المعامل الرابع من المعاملات الرياضية الأساسية (جمع – طرح – ضرب – قسمة)

اااااااه، معادنا النهاردة مع المعامل الرابع من المعاملات الرياضية الأساسية (جمع – طرح – ضرب – قسمة)، وأه أنا عارف ان ده الدرس اللي طنشناه كلنا في رابعة ابتدائى ولكن حاليًا مضطرين نفهمه لأنه مهم جدًا

خلينا نستكمل كلامنا عن الأعداد
دلوقتي عرفنا مجموعة الأعداد الصحيحة Integers، ودي عبارة عن مجموعة الأعداد الموجبة والسالبة بالإضافة للصفر، ولكن ماتكلمناش عن الكسور

ببساطة بين أي رقمين صحيحين في عدد لا نهائي من الأرقام المحشورة بينهم فيما يعرف بالكسور، زي النص والربع والثمن والسدس وغيرهم، الأعداد دي كلها أعداد غير صحيحة وبتتعامل معاملة مختلفة جوة الكمبيوتر، مش هقدر أكلمك عنها دلوقتي ولكن هنوصلها بعدين لا تقلق

نرجع للقسمة، وببساطة دي عملية عكسية للضرب، في الضرب احنا بنكرر عدد معين بعدد n من المرات، هنا احنا عاوزين نعرف الرقم الكبير ده جواه كام n؟

توهت مني؟ خلينا نسميهم عشان نعرف نتعامل معاهم
العدد الأول ده خلينا نسميه المقسوم
العدد التاني المقسوم عليه

بمعنى لو عايزين نعرف ناتج قسمة 25 على 5
فـ المقسوم هو 25 والمقسوم عليه هو 5، والمطلوب نعرف 25 جواها كام 5، لو حبيت تحطها في معادلة رياضية هتبقى على الشكل ده (مش ضروري تفهم الجزء ده دلوقتي، هنتكلم عنه تاني بإذن الله).
25 = 5n

وهنا النتيجة هتبقى 5، حابب تتأكد؟ عوض عن الـn هتلاقي المعادلة صحيحة وفعلًا 25 = 25

طرق حساب القسمة كتير الحقيقة، أنا هنا بحاول أوضحلك يعني إيه قسمة، لو حابب تعرف أكتر ممكن تبحث عن القسمة بالعوامل المشتركة وكيفية حل القسمة المطولة.

طب تعالى نشوف مثال رخم بقى
دلوقتي لو حابين نعرف ناتج قسمة الـ100 على 3؟
هتقولي بسيطة، هنشوف الـ100 جواها كام 3، وبعد ما تعد من هنا للصبح هتلاقي انك وصلت للـ99 ومتبقى معاك واحد والنتيجة لحد دلوقتي 33، وللأسف الـ1 أقل من الـ3 فـ مش هينفع تكمل القسمة هنا

ولو احنا مازلنا مقيدين بالأعداد الصحيحة بس، النتيجة هتبقى 33 فعلًا، ولكن ناتج قسمة 99 على الـ3، هي 33 برضه، تعرف معنى ده إيه؟ معناها ان الـ100 = 99! وده تخريف رياضي واضح 😂
100/3 = 99/3 = 33!

وهنا تظهرلنا الكسور اللي اتكلمنا عنهم فوق، اللي نقدر من خلالها نقول ان ناتج القسمة هو 33 و⅓، وبكدة نقدر نثبت ان 100 مش بتساوي 99 ورجعت المياه لمجاريها تاني والحمد لله.

الكسور بشكل عام بتتكون من بسط ومقام، البسط فوق شرطة الكسر والمقام هو اللي تحتها، وشرطة الكسر دي بتعبر عن علامة قسمة

يعني في المثال اللي فات، الواحد اللي فوق ده هو الرقم اللي اتبقى من عملية القسمة (باقي القسمة)، والـ3 هو المقسوم عليه، وبكدة احنا قادرين نفهم المعامل الخامس بقى اللي مش هنتعامل معاه كتير ولكنه مفيد جدًا، ألا وهو الـModules أو خارج القسمة، في أغلب لغات البرمجة بيرمز ليه برمز النسبة المئوية %

وده واضح من اسمه، بيعبر عن القيمة اللي مش بتكمل في عملية القسمة (خارج القسمة)، اللي في المثال السابق كانت 1

في البوست اللي جاي بإذن الله هكلمك عن الـDecimals (الأعداد العشرية)، وبعدين نبدأ نشتغل شوية في الـJavaScript ونتعامل مع الأرقام والمعاملات الرياضية ونفهم الـLogical Operators، وبس كدة، ده الموضوع ببساطة

الجينيص

الجينيص