هي فقرة جديدة عم ننقلكن ياها من غروب الاقتصاد الرسمي للطلاب المستجدين ( فريق سنافر الاقتصاد 2019 – 2023) لطلاب من كافة السنوات ليحكولكن تجربتهن مع كلية الاقتصاد
نقلا عن تجربة الطالبة الاولى تالا شوكان 😍
أولاً حابة أبدا بجملة “وعسى أن تكرهوا شيئاً وهو خيراً لكم” ❤️
انا متلي متل أية طالب كان عندو أحلام كتير انكسرت عند أول مفاضلة …
بدايةً الأهل ألن تأثير كبير ع اختياراتنا وطموحنا بالحياة ، أمي طبيبة أسنان ومن الصغر حلمي صير متل ماما … وهالحلم كبر معي ، و ميولي كانت دائماً لعلم الأحياء والكيميا وبكره جداااااا الرياضيات ، وبالفعل وقت المفاضلة ما قدرت ادخل الفرع يلي بدي فكان خياري التاني هو “طبيبة تغذية” يلي اكتشفت بوقتا أنو مالو موجود عنا بالشام أساساً💔
هون كان الخيار الأخير هوي الاقتصاد “لأنو مستقبلا منيح” ولأنو “يلا اتحمليلك 4 سنين دراسة كرمال تصيري شي مهم” !!
وهكذا فتت عالاقتصاد طبعاً هاد الحكي ماكان مشجع أبداً وهاد السبب خلاني اكره الفرع وضل سنة ونص بالبيت وما بعرف الجامعة إلا ايام الفحص علماً اني رفعت مواد السنة الأولى ع التكميلي “لحالي” ، وبالسنة التانية بالصدفة اتعرفت ع شخص وأنا عم اشتري المحاضرات من مكتبة الجامعة “بيت العباقرة” بوقتنا انصدم من كمية المواد يلي كنت حاملتا واقترح عليي اني سجّل بكورس “أنتي لازم تحبي الشي يلي عم تدرسيه كرمال تبدعي فيه”👌
وفعلاً تعرفت ع موادي يلي كنت اخدة عنها افكار غلط وعم عارك فيها لحالي وشايفتا طلاسم …
اتعرفت ع اهم الاشخاص بحياتي حالياً ..والأهم أنو لقيت حالي هون …
وبالسنة التانية بمتل هالايام كنت أنا مفتتحة الفعالية يلي صارت بمسرح كلية الاقتصاد وكنت المتحدثة يلي قدمت عميد الكلية ورئيس الهيئة الإدارية ..
باللحظة يلي كنت واقفة فيا عالمسرح وعم خاطب مئات الطلاب قدامي حسيت بأحساس ما فيي اوصفو بس أنا أكيدة أنو كل حدا فيكن حيحسو وحيعرف أنو هون البداية ❤️
وبالختام بحب قول ” الله دايما بيختارنا الشي الخير النا لأنو هوي الأدرى فينا وبسخرلنا ناس تكون معنا”
ما كنت حلاقي حالي بمجال تاني ….عالمي هاد رغم أني ما كنت بعرف هاد الشي….
اخيراً شكرا لهاد الإنسان يلي عرفني ع كليتي وطبعا الحمد لله ع كل حال 😍
تالا شوكان
Tala Shawkan
