تيتة ، كيفك طمنيني عنكن؟! اهلييين حبيبتي ، الحمدالله

👩🏻‍💼مرحبا تيتة ، كيفك طمنيني عنكن؟!

👵🏻اهلييين حبيبتي ، الحمدالله … والله مبارح راح اخي لعند دكتور العيون وفحصلو عيونو ولو تسمعي شو قلو!

👩🏻‍💼خير خير شو قلو؟؟ شو طلع معو!

👵🏻والله قلو معك عشى ليلي 😂،
مع أنو اخي من زمان ما عاد تعشى بالليل😐
والله شكلو هالدكتور مو شاطر …قال عشى قال😏

👩🏻‍💼طولي بالك تيتة😂العشى الليلي عند الأطباء غير العشى الليلي يلي عم تحكي عنو😂

👵🏻ايييي حاجتك بقى شو بيختلف شو قصدو للدكتور يعني؟؟🤔

👩🏻‍💼على عيني رح اشرحلك ، العشى الليلي 🌌
هو أحد الأمراض يلي بتصيب العين، بحيث ما بيحسن المريض يشوف شي بالعتمة أو بالضو الخفيف، وبكون سببو الرئيسي هو خلل بشبكية العين👁
👵🏻يالطيف شو هالحكي! طيب دخيلك قليلي شو أسبابو؟؟
👩🏻‍💼في أكتر من سبب منهن:

1️⃣ قلة تناول الفيتامينات المهمة لصحة العين ويلي أهمها فيتامين🅰️
2️⃣تعرض العين لإصابة مُباشرة مثل حوادث السير🚑.
3️⃣الإصابة ببعض أمراض العين ومنها: المي البيضا وضغط العينين. 😑
4️⃣العوامل الوراثية👨‍👩‍👧‍👦

👵🏻ايوا ايوا كملي لشوف شو الأعراض؟؟

👩🏻‍💼 بتكون كالتالي:
-تحسس العينين🥺.
حكة والتهاب في العينين.
– تشوش الرؤية خصوصاً في المساء. 😵
-جفاف في العينين.
– ظهور بقع رمادية اللون في بؤبؤ العين.
-زغللة في العينين. 👀
👵🏻شو قصدك اخي عيونو زايغة؟؟
👩🏻‍💼لا لا تيتة حاشاه😂

👵🏻طيب في علاج لحالتو؟
👩🏻‍💼 اكيد في علاج و ممكن يتقدم العلاج حسب تقييم الطبيب للحالة متل:

-إعطاء المريض فيتامين 🅰️ عن طريق المكملات الغذائية الموجودة بالصيدليات أو عن طريق تناول الأطعمة يلي بتحتوي عليه متل: السبانخ والخس🥬
-إجراء عملية جراحية في الحالات المتقدمة، لإزالة المياه البيضاء من العين.
– ارتداء النظارات الطبية.🤓

أما بالنسبة للوقاية ⬇️
ممكن تناول الأطعمة يلي بتحتوي على فيتامين🅰️
و تناول الجزر يلي بساعد على الحفاظ على صحة العينين. 🥕
-عمل فحوصات دورية للعينين.🔍

👵🏻يالطيف الله يبعدو عنا ، لروح خبر أخي يرجع يروح لعند هالدكتور لحتى يتابع حالتو
👩🏻‍💼 أكيد خليه يروح ، و ان شاء الله معافى🌸💜

كل السلامة و الحب الكن 🌸💜
تضلوا بخير دائماً 🌸💜

د.نور الهدى عبدالله الحلاق

(سماعة حكيم)