لو فاكر ان وجود الـAlt Attribute فاضي زي عدمه فـ خليني أقولك إنك غلطان تمامًا، بالعكس انت في حالات يستحسن تستخدم فيها Alt Attribute فاضي عن إنك تكتب فيه محتوى الصورة، مستغرب؟ خليني أشرحلك
ببساطة الـAlt Attribute اختصار لكلمة Alternative، يعني بديل، وبالفعل هو النص البديل للصورة في موقعك، لو لأي ظرف الصورة مظهرتش، ده النص اللي المفروض يظهر مكانها
فـ هو مش النص اللي بيشرحلك إيه اللي جوة الصورة، هو النص اللي المفروض يظهر مكان الصورة لو اختفت لا قدر الله، ودي نقطة مهمة جدًا، لأن كدة الصورة بقت واضحة وتقدر تستخدم Alt Attribute فاضي بدون ما يبقى فيه أي نص وده يبقى الـBest Practice كمان!
عاوز مثال؟
في موقعك الجميل كل مستخدم ليه Avatar مثلًا، وانت كاتب في الـAlt Attribute كلمة “Avatar Icon”، هنا أي برنامج بيقرأ الصفحة لأي حد معندوش القدرة على النظر، البرنامج هيقرأ كلمة Avatar Icon، وفي الحقيقة هي مجرد Visual مفيش نص معين بيعبر عنها، فـ هنا الصح إنك تسيب الـAlt Attribute فاضي
وهنا وجوده فاضي معناها ان الصورة دي مجرد أداة بصرية مساعدة، ومش هيأثر على الـSEO لأن وجوده فاضي ليه معنى، أما حذفه تمامًا بيأثر على الـSEO بشكل كبير لأنه مش بيقدر يتعرف على الصورة ويبدأ يعملها Indexing في أماكن تانية مش المفروض تكون فيها
خلينا نقول ملخص سريع للكلام ده في قاعدة عامة كدة
الـAlt Attribute معمول عشان يحل محل الصورة في غيابها بشكل مايأثرش على سياق الكلام، بحيث ظهور الصورة من عدمه هيقدر يوصل للمستخدم المعنى اللي انت عاوزه.
بس كدة، ده كان الموضوع ببساطة، الـAlt Attribute من الحاجات المعروفة والمستخدمة بكترة ولكن حبيت أوضح استخدامها الصحيح ايه عشان تكتب Semantic HTML، متنساش لو عندك تعليق على الكلام اللي فوق ده تقولي في الكومنتات.
الجينيص
HTML5 Notes
الجينيص