جدري الماء أولاً ماهو وما سببه هو مرض معدٍ بشدة سببه ف

📌جدري الماء 👶💧😱⁉️

📌أولاً ماهو وما سببه ⁉️

🔺️هو مرض معدٍ بشدة سببه فيروس الحُماق 🦠
بيسبب ظهور طفح حاك بالجسم

📌كيف بتصير العدوى⁉️

🔺️العدوى بالتماس مع شخص مصاب🫂😷
أما من القطيرات التنفسية عند سعال أو عطاس المريض🤧
أو من لمس الحويصلات على جسم المصاب🤏

📌طيب وبعدين ⁉️شو بيصير بعد العدوى⁉️

🔺️بعد التماس مع الشخص المصاب بفترة ١٠ – ٢٢ يوم بتبدأ الأعراض
بتبدأ بحرارة وتعب وفقدان شهية وممكن التهاب بلعوم 🤒🤕
بعدها ب ٢٤ ساعة تقريباً بيظهر الطفح

📌شو صفات الطفح ⁉️

🔺️ أول شي بيبدأ على شكل بقعة حمراء مسطحة 🔴
بعدين هالبقعة بترتفع عن سطح الجلد
بعدين بيصير فيها محتوى مائي (حويصل) 💧
وآخر شي بيصير عليها قشرة بنية

🔺️المميز بالجدري أنه مو كل الآفات بيطلعوا سوا
يعني عند نفس المريض منشوف كل الاشكال السابقة سوا
وهاد الشي يلي بيميزه عن غيره من الأمراض✅

🔺️ممكن يطلعوا عالوجه أو الأطراف أو الجذع

🔺️بتضل تطلع حبوب وآفات جديدة لمدة أربع أيام بعدين بيوقف ظهور شي جديد

🔺️و تقريبا بعد ٥ ل ١٠ أيام بعد ظهور الطفح كل الافات بتصير قشور بنية

🔺️هالقشور بتروح تقريباً بعد أسبوع لأسبوعين وبتترك مكانها لون فاتح بيزول بعد فترة

📌طيب ايمتا المريض بيكون معدي للآخرين ⁉️
من قبل مايظهر الطفح بيومين لحتى تنشف كل الأفات وتصير عليها قشرة بنية هون بيبطل معدي ✔

📌طيب شو العلاج وكيف لازم نعتني بالطفل أو الشخص المصاب⁉️

🔺️أول شي والأهم طبعاً فحص المريض عند طبيب👩🏻‍⚕️
لتحديد حالته وحسب عمره والأمراض يلي عنده و شدة المرض بيقرر الطبيب اذا كان بيحتاج لعلاج فيروسي أو لا بس بيحتاج لعناية بالبيت 🏠

🔺️بالنسبة للأطفال أصغر من ١٢ سنة يلي ماعندن مشاكل صحية 👦🏻
عادة بيكون المرض خفيف ومابيحتاج لعلاج أو لمشفى 💜

🔺️العلاج لهدول الأشخاص كالتالي :

1️⃣أول وأهم شي أنه نخلي الطفل بالبيت لحتى ما يعدي الآخرين🏠
ونبعده بشكل خاص عن 🚫الأشخاص الغير ملقحين

🚫والنساء الحوامل 🤰(لانه اصابتن بتنتقل للجنين وبتسبب تشوهات)

🚫والأطفال الصغار الأقل من سنة 👶(لانهن غير ملقحين واذا انصابوا رح تكون اصابتهن شديدة)

🚫 والأشخاص يلي عندهن أمراض شديدة بتضعف المناعة👵🏻 متل مرضى السرطانات يلي عم ياخدوا علاج أو المرضى يلي عم يتعالجوا بالكورتيزون

🔺️طبعاً كمان بياخد عطلة من المدرسة 🎒👩‍🏫
لوقت ما ينشفوا كل الحبوب ويبطل يطلع شي جديد وقتها بيكون صار غير معدي ✅

2️⃣نحافظ على أظافر الطفل مقصوصة💅🙌🏻 دائما
لحتى ما يعمل تسحجات وقت الحكة و يسبب التهاب للحبوب
ولحتى ما يتشكل ندب وحفر مكان الحبوب

3️⃣الحمام بشكل منتظم 🛀🧼🚿مهم كتييير لحتى ما يصير التهاب وتجرثم بالحبوب

أبداً أبداً مو ممنوع الحمام بالعكس تماماً ❌
بس لازم تكون المي فاترة وليست حارة و نتجنب التفريك اثناء الحمام 🧽❌

4️⃣بعد الحمام ندهن الجسم بكريم مرطب ومهدئ للحكة🧴 وأفضل شي هون كالامينا لوشن أو فازلين طبي بدون أي معطرات

5️⃣لتخفيض الحرارة ممكن نعطي الطفل سيتامول أو بروفين 💊

🔺️ممنوع ❌ نعطيه اسبرين (تاميرين) ❌ لأنه إعطاؤه بهالحالة بيئذي الكبد والدماغ ع الطفل وممكن يسبب الموت

6️⃣لتخفيف الحكة ممكن نعطيه شراب مضاد للحساسية متل ليفوسيتريزين أو لوراتادين طبعا حسب الجرعة المناسبة

📌أما الأشخاص الأكبر من ١٢ سنة أو عندهن أمراض تانية لازم يراجعوا الطبيب لأنهن غالباً رح يحتاجوا لعلاج مضاد فيروسي

لأنه الإصابة عندهن غالباً أشد وبتسبب لاختلاطات وعواقب أشد

🔺️رح اكتفي اليوم لهون 💜 بالبوست الجاي رح نحكي عن اللقا ح ايمتا بينعطى وكيف وهل بيحمي من الاصابة او لا

📌اكتبولي اسئلتكن بالتعليقات لجاوب عنها بالبوست الجاي

📌وخبروني انصابوا أولادكن ولا لسا ⁉️
وبأي عمر⁉️
وكيف الوضع حالياً في حدا عندكن مصاب⁉️

د سراب شيخ حمدو
اختصاصية بالأمراض الجلدية والتجميل

(سماعة حكيم)