بما إنو أغلب الأطفال الي عم يراجعوا العيادة حاليا عم يعانوا

بما إنو أغلب الأطفال الي عم يراجعوا العيادة حاليا عم يعانوا من الحمى و الحرارة فحبيت ذكر الامهات الغالييات بأهم التوصيات للتعامل مع الطفل الي عندو حرارة 🌷 وخاصة الي عانوا من موضوع الاختلاج الحروري 😔

وبتمنى منكن تلتزموا فيها:

🌸 ميزان الحرارة ..ضروري جدا يتواجد بالبيت .. قياس الحرارة بتم عن طريق الميزان ابدا مو عن طريق اللمس
🌸الحرارة فوق ال 40 ايدين الطفل ورجليه رح يصيرو باردين .. رح يتعرق كمان وتفكريه بارد رغم انو الحرارة عالية

🤚فالتوصية الاولى هي قياس الحرارة

🌸ارتفاع الحرارة بحد ذاتو ما بسبب اختلاج.. ارتفاع الحرارة السريع هوي الي بسبب اختلاج .. وهوي رد فعل الجهاز العصبي عالحرارة العالية الي ما قدر يتكيف معها
🌸لهيك لا تعطي خافض الحرارة وتتفرجي عالولد.. قيسي الحرارة بعد الخافض كل نص ساعة

🤚فالتوصية الثانية اعادة قياس الحرارة بعد الخافض

🌸 خافض الحرارة لوحدو غير كافي.. لازم تعملي كمادات او مغاطس
🌸الأماكن الصحيحة لوضع الكمادة هي تحت الابطين والركبتين .. او المغطس بماء دافي بدرجة حرارة تقريبا ٣٥ ومو بماء بارد
🌸 مو مقبول تجيبي الولد عالمشفى مختلج وحرارتو فوق ال ٤٠ وملبستيه ٣ بجامات..🙄
🌸شلحيه الاواعي وقت ترتفع الحرارة .. ساعدي الجسم عتخفيض الحرارة ..مو تزيديها

🤚فالتوصية الثالثة خلع الثياب والكمادات والمغاطس

🌸 خافض الحرارة لوحدو غير كافي ..لازم نعالج السبب الي رفع الحرارة
🌸فرجاء كل ام ابنها عانى من حرارة عالية خاصة اكثر من 38.5 أو عندو سوابق اختلاج حروري .. تراجع اقرب طبيب لتشخيص سبب الحرارة والبدء بالعلاج المناسب

🤚فالتوصية الرابعة علاج سبب ارتفاع الحرارة

🦋بتمنى منكن تلتزمو بهي التوصيات ليضلو أطفالكن بخير🦋

مع محبتي ❤
د سهير الحسين ❤❤

(سماعة حكيم)