●»» يـلّا عـالسريـري …
●»» يـلّا عـاللبيّـة، بلشنا هلا بــ ألــف بـاء اللبية 👍💪
[ حفر الدخول/ سبر الأقنية/ صورة السبر ]🔵 حفـر الدخـول :
● بداية عندنا الأسنان مقسومة أمامية وخلفية، بالنسبة لموضوع حفر الدخول، كل مجموعة بتختلف عن الأخرى بطريقة الدخول وكيفية الفتح .
● أشكال الحفر ( مخططها الخارجي ) مختلف من سن لآخر وهدول موجودين بشكل مفصل بالمحاضرات والكتب، بينما نحنا رح نحكي عن قواعد عامة تستعملوها بالسريري وتسهل عليكم الشغل .
● لنحضّر أي حفرة دخول بدنا نعرف ٣ شغلات :
١- نقطة البدء .
٢- اتجاه السنبلة .
٣-العمق (عمق الدخول) .
● رح نحكي عن الأسنان الأمامية والخلفية وفق هال ٣ نقاط .
🔰 الأسنان الأمامية :
● نقطة البدء بسنبلة كروية منتصف السطح اللساني(الحنكي) ومندخل فيها بعمق ٠،٥ – ١ مم .
● بعدها منبدل السنبلة لسنبلة شاقة ومنوجه بشكل موازي للمحور الطولي للسن .
● بالنسبة لعمق الدخول، الأفضل نقيس ع صورة التشخيص بين نقطة ثابتة( الحد القاطع ) وسقف الحجرة اللبية، ونحدد الطول عالسنبلة بواسطة محددة مطاطية من الادوات اللبية وغالباً لما ندخل بالحجرة اللبية منحس بنزول السنبلة بالفراغ،
● وآخر شي منرجع على سنبلة كروية أو Endo Z ومنشيل بقايا السقف وهالشي بيختلف باختلاف السنبلة يعنـي :
– إذا كانت كروية مننزل على طرف الحجرة تحت مستوى السقف العاجي وبحركة سحب للسنبلة منشيل بقايا السقف .
– إذا السنبلة Endo Z منمررها على جدران حفرة الدخول .
● وكيف منتأكد إذا ضل عنا سقف 🤔 ؟!؟
– بطرف المسبر العادي، مننزل على الطرف تحت مستوى السقف العاجي وبحركة نحو الأعلى، إذا علق معناها عنا سقف، وإذا مشي بدون ما يعلق معناها أمورنا تمام وما في حاجة نوسع أكتر بالجدران الجانبية .
🔰 الأسنان الخلفية :
● نقطة البدء تتم باستعمال سنبلة شاقة بس بتخالف كالتالي :
– الضاحك العلوي ⬅️ منتصف الميزاب المركزي، ( أنسي وحشي دهليزي لساني ) .
– الضاحك الأول السفلي ⬅️ منتصف المنحدر اللساني للحدبة الدهليزية .
– الضاحك الثاني السفلي ⬅️ ثلت المنحدر اللساني للحدبة الدهليزية ( من جهة الميزاب المركزي) .
– الأرحاء عنا شغلتين أساسيات بالنسبة لنقطة البدء :
في عنا شي اسمو خط أنسي وهو عبارة عن خط وهمي بحدد الحدود الأنسية للحفرة ونادراً ما يوجد قنوات أنسي هالخط ..
●»» بالعلوي : بيوصل بين ذروتي الحدبتين الأنسيات الحنكية والدهليزية .
●»» بالسفلي : بيوصل بين ذروتي الحدبتين الأنسيات اللسانية والدهليزية .
عنا الخط الوحشي ، وهو خط وهمي نفس الشي بحدد حدود الحفرة
●»» بالعلوي : هو الارتفاع المعترض .
●»» بالسفلي: هو الخط الواصل بين الميزاب الوحشي الدهليزي والميزاب اللساني .
● نقطة البدء بتكون على الميزاب المركزي ومنتصف المسافة بين الخطين الانسي والوحشي لكل رحى .
● بالنسبة للاتجاه، بالأسنان الخلفية اتجاه السنبلة مختلف بين الضواحك والأرحاء حيث :
●»» بالضواحك : موازي للمحور الطولي للسن ( مو موازي للتاج ها ، لاني مثلاً بالضاحك السفلي بميل التاج لسانياً وهاد سبب الاختلاف بنقطة البدء بين الضاحكين السفليين الأول والثاني .
●»» بالأرحاء : السنبلة بتكون عمودية على الإطباق بالبداية حتى نأمن نقطة تثبيت للسنبلة بعدين اختراق الحجرة اللبية بكون بتوجيه السنبلة باتجاه فوهة القناة الأكبر ( يعني باتجاه القناة الحنكية بالعلوية والوحشية بالسفلي ) .
● عمق الدخول منقيسوا عالصورة ومنحددوا عالسنبلة ومنحس بهبوط السنبلة بالفراغ .
🔵 تحديد فوهات الأقنية :
● دائماً منحدد الأقنية الرئيسية بالبداية ومنبدأ بالأقنية الأكبر وبعد إزالة اللب التاجي والغسل الغزير بهيبوكلوريد الصوديوم، بتنرسم عنا خارطة الأقنية بأرضية الحجرة اللبية، وهي عبارة عن خطوط سوداء غامقة بتصل بين مداخل الأقنية ونموذجياً لازم تتوضع فوهات الأقنية عند زوايا التحضير النهائية لحفرة الدخول مشان يسهل علينا الشغل .
● بعد ما نشوف كل الأقنية الرئيسية منحاول نوسع فوهات الأقنية باستخدام سنابل غيتس غليدن GG بحيث تستند عالجدار الخارجي من القناة .
🔵 صورة السبر :
●»» هلأ منجي على تحديد الأطوال وهون عنا طريقتين :
● طريقة القانون وبتحتاج حصراً لصورة السبر .
● طريقة الابكس لوكيتير وهي ما شرط نستعين بصورة السبر
🔰 طريقة القانون :
● عنا بهالطريقة ٣ معاليم ومجهول واحد …
– « المعلوم 1 » : طول الأداة الحقيقي، وهو الطول اللي بحدده انا عالأداة حسب الاطوال التقريبية لجذور الأسنان .
– « المعلوم 2 » : طول السن الشعاعي اللي باخدوا من الصورة التشخيصية، وبكون دقيق كل ما كان التصوير بالتوازي .
– « المعلوم 3 » : طول الأداة الشعاعي، وهو طول الاداة بعد ما حطها بالقناة، واتأكد انو المحددة عند جزء ثابت واضح من السن ( متل الحد القاطع ) .
– « المجهول الوحيد » : هو طول السن الحقيقي ( انتبهوا كيف قلنا طول السن وليس القناة) .
👈 وهاد الطول منحصل عليه بالقانون التالي 👇 …
– طول الأداة الشعاعي ÷ طول الاداة الحقيقي = طول السن الشعاعي ÷ طول السن الحقيقي
● وهيك جداء الطرفين بالوسطين بيطلع معنا طول السن الحقيقي وبنقص منو ٠،٥ – ١ مم بيطلع معنا طول القناة الحقيقي واللي هو الطول العامل تبعنا .
هيـك بنكون عرفنا أنو طول السن الحقيقي غير الشعاعي وبالتالي ليش ما منكتفي بصورة الأشعة …
نلقاكم على خير بالغسل والإرواء ✌💪 …
● إعـداد : د. مصطـفى عبدالقــادر سـرور .
مـيددوز ~ مصــدرك للمعلومــــات الطبيــــــة الموثوقـــــة 🛡 .
مواضيع صحة الاسنان والفم