدرقية او الكظرية بحال الشك باضطراب فيها
3️⃣ايكو نسائي بحال شك الطبيب بالمبيض متعدد الكيسات او مشاكل نسائية أخرى
4️⃣ممكن يطلب اجراء تصوير طبقي محوري او مرنان عند الشك بوجود ورم

🔺️رح اترك علاج وتدبير الشعرانية للبوست الجاي
لانه صار طويل البوست🤓 😁

د سراب شيخ حمدو
اختصاصية بالأمراض الجلدية والتجميل

(سماعة حكيم)