بقالنا فترة بنسمع كلام كتير عن الـAPK والـAAB، وناس بتقول رد فعل جوجل على مايكروسوفت وخزعبلات كتير لا تمت للواقع بصلة 😅
خليني أشرحلك الموضوع ببساطة
لو ماتعرفش فـ الاتنين دول هم الصيغ النهائية للكود البرمجي المكتوب للـApplication، مش هتفرق في الكود نفسه يعتبر قد ما هتفرق في الطريقة اللي هيتجمع بيها الملفات بتاعة المشروع في ملف واحد
الـAPK أولًا بتعمل الملفات بتاعتك على شكل Package، مرصوص فيها كل الملفات بكل المميزات الموجودة في الأبليكيشن، وبعد كدة الأبليكيشن بيحدد إذا كانت الميزة دي “تتفعل” على الجهاز ده ولا لأ
بمعنى، انت مثلًا نزلت برنامج كاميرا، فـ البرنامج مصمم على انه يشغل 4 كاميرات (مثلًا، الموضوع عامةً مش بيتم كدة في الكاميرا بالذات بس أنا بقول مثال يوصلك مش أكتر) المهم، انت موبايلك فيه 3 كاميرات بس، فـ لو صيغة الأبليكيشن APK فـ الكود بتاع الكاميرا الرابعة هيفضل موجود ولكنه “غير مفعل” على الجهاز ده
اما الـAAB، فـ الصيغة دي بتعمل الملفات بتاعتك على شكل Bundle، الـBundle دي متقسم جواها APKs كتير، بالفيتشرز بقى الموجودة في الأبليكيشن، ولما الأبليكيشن بيحتاجها بينزلها ويبدأ يستخدمها
نرجع لمثال الكاميرا تاني، هنا الكود بتاع الكاميرا الرابعة هيكون معمول في ملف APK لوحدة جوة الـBundle، وبما ان جهازك مش بيدعمها فـ هي “مش هتنزل” على جهازك من الأساس!
عاوز مثال من الحياة؟ أبليكيشن Twitter مثلًا، ده فيه الـMain APK، ومعاه حبة فايلات APKs تانية بتساعد البرنامج على انه يشتغل ويكون فيه Features مختلفة
فـ لو حد صاحبك بعتلك الـAPK بتاعة الـTwitter بالشير مثلًا مش هيشتغل عندك، انما لو بعتلك الـBundle كاملة هيشتغل بكل سلاسة
وبس كدة، ده كان الموضوع ببساطة
متنساش تعمل لايك، وتشترك في القناة عشان مايفوتكش أي فيديو جديد، هتلاقي اللينك في أول كومنت، وسلام ❤
الجينيص
الجينيص