بقي 4 شهور على اللقاء يعني قرّب الموعد والشوق اكتمل يا حبيبي

🤰بقي 4 شهور على اللقاء يعني قرّب الموعد والشوق اكتمل يا حبيبي ❤️
الشهر الخامس من الانتظار ، الشهر يلي صرت فيه أنتَ قد الموزة 😂🥰 وهلق صرت بتعرف تتاوب وقت تنعس ، تغمز المشيمة لتعطيك أكل أكتر 🤣 وتمص إصبعتك وتلف فيها رحمي كلو وفوق كل هاد تتفاعل معي وأنا عم خبرك هلق ..

🤰 مو بس بطني زاد حجمو !
حتى طول شعري وأضافيري يعني أنت عم تزيدني جمالاً بس للجمال ضريبة ولحبك كمان .. ضهري عم يوجعني وراسي كمان ، حرقة بمعدتي ، إمساك ، دوالي ودوخة ويلي بدك ياه المهم أنت منيح فداك ❤️

🤰 ونسيت قلك شهيتي زادت كمان ومطلوب مني زدلك الأكلات بس أكلات محددة لا برغر ولا بروستد يا حبيبي قال الوجبات السريعة بدنا نقلل منها ونركز عالخضرا الفواكه الجاج وكلشي ما فيه دهون ، مكسرات وجبنة وحليب بس كمان خالي من الدسم 😪

🤰 بهالشهر يمكن حس أكتر بحركتك حسب وينك أنتَ يعني نفس فكرة الأشهر السابقة ممكن تكون عم تخبط لتشبع بس أنا لا حاسة ولا دريانة 😂 وبهالشهر لو ما حددنا جنسك منحددو بس ممكن ها تلعب معنا وتطلعلنا حضرتك من ورا فما نشوف شي 🙂🌚

🤰 بما أني كنت تنبل قبل ما أحمل فيك يا ماما فما فيي اعمل رياضة متل ما لازم بس قلي الدكتور مسموح المشي ، الركض ، اليوغا ، السباحة ، تمديد الساقين يمين شمال ورفع الأوزان الخفيفة متل بوطك الحلو يلي اشتريتلك ياه مبارح 🤭

لو بدخل عرحمي من جوا بتكون هلق أنت بلشت تفيق وتصحصح وتلعب وتخبط ما أنا بدي نام فواجب تفيق تزعجني يا باشا 🥲 وهلق الرب حاميك من تأثير السائل الأمنيوسي عليك بطبقة دهان بيضا وفي زغب كمان شعرات صغرورات 🥺😍 دخيلو الأبيض الحلو أنا ♥️

كون منيح ماما ♥️

كنت معكم سَماح صالح محمد ♥️

(سماعة حكيم)