اليوم مشيت خطوة جديدة باتجاه الحلم الكبير اليوم شفت بعيني

اليوم مشيت خطوة جديدة باتجاه الحلم الكبير..💪
اليوم شفت بعيني تعب سنة كاملة.. خوف و توتر وسهر و مرض و كتير شغلات عديت فيها مرقت ادامي متل فيلم لا يتجاوز 5 دقايق‼️🤷‍♀️

كنت قول دائماً ياربي ايمت لاخلص بقا؟ كل ما اقعد مع حدا احكيلو عن تعبي و قلة نومي و…..و… و……
و قلن حاج ماعاد بدي!!

استسلمت كتير و تخليت عن حلمي مابنكر هاد الشي..
بس بعدا كنت قول..
شو فرقي عن الكل اذا تعبت و تراجعت بنص الطريق⁉️

اذا شهادة البكالوريا تعبت و تخليت عنا وعن اني حقق مرتبة فيها كيف بدي كون دكتورة؟ كيف لأساعد الناس؟
بنص العملية بتعب بترك و بمشي؟؟؟

حطيت ببالي انو مافي استسلام و تراجع مهما كلفني هالقرار تعب و سهر و جهد حتى لو كان أضعاف مضاعفة..
قررت ما اقبل اني كون من ضمن الأوائل.. لازم كون انا الأولى..
لازم اسمي يحقق شي.. لازم ينحفر بعقول الناس..
كنت اتخيل أساتذتي عم يحكوا للطلاب السنين الجاي عني متل ما كانوا يحكولنا ع اللي قبلنا.. هاد كان حافز كتير كبير إلي..♥️

و دائماً بنص العتمة بتلاقي لمعة أمل بتنسيك التعب و بتخليك تستجمع قواك و ترجع أقوى..
هاد جزء صغير من القصص اللي عشتا خلال هي السنة اللي عنجد كانت نقلة نوعية بحياتي…
و اليوم الحمدلله الحمدلله شفت النتيجة..
شفت فرحة ماما وبابا و لهفة أخواتي و فخر أساتذتي..🙏✌️

قد ماكتبت و حكيت مستحيل اني أوصل احساسي..
كنت بانتظار هي اللحظة سنة كاملة!!

و حتى أكتر .. سنة كاملة وانا كل ماحط راسي ع المخدة بعد نهار دراسة طويل و متعب اتخيل الهدوء و الترقب.. صوت عم يقول:
الأولى ع الجمهورية العربية السورية.. بالمجموع التام.. 2900 من 2900
العالم تصفق.. وانا طالعة ع المنصة.. و قلبي عم يدق..

بعدا يسلموني الشعلة.. احملها و أوقف أدام الكل..
كأني حاملة قلبي على ايدي.. حلم كنت نام وفيق و شوفو ادام عيوني..
كل ما اتعب شوف حالي واقفة بعيد و حاملة الشعلة بايدي..
وهاد الشي كان يخليني إرجع ادرس أكتر من قبل..
كان يعطيني الحافز لأني ارجع كمل الطريق..
كنت حس انو مافي شي رح يبعدني عن حلمي..
والحمدلله وصلت.. بعد تعب كتيير كبير..

كنت كتير أوقات قول خلص ماعاد اقدر جمع المجموع اللي بحلم فيه.. بس كنت قول لا رح جمع..
و اساتذتي كانوا يحسسوني إني رح وصل..
لهلئ ما بنسى كيف كانوا يقلولي يلا بدك تطلعي الأولى على حلب..
واليوم ألف الحمدلله.. طلعت الأولى على كل سوريا مو بس ع حلب..
و كنت قد ثقة أهلي و اساتذتي فيني..
بحمد الله انو كنت قد المسؤولية لأنو تعبتو معي كتير..
و انا وصلت لهون بفضل الله و توفيقه و بفضلكن و لولاكن ماكنت حققت شي..

(هاد الحكي كتبتو بتاريخ 25/1/2021 الساعة وحدة بالليل كنت قاعدة عم ادرس ع ضو الليدات..
بعدا من ضغط الدراسة و التعب قررت ماكمل وقوم نام…
بعدا صفنت شوي و تخيلت حالي نجحت و سكرت المجموع و بلشت أحاول أوصف حالتي بهديك اللحظة اللي كانت بالنسبة إلي (((حلم)))
كنت بعرف حالي وين رايحة و واثقة من هاد الشي..
برد و عتمة وتعب.. بس ولاشي قدر يبعدني عن حلمي..
و لا شي حتى رح يقدر يوقفني عن إني كمل الطريق..
اللي بدي قولوا انو الطموح بيحطم كل العوائق..
واللي عندو حلم بعمرو ما بيعرف شي اسمو مستحيل)

سنا محمد فاضل ❤️
من سماعة حكيم مبروك لسنا ولكل المتفوقين ولكل اللي حققوا أحلامن ♥️🙏

(سماعة حكيم)