بحـس بالأشيا بعمـق أحياناً ببكـي وأوقات ببين حدا ها

بحـس بالأشيا بعمـق …

أحياناً ببكـي ..
وأوقات ببين حدا هادي من برا بس جواتي عاطفة ما بتهدى !

يمكن انت ما تعرف هالشي… لأنو عادةً مشاعري أكبر من إني اشاركها بشكل كامل
بالنتيجة؛ بيتهيألك اني بارد أو لا مبالي.. بينما بالحقيقة بكون عم حاول اتحكم بحالي و احمي حواسي العالية الحساسية

أيام كنت بالمدرسة ؛
كان الاستاذ يكتب عني بالملاحظات ” طالب خجول “.

أوقات بنسحب من أشغالي ؛ بلجأ للتخت أو غرفة مضلمة .. شي مكان حس فيه بالخصوصية و الراحة .

بنتبه لأصغر التفاصيل واللي ممكن بقية الناس ما يشوفوها، بلاحظ التغيرات الصغيرة بمزاج الأشخاص.
أحياناً هالقدرة بتساعدني عالتواصل معن بشكل أفضل، لكن بأوقات تانية.. بكون من المتعب انو تكون شديد الوعي بكل اللي حواليك

كل هدول بخلونا بسهولة نحس بإنهـاك نفسـي ؛ لهيك منحتاج لأوقات راحة أكتر من غيرنا .

صح انو الأشيا الصغيرة بتضغط علينا.. و ممكن نبكي بسهولة، و منحس بألم جسدي و عاطفي كبيـر ؛ بس هاد ما بيعني إننا ما بنقدر نكون واثقين و مسؤولين عن حياتنا

نحن مبدعين ، فنانين ، معالجين … 💙
قادرين نعمل فرق بالعالم بالرغم من العقبات اللي بنواجها

🚩 حديثنا اليـوم عن الشـخص عالـي الحساسيـة HSP

Highly Sensitive Person

هو مصطلح صاغته الدكتورة (Elaine Aron) المختصة بعلم النَفس السريري .

وفقاً لنظرية آرون ، يعد HSP مجموعة من الناس اللي بيتمتعوا بدرجة عالية من سمة شخصية تُعرف ب “حساسية المعالجة الحسية” Sensory-processing sensitivity ،

هدول الأشخاص عندن حساسية عاطفية مرتفعة ؛ تفاعلية أقوى للمنبهات الخارجية و الداخلية متل الألم ، الأدوية ، الجوع ، الضوء ، الضجة ، درجة الحرارة، الكافيين.. و حياة داخلية معقدة.

يُعتقد انو قرابة 15 – 20% من الناس هن عاليي الحساسية.

و تبعـاً لمفهوم آرون … هو ليس اضطراب عقلي ، إنما يُعرف كغيرو من جوانب الشخصية باعتبارو سمة طبيعية موجودة عند كل شخص بـ درجات متفاوتة.

هالأشخاص بينزعجوا أكتر من غيرن من العنف ، التوتر ، أو احساس الإغراق ؛ لهيك .. ممكن يبذلوا جهدن لــ يتجنبوا المواقف اللي مُحتمل يصير فيا متل هالأمور .

من ناحية إيجابية ؛ يُعتقد انو الحساسية العالية مرتبطة بمستويات أعلى من الإبداع و الموهبة و التعاطف، علاقات شخصية أغنى و تقدير أكبر للجمال (ما بنستغرب وجودها عند فنانين و شعراء) .

بيملكوا نمط فريد من الذكاء، و ربما القدرة ع إيجاد حلول خلّاقة، لكن ممكن ما يجيدوا السرعة باتخاذ القرارات .

هالسمة بتعكس نوع معين من استراتيجية البقاء على قيد الحياة .

⛔ هل أنت شخص عالي الحساسية ⁉️
إذا كنت بتتفاعل بقوة مع النقد، بتصير مُفرط التنبّه جسدياً و عاطفياً بسهولة أكتر من الآخرين ؛ ربما تحصل ع درجة عالية بال sensory-processing sensitivity .

و ممكن تحس انو عندك قدرة أعلى عالتعاطف و حساس جداً لمزاج الآخرين .

⛔ شو السبب بـ إنك شخص عالي الحساسية ⁉️

يُعتقد انو الحساسية العالية الها جذور جينية ،
ولكن .. بيئة الطفولة المبكرة كمان بتلعب دور، الأدلة بتشير الى أنو التجارب المبكرة اللي مرقنا فيها ممكن يكون الها تأثير ع الجينات المرتبطة بالحساسية

في أسباب بيولوجية لمكونات هالسمة ،
الجهاز العصبي لهالأشخاص حساس للغاية مع عتبة أقل للعمل، هالاستثارة المفرطة بتساهم بزيادة التفاعل العاطفي،
و عتبة أقل للمعلومات الحسية ( متل الانزعاج من الاضاءة القوية) .

بتتداخل المناطق المرتبطة بهالسمة بشكل كبير مع مناطق الدماغ اللي بتدعم التعاطف ،
بكون في فرط نشاط بـ الجزيرة Insula (هي جزء بالدماغ بيدمج المعرفة اللحظية للحالات الداخلية و العواطف، وضعية الجسم ، و الأحداث الخارجية) ؛ هالشي بفسر وعيهن المتزايد بحالاتن العاطفية الداخلية و أحاسيسن الجسدية .

بعض الدراسات، كانت بتثبت أن الحساسية العالية بترجع لاختلافات بـ الناقلات العصبية ( الدوبامين ).

أدمغة هالأشخاص بتعمل بشكل مختلف قليلاً عن البقية .

و في بعض الأدلة على انو هالسمة مرتبطة بجين 5-HTLPR المتورط بعدة حالات نفسية ( متل الاكتئاب ) !

✅ انك تكون شخص عالي الحساسية
يعني بتواجهك العديد من التحديات ؛ ممكن تلاقي صعوبة بالتكيّف مع الظروف الجديدة ، تظهر استجابة عاطفية مو مناسبة بـ المواقف الاجتماعية، عندك خطر أعلى للإصابة بالاكتئاب و متلازمة الاحتراق النفسي Burnout .

من جهة تانية، قادر تعمل روابط عميقة مع الآخرين، عندك أحلام مثيرة و مونولوج داخلي، و بتلاقي متعة عظيمة بــ الفن و الموسيقا و التواصل البشري. 💙

بترتبط الحساسية العالية ب الوعي الشديد بالأبعاد الخفيّة .
العديد من هالأشخاص قادرين يربطوا بين الأفكار والحقائق بشكل حدسي أكتر من غيرهن ( بس طبعاً هالحدس مانو معصوم عن الخطأ ).

✅ مافي علاج معين للحساسية العالية .
طبعاً بيتم تصوره گ سمة شخصية.. مانو اضطراب، مع هيك.. كونو بيرافقها تحديات عاطفية و شخصية و ممكن يصير في قلق واكتئاب .. لهيك هالأشخاص بشوفو ” المعالجة بالكلام ” مفيدة لصحتن ككل

التحدّث مع صديق او مُعالج بفيد بالحالات العاطفية الموترة.

بحال كنت بتعرف شخص عالي الحساسية؛ من المهم تتقبل حقيقة انو هالشي جزء منو.. من غير المحتمل يتغير .
منح الشخص مساحة لإزالة الضغوطات .. و تشجيع الاهتمام بالذات.. البحث عن نقاط القوة المتأصلة بحساسيته.. هالأشيا بتساعد بنجاح العلاقة و الشخص.

تنـويه ~ الحساسية العالية مو نفسها الانطوائية ؛
لكن كتير من الاشخاص الحساسين يُعرفوا گ انطوائيين .

الانطوائية هي سمة شخصية … بقوم الشخص بإعادة شحن طاقته من خلال كونه وحيد ، بينما الحساسية العالية بتشمل الحساسية العاطفية والجسدية والحسية.

بالرغم من انو الحساسية العالية بتتداخل اكتر من غيرها مع الانطواء ؛ إلّا انو جزء من أفرادها منفتحين ( لكن ما زال البعض بينظروا الن ع انن خجولين ).

✅ ملخص جوانب الحساسية العالية :
التنبيه المُفرط ، الحساسية للتفاصيل الصغيرة ، عمق المعالجة (التفكير بعناية جداً) ، الاستجابة العاطفية / التعاطف.

⚠️• الحساسية اتجاه الـذات :

غالباً بيواجه صعوبة بالتخلي عن العواطف والأفكار السلبية، كترة الشعور بأعراض جسدية متل الصداع لما بيصير شي سيء خلال اليوم .

غالباً بعاني من التوتر أو القلق ، و بيمر بأيام سيئة بتأثر سلباً بعادات الأكل والنوم، متل قلة النوم أو الاكل أو الإفراط فيهن

بيقارن حالو مع الناس (جسدياً، اجتماعياً ، مادياً ، عمل، .. )، و بيحس بمشاعر تعيسة من المقارنة السلبية .

⚠️• الحساسية اتجاه الآخريـن :

غالباً بيقلق بخصوص اعتقادات الناس عنو ، بميل لأخد الأمور على محمل شخصي ، و بينجرح بسهولة.

غالباً بيخفي المشاعر السلبية؛ بيعتقد انها كتير قوية أو هائجة أو مُحرجة، ف بخبيها جواتو .

بواجه صعوبة بتقبّل ردود الفعل النقدية ؛ حتى لمّا عم يكون تقديم النقد بشكل معقول و بنّاء .

غالباً بيحس انو الناس بتصدر أحكام عليه ( ولو ما كان في دليل قوي عهالشي ).

غالباً ببالغ بــ رد الفعل على الإهانات والاستفزازات الحقيقية ، بيحس بالإحراج بالمواقف الجماعية و إنه غير قادر عالتصرف على طبيعته .

بيحس بالمواقف الحميمة عاطفياً، بينصاب بالقلق بشكل مبالغ حول إرضاء الشريك .. و الخوف من التعرّض للرفض .

⚠️• الحساسية اتجاه البيئـة المحيطة:

ما بكون مرتاح بالتجمعات العامة الكبيرة ، أو بمكان مليان ناس عم يحكوا، أو لمّا تصير شغلات كتيرة بوقت واحد .

عدم الارتياح وقت يتعرّض لأضواء ساطعة أو أصوات صاخبة أو بعض الروايح القوية، و بيجفل بسهولة لما يتعرضلا فجأة.

غالباً بيحس بالضيق وقت يقرا او يشوف أخبار سلبية بوسائل الإعلام، بيكره الترفيه الصادم (متل العروض و الأفلام العنيفة او المخيفة كتير) .

غالباً بيشعر بعدم الرضا عند متابعة منشورات الاشخاص على وسائل التواصل الاجتماعي

تنـويه ~ بعض الأفراد ممكن يكون عندن تنين (2) فقط من المذكورين بالأعلى، بينما البعض الآخر بيتأثروا بكتير أشيا ..

📛 نصـائـح :

قلة النوم بتعمل تقلّب مزاج و انخفاض تركيز عند الشخص العادي .. فما بالك العالي الحساسية ؛ بالتالي (7 – 9) ساعات نوم هي ضرورة لتهدئة حواسك و بتساعد عالتأقلم مع العالم المرهِق .

استرخي لحالك بمكان هادي و نظّم وقت أشغالك بحيث ما تنعجق، قلل من استهلاك الكافيين .

لتتجنب الزحمة و الضجة المرتبطة فيا؛ ممكن تعيش حياتك خارج الجدول الزمني للشخص العادي ( تتسوق مستلزماتك المسا مثلاً ).

بالنهايـة …

الفهم و تقبّل الذات ضروريين للتغلّب عالعقبات، منحتاج نتعلم كيف نقدّر حساسيتنا و نشوف القوة والإيجابية الكامنة فيها..
و حلاوة قدرتنا الكبيرة عالتعاطف مع الغير . 💙

بالنسبة للناس المحيطة فينا .. بنحكيلن :

” الحساسية العالية مانها اختيار ”
متلما زعلنا بكون كبير.. كمان فرحتنا و محبتنا كتير عظيمة.
نحن بحاجة تفهموا شخصيتنا … ما تستهزءوا بشعورنا 💙

تبقـوا بخيـر و سـلام 💙

مـيددوز الشخص عالي الحساسية

(ميددوز)