بعرف أنك كنت عم تحاول تناجي روحي بمسكتك الحنونة هي بس في شي مو طبيعي عم يصير معي

بعرف أنك كنت عم تحاول تناجي روحي بمسكتك الحنونة هي بس في شي مو طبيعي عم يصير معي .. أنا حزينة قلقانة معصبة ويأسانة والغريب رغم جمال وجهك الصغير يا ملاكي أنا ما فيي عم حبك ولا حب حالي ولا فيي عم أهتم فيك أو بحالي 💔

سألت تيتا وبابا عن حالتي وقالولي عادي كلشي صايبني طبيعي وبصيب كل الولدانات جديد واسم حالتي كآبة نفاسية ووعدوني أنو خلال كم أسبوع بتروح بس القصة طولت والمشاعر اشتدت .. هلق أنا ما فيي عم نام رغم أني مرهقة وتعبانة ، ما عندي شهية لأكل ، عم أبكي طول الوقت بدون سبب ، بحس جواتي كتير آلام ما بعرف سببها ، ما عم أقدر ركز وعم أنسى كتير ، بكون عم رضعك فجأة بزتك من أيدي وبقعد عيط وأبكي وأتوتر وكلشي عم يصير معي خارج عن سيطرتي حرفياً يا ماما 💔

كل ما اجت ستك لعنا أو عماتك أو خالاتك بسمعوني كلام ليش ما عم أهتم فيك وليش هيك عم ساوي ما حدا عم يفهمني أنو هالشي عم يكون غصب عني .. عم أهرب من وجه الكل حتى من وجه حالي وعم حس بالذنب وبأني أم سيئة ما بستاهلك أو أنك لعنة حلّت عليي يمكن .. وقت صارت أفكاري تروح لتأذيك وتأذيني وقفت وقلت خلص صار الوقت لشوف طبيب نفسي لأنو مستحيل هالشي يكون طبيعي مستحيل !

ما كذبت خبر توجهت لعند طبيب نفسي وهنيك فهمت حالتي وتأكدت أني بحبك كتير بحبك واللي كان صاير معي اضطراب نفسي اسمو اكتئاب ما بعد الولادة قلي الدكتور أنو نسبة هالاضطراب 15٪ مقارنة بالكآبة النفاسية يلي حكولي عنها هي بتصيب 80٪ من الأمهات .. خبرني الدكتور أنو هالاضطراب بصيب أكتر شي الأمهات يلي جايبين أول ولد أو ولدانين قبل أوانهن .

صدمتي كانت كبيرة وقت خبرني عن خطورة هالاضطراب وعن قساوتو وكيف كان ممكن يأذيني ويأذيك يا حبيبي ويوديني عالانتحار لولا العلاج 💔

العلاج يا حبيبي حسب الحالة إما أدوية أو علاج نفسي سلوكي أو التنين سوا وعحالتي أنا قرر الدكتور العلاج الدوائي ووصفلي دوا يناسبني حتى وأنا عم رضعك وفائلني أني ورغم طول مدة العلاج بس رح أتعافى وأرجع حس فيك وبجمال جيتك ووجودك بيناتنا يا نور عيوني ❤️

ما في سبب محدد لهالاضطراب بس في عوامل مساعدة على حدوثو منها التغيرات الهرمونية يلي بتصير بعد الحمل ، الشدات العاطفية ، والظروف المحيطة الصعبة لهيك كان مهم استغل تجربتي لخبر كل يلي عم يسمعني أنو الأم وقت عم تحمل بتكون تحت ضغوط كتير كبيرة تغيرات جسدية ونفسية وعاطفية ومن كل النواحي وفوق هاد وقت بتولد بتزيد عليها المسؤوليات والخوف وتنقير الحكي .. الأم بهالوقت بحاجة لطاقة دعم كبيرة ولحب كبير ولتحمل وصبر من وسطها ..

خبروها أنها عظيمة حتى عم يخلق الله الروح من رحمها ❤️
خبروها أنها مقاومة صبورة وحلوة وأنو قوتها وحنيتها وحبها هنن السبب لتوكلت الها أصعب المهام نحنا منقدرها ومندعمها ومنخفف عنها ومنساعدها بكلشي منقدر عليه ❤️

خبروها أنو الجنة خلقت تحت قدميها وأنو نحنا ما كنا ولا صرنا لولاها ❤️

حب كبير لقلوب كل الأمهات 🙏🏻

كنت معكم سَماح صالح محمد ♥️

المصدر بالتعليقات

كان يا مكان الطب 💙