تحقيقات في مقتل مايكل جاكسون تعالوا نترك الطب شوي ونشتغل

تحقيقات في مقتل مايكل جاكسون 👩‍✈️

⚫️ تعالوا نترك الطب شوي ونشتغل كونان 😂 ونعرف كيف مات ملك البوب الشهير مايكل جاكسون..

⚫ هلأ أنتوا أكيد لا بدّ مرت عليكم أيام قلقتوا فيها وما قدرتوا تناموا شي من الامتحان شي من الضغوط الاقتصادية شي من الكراش شي من وضع البلد والحلم بالهجرة 😂 المهم ما نمتوا ووصلت فيكم الحالة لتفكروا تشوفوا دكتور وتاخدوا دوا ينيمكم.. صح؟

⚫ مايكل جاكسون المرحوم نفس الشي صار معو ما تحمل أنو يبقى بلا نوم فراح جاب دكتور لعندو وقلو بدي ياك تعطيني شي ينيمني بأي طريقة كانت.. اجا الدكتور قلو عد الخواريف بتنام 😂 ما نام الأخ.. قلو شراب لبن بتنام.. برضو ما نام الأخ.. قام قلو انتهت حلول الأرض الأمر متروك ل البروبوفول خدو بتنام ما أحلاك.. أخدو جاكسون وكيّف حس بالسكر بالنشوة ونام بس بعد ٥ دقايق رجع فاق يعني ما طولت نومتو للأسف 💔🥺

قام الأخ عجبتو نومتو وعجبو الدوا فرجع أخد جرعة عالية والدكتور مانو جنبو فمات 💔

رعبتكن؟

⚫ القصة حقيقية والتفسير العلمي موجود وبسيط.. مايكل جاكسون مات بسبب التثبيط التنفسي يلي صار بسبب أخدو لجرعة عالية من البروبوفول.

⚫ البروبوفول هوي عبارة عن مخدر وريدي اسمو المستعار بعالم التخدير حليب التخدير لأنو هالمخدر ما بدوب بالمي فبيجي بمحلول زيتي أبيض.. بيحتوي على دهون منقاة من صفار البيض فممكن وقت نعطيه لمرضى عندهم حساسية من البيض يتحسسوا لهيك طبيعي إذا سألك الدكتور بتتحسس من البيض؟ لا تستغرب.

هالمخدر فيه غليسرين لهيك بآلم جداً بس ينعطى بالحقن الوريدي لهيك نحنا منعطي معو مخدر موضعي.. ليدوكائين.. لحتى ما يتألم المريض.

⚫ البروبوفول بيعطي مفعول خلال دقيقة وبروح مفعولو خلال ٥ دقايق يعني ببلش بسرعة بيخلص بسرعة ولكن ومع هيك هوي لازم يتراقب لازم ولازم ولازم لأنو بيعمل تثبيط تنفسي وهاد يلي غفل عنو دكتورو لجاكسون فكان التمن روح المريض 🤷‍♀️

⚫ نحنا منستخدمو لنبدأ التخدير بالجراحات الكبيرة وحتى منستخدمو للمرضى يلي بيعملو تنظير قصبي أو هضمي ومنسربو بهالحالة تسريب من خلال مضخة بس العيارات هون دقيقة وبيبقى في مراقبة للمريض.. والمرضى بعد ما ياخدوه ما بحسوا بشي وبقلولك نمت أحلى نومة بحياتي 😂❤️

⚫ ممكن يعمل هالمخدر تثبيط قلبي كمان لذلك لا بد هوي مخدر بينعطى من قبل أطباء تخدير حصراً وبجرعات مضبوطة وبمراقبة صميمية من قبلن.. غلط مايكل جاكسون أو غلط طبيبو ما منعرف.. بس يلي منعرفو أنو طب التخدير مجال دقيق ومهم وما بيتقرب عليه ولا بينلعب فيه.

لهيك تحية كبيرة لكل أطباء التخدير وتحية قلبية مني الكم ❤️

كنت معكم سَماح صالح محمد ❤️

المصدر بالتعليقات

مرجع التخدير وطب الطوارئ في كلية الطب البشري في جامعة دمشق.