اليوم رح نحكي عن الجلطة القلبية واللي هوو أخطر شي ممكن يواج

اليوم رح نحكي عن الجلطة القلبية واللي هوو أخطر شي ممكن يواجهو الإنسان بحياتو، حالة مهددة للحياة.

رح نشرح محتويات الموضوع بشكل قصص من اللي عم نشوفو بالمشافي كل يوم:

قصة (١) من ذكريات الإسعاف:

شخص ٦٥ سنة عندو ارتفاع ضغط وبدأ من نص ساعة يعاني من وجع شديد بصدرو متل حدا واقف وراه وعم يخنقو ويضغط عصدرو .. صار يتعرق كتيير.. أسعفوه ولادو بالسيارة: عالطريق استفرغ مرتين. لما وصل عالإسعاف عطاه الطبيب فورا ٤ حبات أسبرين وحبة تحت لسان. قلو للدكتور ما راح الوجع فاضطر يعطيه مسكن بالوريد ..عملولو تخطيط قلب وقال الدكتور عندو جلطة بالقلب ولازمو قثطرة قلبية بسرعة. عمل المريض القثطرة وطلع عندو شريان الأمامي مسكر وحط شبكة وفتح الشريان وتخرج بسلامة.
قلو الدكتور تروك التدخين بس رد عالدكتور 😷😷😷.

قصة (٢) من ذكريات الإسعاف:

شخص ٤٢ سنة كهربائي منازل، مدخن بشدة، مع نفس اركيلة كل كم يوم. كان عم يشتغل ببيت أحد الزبائن، بس خلص وهوو راجع عالطريق حس وجعتو معدتو وصارت تلعي نفسو، راجع أقرب مشفى شافها عالطريق. عملولو تخطيط قلب وقالولو عندك احتشاء ولازمك قبول بالمشفى، المريض ما اقتنع قال عم توجعني معدتي شو عم يحكوا هدول ليكون بدهم يربحوا مني ويشلحوني مصاري!! قام المريض تخرج من المشفى على مسؤوليتو الشخصية ونزل عالطريق وهوو حامل عدة الشغل تبعو معو. وهوو ماشي بعد ٥ دقايق سلت عالأرض، شافوه الناس اسعفوه لأقرب مشفى. فحصو الطبيب: مافي تنفس ..نبض القلب مو واضح!!
حطوه عالجهاز اللي بيراقب نبض القلب طلع موقف قلبو ومتوفي.
عظم الله أجركم !

قصة (٣) من ذكريات الإسعاف:
شخص ٧٥ سنة عندو ضغط وسكري، من حوالي يوم عم يعاني من دوخة وهبوط ضغط .. زارو طبيب بالبيت قلو شوية تعب وعطاه فيتامين بس… هالدوخة ماكانت تروح وصار يعرق كتير تاني يوم.. اخدوه اسعاف عالمشفى عملولو تخطيط قلب هنيك وتبين انو عندو احتشاء بالقلب.. هاد المريض ما رضي يعمل القثطرة لأنو خاف منها (( جارو توفى بعد قثطرة)) فكان التدبير بالمشفى مميعات واسبرين ومسكنات واكسجين بس للأسف صار عندو قصور بالقلب وتعب دائم وتورم بالرجلين لأنو ما نحلت المشكلة بوقتا ..

هي القصص أمثلة حية عن جلطة القلب كيف بتجي وشلون ممكن تتظاهر .. وامثلة حية عن ثقافتنا الضعيفة وقناعتنا الوهمية ..

عبرة [1]: ضرر انو مريض يعاني من عوارض تثير الشك بنقص تروية قلبية وما يروح عالاسعاف وينعمل الو تخطيط قلب.

عبرة [2]: ضرر انو مريض احتشاء قلبي ما يعمل قثطرة (إن أمكن) …

عبرة [3]: ضرر انو مريض احتشاء قلبي وما ينام بالمشفى عالأقل !!!

بتمنى تكون هالمنشورات عم تثقفنا وتزيد من ادراكنا لأهمية المرض القلبي وأهمية التدبير المبكر بحل المشكلة وتخفيف الخطورة.

ضعوا لنا تجارب أقاربكم بهيك قصص بالتعليقات.

للجميع نتمنى العافية.

د. سومر شلبي Somar Shalaby
مذكرات طبيب قلبية

(سماعة حكيم)