تشحورنا و طال الشحوار تبهدلنا بشحورتنا ما بعرف ليش أنتِ ب

👶🏻 تشحورنا و طال الشحوار تبهدلنا بشحورتنا 💃
ما بعرف ليش أنتِ بتشدي شعرك من حركاتي وأنا يلي بنّكش بس يلي بعرفو أنو ما في تفاهم بيناتنا يا ماما وشكلي لازم اعملك محاضرة لفهمك شو عم يصير 🧘

👶🏻 عمري 9 شهور وهاد العمر المثالي حتى أمسح الأرض بتيابي ما أنا هلق خبير دحبي يعني زحف 🤸 لذلك ضروري منك تدحبي معي لتعرفي لوين بوصل وتبعديه عن عقل كونان المكتشف القابع داخلي 😝
بهاد العمر كمان حركاتي بتكون خاطفة لذلك رح تنصدمي قريباً بأسرع حركة في العالم ” قبضة الكماشة في صحن البرغل ” بهدف تعباية الدنيا وسماع موسيقى عياطك ❤️

👶🏻 حلوين وجذابين هالخفافات الكيوت لكن أنا بهالعمر بحاجة قوي عضلات رجليي لهيك اتركيني خرب وانكش حافي القدمين 😂 وعهالسيرة انتبهي من مخارج الأدراج روح قلبي اطلع وأنزل ولو انكسر مخي 🥲

👶🏻 رح ثرثر وطقش حكي لا أنتِ رح تفهميه ولا أنا كمان 😃 بس ممكن مرق ماما دادا مرحبا ويطير عقلك فيهن وفيي 🤭
أنا هون بقرأ لغة الجسد وبفهم على حركاتك وبكون قاصدها وقت بجيب البطة وأفعس ببطنها لتغني وتضحكيلي أنتِ كتير مهم أنك تحسسيني بأني كوميدي شاطر ولو أني بكل جدبنة عدت نفس الحركة مليون مرة 😂🤦🏻‍♀️

👶🏻 لا طيور بيبي ولا براعم ولا أي شي بالعالم بخلي مخي يكبر أكتر من تواصلك أنتِ معي لهيك تركي كلشي وقرأيلي قصة حبنا وغنيلي أغاني منغنغة وعلى فكرة أنا هلق بفهم لو قلتيلي وينها الطابة دلك عليها ووينها البقرة أشرلك عالمعزة 😂 حسب كيف بتعلميني وقديه بتعطيني من وقتك يا جميل.

👶🏻 بهالعمر أنا بعاني من قلق الانفصال 😔 مو الانفصال العاطفي وإنما الانفصال الأمومي لهيك بتشوفيني جعيري عبى الحارة بس تفوتي أتوسة عالمطبخ وبس تتركيني مع الغربا بس مع هيك أنا هلق لساتني أجدب بنسى ليش عم أبكي بمجرد كم حركة تشتتني حلوين هدول ( تشيغي نيغي تشيغي نيغي بيبي ) مع أنو بحسكن مجانين بس بتضحكوا وهاد المطلوب 😂

👶🏻 ختاماً بحب خبرك أني عم أفهم ال لاء تبعك كتير منيح بس أنا عنيد وتنح وبحب اعملك أكشن والأهم من ذلك بدي أكتشف وحقي أكتشف 😌 لهيك نكتشف سوا أحسن ما توصل خناقاتنا للسما وقد أعذر من أنذر 🧘

وللمرة المليون بحبك ❤️ سامحينا 🌞

كنت معكم سَماح صالح محمد ♥️

(سماعة حكيم)