قصة مؤسفة💔
سيدة ثلاثينية جاي بدها تنهي حملها لانو الطفل مشوه وعندو تشوهات كثير كبيرة بالعمود الفقري والدماغ 💔
السيدة بالتحاليل معها فقر دم وتعبانة ولما انسالت عن قصتها جاوبت بصوت متعب وكئيب:
يا دكتور أنا وزوجي موظفين وعنا بنت وصبي ما كان بدي احمل بس تعبت عحبوب منع الحمل وعساس امنع الحمل بالطريق الطبيعي ولما صار الحمل سلمت امري لالله وقلت بكفي بس صرت اتعب ورحت عالدكتور لافحص طلع الطفل مشوه 💔
قلنالها للمريضة منشان الغذاء وانو كثير مهملة نفسها ردت :
الوضع صعب وعنا أجارات بيت ومواصلات وما عمنلحق منجيب كل شهرين او تلاثة قطع فروج عقد مصارينا وبتركن لولادي لياكلو ويشبعو وخضار شوفة عينك الغلا وأحيانا حتى عشا ما منتعشى اذا تاخرنا عن الخبزات
هالكم جملة قادرين يكتفو أيدين أي طبيب ما عاد فيك تحكي شي حتى بتندم أنك سألت هيك سؤال كان قبل كم سنة عادي جدا
الحال ها حال معظم الشعب للأسف 💔
العبر اللي مناخذها من قصة هالأم الحزينة
1) هيي منع الحمل بالطريق الطبيعي نسبة فشله عالية استشيري طبيبك لمناقشة وسيلة فعالة ملائمة
2)لما تخططي لحمل ناقشي مع طبيبك لإعطائك متممات مناسبة بما فيها حمض الفوليك لتجنب التشوهات
الشفاء العاجل للمريضة وعسى أن يفرج الله على هذا البلد الحزين 💔
د.رأفت وليد بحصاص
(سماعة حكيم)