مع إصدار الـHTML5، بقى عندنا الإمكانية إننا نعمل Data Attributes نحط فيها البيانات اللي عاوزينها، ونقدر نستفيد منها من خلال الـdataset في الـJavaScript، وبما إن الـHTML5 مدعومة من كل المتصفحات الحديثة فـ إحنا معندناش مشاكل إطلاقًا مع حاجة زي دي.
ولكن لو اتطلب منك مشروع يشتغل على الـBrowsers القديمة، اللي للأسف مش داعمة للـHTML5، هنا هتعمل ايه والكود بتاعك هيشتغل ازاي؟ خليني أشرحلك
ببساطة لما بتحط Attributes لأي عنصر عندك في الصفحة، بيكون نوعها حاجة من تلاتة، يا تكون Standard Attribute، يعني Attribute مخصص للعنصر ده، زي الـsrc Attribute في الـimg Element مثلًا، أو Global Attribute يعني Attribute شغال على كل العناصر الله يبارك زي class مثلًا، أو أخيرًا تكون Non-Standard Attribute، ودي Attributes مالهاش دعوة بالعنصر ولا هي من الـGlobal Attributes، فـ ببساطة المتصفح بيتجاهلها وبيعرض العنصر زي ما هو
وهنا بيكمن الحل، تقدر تضيف الـData Attributes بتاعتك عادي جدًا، والمتصفح أثناء عرضه للـHTML Page هيتجاهل الـAttributes دي وهيعرض العنصر زي ما هو، وفي الـJavaScript بدل ما تستخدم الـdataset هتستخدم الـFunctions القديمة زي getAttribute وsetAttribute عشان تجيب وتحدد القيمة بشكل طبيعي جدًا
وبس يا سيدي لازم تستحمل غتاتة الـLegacy Browsers لحد ما تنقرض إن شاء الله 😂، لو أول مرة تعرف المعلومة متنساش تعرف غيرك وخلي الكل يستفيد، وبس كدة، ده الموضوع ببساطة.
الجينيص
HTML5 Notes
الجينيص