( خلق محمد بتشوّه صدري ولادي بيطلع شكل صدرو فيه متل شكل القمع.. أهلو ما كانوا ياخدوه لعند دكتور لأنو يشوفوه صحتو عال العال ومو مأثر عليه التشوه بشي وخاصةً أنو التشوه مغطى بالتياب يعني ما حدا بينتبه عليه.. كبر محمد وفات المدرسة وبحصة من حصص الرياضة وهوي عم يشلح صدريتو ليلبس البيجامة شافوه رفقاتو وبلشوا يتنمرّوا عليه وينفروا منو.. ولأنو محمد كان من النوع يلي بيكبت ولا بقول مشكلتو.. أثرّ عليه التشوّه والتنمّر لدرجة يتراجع بدراستو ويبقى صامت كل الوقت)!!
شو يلّي كان صاير مع محمد؟
⚫ يلّي صاير معو هوي تشوه ولادي اسمو الصدر القمعي.. بكون فيه شكل الصدر متل القمع.. والحالة هي شائعة كتير بتصيب ١ من كل ٤٠٠ ولادة وببتميل للذكور أكتر!
بتعرفوه للقفص الصدري؟
هاد مكّون من عضمة بالنص اسمها عظم القص من الأمام.. وفي عنا الأضلاع من الجوانب ومن الخلف في الفقرات الصدرية.
بصير تشوه الصدر القمعي وقت عظم القص وبالتحديد جسمو مع النهايات الأمامية للأضلاع بتنسحب لورا فبصير ياخود الصدر شكل القمع تماماً👌
⚫ أعراض هالمشكلة هي غالباً بتكون لا عرضية.. تشوه شكلي فقط لا غير.
وأحياناً بتعمل مشاكل قلبية وتنفسية بحيث بينسحب القلب لليسار وبصير يضغط عالرئة فبصير المريض معرض للإنتانات الرئوية المتكررة وبصير صعب عليه يتحمل أي جهد زايد أو رياضة عنيفة.
ممكن كمان هالتشوه الولادي يترافق مع مشاكل تانية متل الجنف وآفات القلب الولادية وتناذر مارفان.
⚫ تشخيص التشخيص كتير سهل وبسيط.. مجرد فحص سريري وتأمل لكن لا بد كمان نتأكد من سلامة بقية الوظائف التنفسية والقلبية خوفاً لتكون مترافقة المشكلة بمشاكل تانية.
⚫ علاج العلاج بكون جراحي حصراً بحيث منفتح بخط معترض تحت الثديين ومنستأصل النهايات الضلعية المصابة بعدين منخزع القص ومنسحبو من ورا لقدام.. مكانو الطبيعي.. وليضل محافظ عمكانو منحط تحتو صفيحة وبعد بشي نص سنة لسنة منشيلها وبكون تصحح التشوه ❤️
سؤال مهم : ايمت لازم نعالج هي الحالة؟
⚫ هلأ بالعقل والمنطق لازم نعالجها وقت بتعمل مشاكل وظيفية أو وقت بتترافق بمشاكل تانية لكن معقول نعالج ونفوت جراحة كرمال نفسية المريض؟
اي نعم.. لازم نعالج وقت التشوّه يسبب حالة نفسية سيئة للمريض!
يعني بحالة أحمد لازم يكون متعالج قبل ما يدخل المدرسة وقبل ما يتعرّض للتنمّر والرّض النفسي لأنو المرض النفسي يلي ممكن يسببو التشوه لا يقلّ أهمية وخطر عن أي مرض آخر!
التنمّر هوي سبب مهم لندّخل طفل لعمل جراحي.. تخيلوا!
ما في أي عمر محدد لنعمل العملية بس نحنا منفّضل نعملها بين السنتين وال٥ سنين.. قبل ما يدخل الطفل للمدرسة.
الصورة لعملية تصحيح جراحي لحالة صدر قمعي ❤️
وعقولتكم :
عندما تعطى شهادة الطب لمن يستحق! ❤️🌸
كنت معكم سَماح صالح محمد ❤️
المصدر :
🌍 مرجع أمراض الصدر الجراحية في كلية الطب البشري في جامعة دمشق.
(سماعة حكيم)
هالمرجع بالذات من أمتع المراجع ياريت لو كل الكتب كانت متلو بالتنسيق والشرح المبسط والأهم
❤️❤️
Zed Alhsen
عم يمدحو بالمرجع
ممكن يفيدك
.
طب لو كان اسفل العظم للقفص الصدري الأيسر متضخم بشكل بسيط وملحوظ ببعض الأوقات شو منقدر نسميه بهالحالة وعلاجو جراحي ولا طبيعي لو ضل هيك