تجربتي مع المرض النفسي صباح الخير انا الدكتور أنور الجزاع

تجربتي مع المرض النفسي
صباح الخير 🌸
انا الدكتور أنور الجزاع .. خريج الجامعة السورية الخاصة .. ترتيبي بالجامعة الاول على دفعة 2020 .. وترتيبي بلوطني الاول على الجامعات الخاصة و الرابع على مستوى القطر ..
اليوم رح احكي تجربتي مع المرض النفسي بل بلاحرى مع ٣ امراض نفسية 😎 …
بشكل عام انا انسان اجتماعي و رفقاتي كانوا يسموني الكمبيوتر لأن عندي قدرة وفق بين حياتي الاجتماعية و دراستي بشكل ممتاز بل لا يُصدق ودائماً كنت اطلع من الاوائل على الكلية ..
حابب احكي اليوم عن تجربتي مع المرض النفسي مشان تتصحح بعض المفاهيم الخاطئة حول المرض النفسي ..
رح ابدأ بالوضع المادي … وضعي المادي الحمدلله ممتاز وكلشي متوفرلي من انا وصغير وبهيك المرض النفسي ما اله علاقة بالوضع المادي …
اهلي كتير بحبوني ودائماً واقفين جنبي و بحياتهن ما ضربوني او اسائولي بكلمة وكانوا بعتمدو بتربيتي عالتوجيه والنقاش و النصيحة وعندن ثقة فيني وبذلك مو ضروري المريض النفسي يكون متعرض لعنف او ما شابه من قبل اهله …

▪️وهلق رح بلش بالقصة :
جمعت بالباكالوريا 227 من 240 و دخلت كلية الطب عن رغبة و شغف ما انطفى لحد الأن .. درست اول ٣ سنين و الفصل الاول من السنة الرابعة بشكل عادي متلي متل غيري وكنت مبدع كتير بدراستي واقرأ من مراجع كبيرة و اربط المواد ببعض … و حضرت خلالن للSTEP 1 بشكل موازي لمقررات الجامعة وعلاماتي كانت شبه تامي …
بالفصل التاني بالسنة الرابعة صار معي بوقت الفحوصة التهاب كبد A و فينا نقول صاعق لأن غبت عن الوعي خلاله ليوم او ساعات … ما قدرت قدم فحوصتي بحكم المرض بس ما كنت مفكر بلفحوصة ابداً و للصراحة مابعرف شو صار معي بالضبط بس بذكر لما شفيت كنت عم شوف جو جاييني عالوتس ولقيت رسالة من نائب العميد مكتوب فيها : خير شو صاير معك طمني عنك .. خفت كتير ورحت للجامعة وراح معي رفيقي علاء وهو بيعرف بكلشي من اهلي قلي نائب العميد ليش ما قدمت فحوصتك وانت بتعرف انه مافي تكميلي هون ما بعرف شو صار بس تعرضت لرض نفسي وماعاد اعرف اربط الافكار ببعض … رجعني رفيقي علاء عالبيت و لاحظوا اهلي انو انفصلت عن الواقع وصرت احكي جمل غريبة و كلمات مو مترابطة يعني كأن جنيت او جنيت فعلاً … في ناس عرفوا بوضعي وقالوا مستحيل كل هالمصايب تصير بنفس الشخص اكيد صايبتو عين او مسحور خدوه ع شيوخ … امي ما رضيت واخدتني فوراً عدكتور نفسي وقال ابنكم صاير معه ذهان وانا ما فقدت البصيرة و بعرف انه فيني شي غلط و رضيت اخد الدواء … صدقاً الم المرض النفسي اصعب بكتير من الالم الجسدي … ومن اول حبة وبعدها بساعتين تحسنت شي متل السحر بس مو ١٠٠٪؜ يعني ما رجعت انور القديم … المهم بعدها باسبوعين تلاتة بلش دوام السنة الخامسة و هون صارت الكارثة الدواء كتير تقيل كنت نام كتير وحس راسي تقيل ودايخ ورجلييي يا دوب يحملوني … سجلي رفيقي علاء بالجامعة واستأجرت بيت بجنبه وصار هو يجي كل يوم ياخدني للدوام بالمشفى والجامعة ويرجعني عالبيت ما كان حدا بيعرف باقصة غير رفقاتي جونة و علاء وحنان ونعمت وهتون وكتير دعموني وشجعوني … خلال فترة المذاكرات تعرضت للنزق (عدم القدرة على الجلوس لفترة ولو دقايق وهو فينا نعتبره كعرض جانبي للدواء ) وهاد تاني مرض راجعت الدكتور وعطاني الدكتور مضاد قلق … الدراسة كانت كتييير صعبة ودرس معي علاء لأن كنت نام عالمحاضرات لوحدي وجبت بالمذاكرات بحدود ٨/١٠ وهي اول مرا بجيب علامات مو تامة او شبه تامة بس بذلت جهد كتير كبير ما بيتناسب مع العلامات وهون صابني المرض التالت الاكتئاب صارت نظرتي للحياة تشاؤمية وراجعت الدكتور وكتبلي مضاد اكتئاب …
بالمشفى وقت الستاجات ما كان فيني وقف لأن صدقاً الدواء كان تقيل كتير علييي ولو ما دعموني رفقاتي ما كنت قدرت جرب مجرد تجربة انه كمل دراسة و دوام .. كانوا معي باصغر التفاصيل لدرجة انهن كانوا حتى المحاضرات يشترولياها ويجيبوها لبيتي …
خلصت السنة الخامسة وكانت اصعب سنة بحياتي وترتيبي طلع السادس علكلية … زعلت ووقت راجعت الدكتور وهو استاذ بكلية الطب .. قلي انه صح طلعت السادس بس انا بعتبر الاول عالسوريا لأن مر عليه خلال حياته مئات طلاب الطب يلي صار معهن ذهان وانا احسن استجابة واغلبهن ما كملوا دراستهن … وقلي انه الدواء يلي عم اخده بخلي القدرات والملكات الفكرية تتراجع ١٠٪؜ بشكل مباشر و التاثيرات الجانبية للدواء من نعاس وغيرها بتنزلها ١٠٪؜ عدا عن المرض بحد ذاته وقلي يعني ازا جبت بحدود ال٧٥٪؜ كأن جايب ١٠٠٠٪؜ وانذاري ممتاز ولو كنت باوروبا كانو خلوني وقف الدراسة علاقل سنة لأن مريض الذهان بحاجة راحة …
رافقتني الادوية خلال السنة السادسة كمان والي درست خلالها بلاضافة للوطني اربع مستويات لغة المانية ..
قدمت الوطني وجبت ٨٦٪؜ وطلعت الرابع عسوريا .. الحمدلله فرحت بس حزت بنفسي انه لو مو صاير معي هالقصة كنت جبت اعلى بكتير …
بحب قول لكل مريض نفسي لا تنسى انه :
وما نيل المطالب بالتمني وانما تؤخذ الدنيا غلابا ♥️🌸..
مبارح راجعت الدكتور للمرا الاخيرة بعد ٣ سنين معالجة ووقفلي كل الادوية وحددلي انذار ال٣ امراض وقلي احتمال النكس عندي متل احتمال نسبة الاصابة فيه عند شخص طبيعي … بمعنى اخر شفيت ١٠٠٪؜ وقدرت اتغلب عالمرض تماماً ..
بحب اشكر اهلي و رفقاتي خصوصا :
(علاء الحلبي – ناجي جديع – جونة الزعيم – حنان دالاتي – نعمت القحف ) …
– يمكن حظي حلو لأن بلاضافة لارادتي يلي وصفها الدكتور انها كتير قوية توفرتلي ظروف مثالية للعلاج وكنت وسط بيئة واعية ومساعدة لاقصى الحدود …
الحمدلله حالياً كتير مبسوط بس بنفس الوقت زعلان كتير عمئات الطلاب يلي حكالي عنن الدكتور وقال اغلبن ما كملوا دراستهن ..
اخيراً وليس اخراً بحب اكد انه المرض النفسي موجود وكتير صعب والمه اكبر من الم السرطان .. الافكار وزحمتها وطريقة التفكير فيها كتيييير مخيفة لدرجة انه كنت سكر اذاني مشان الاصوات تروح واقدر نام وما كانت تروح ولا اقدر نام مع انه مرهق جداً .. لحد ما رحت للدكتور وتعالجت …
نصيحة لما تحسوا انو تفكيركن مضطرب او نفسيتكن تعبانة او حدا من عائلتكن تغير اسلوبه وشخصيته فجأة .. توجهوا فوراً لطبيب نفسي لأن فعلاً الطبيب النفسي متل الفانوس السحري بهيك الحالة والوحيد يلي بيقدر يساعد ..
اخيراً .. المرض النفسي مرض متله متل اي مرض .. صار لازم نغير طريقة تفكيرنا تجاهه بلنهاية هو اضطراب نواقل عصبية فقط لا اكثر مثله مثل قصور او فرط غدة ما بلجسم … مافي داعي لوصمة العار تجاه المريض ..
حبوا بعض وادعموا بعض ولو بكلمة .. صدقاً الكلمة مهمة جداً ولو بسيطة بتعمل فرق كبير … الكون تم خلقه بكلمة لا تستهينوا فيها ابداً
– بعتذر علاطالة و دمتم بخير وصحة نفسية افضل 💙💙💙

منقول عن الصديق الرائع د. أنور جزّاع
(ميددوز)