حابـب تكتشـف مهاراتـك بالحشـوات التجميليّـة

حابـب تكتشـف مهاراتـك بالحشـوات التجميليّـة 😉

يلّا نعطيـك كل الأفـكار، يلا عالسريري :

اليوم رح نتعرف على الصنف التالت ….

⛔ شو هوي الصنـف التالـت ؟!؟

▪️هو النخر بالمنطقة الملاصقة للأسنان الأمامية، ما منوصل للحد القاطع و غالبا بالمنطقة اللسانية / الحنكية، إلا لما النخر يكون واصل للدهليزي .

⛔ البسـوا اللباس الميداني ويلا نحـضر الحفـرة 😉 :

▪️أولا رح نحتاج لسنبلة شاقة [ماسية أو كاربايد]، بقياسين مختلفين و منبلش نشيل النخر و نحضر حفرة بعمق [1,5 – 2 ملم، 0,75 ملم ضمن العاج ]، والحفرة تكون على امتداد النخر، حتى الوصول لحدود سليمة وصلبة .⁦

▪️تانيا لنحقق ثبات للحشوة ضروري نعمل الشطب [ بزاوية ٤٥ درجة لمسافة ربع ملم ]، طبعا منشطب جميع الحواف المينائية يلي منقدر نوصلها ماعدا [ اللثوية _الحافة على الجذر_الحنكية المعرضة لجهود إطباقية ] .

الشطب رح يشيل الميناء الضعيف ورح يأمن ثبات للحشوة .

⛔ بعد التحضير صار دور عزل السن :

▪️باستخدام الحاجز المطاطي، ونختار قياس الثقب المناسب للمطاط و بما أن السن أمامي معناها بدك مشبك الفراشة، استعد بكامل قوتك و بلش تركيب الحاجز و بس تخلص انبسط أن قدرت تركبه بغض النظر عن الوقت 👌 .

⛔ المرحلة التالتة تطبيق الكمبوزيت واختيار اللون المناسب :

▪️نختار اللون حسب ألوان الأسنان المجاورة، بعيد عن ضو الكرسي، وبعد ما نشيل الألوان المضلّـة متل [ أحمر الشفاه، الحلق، والنظارات ] … أمّـا التطبيق👇 …

⁦⚠️⁩بالحفرة الملاصقة سن أمامي يعني رح نحتاج شريط سيلوئيدي وووتد .

⁦⚠️⁩ تطبيق المخرش لمدة [ ١٥ ثانية عاج و ٣٠ ثانية للميناء ] خرّش أول شي ١٥ ثانية ميناء وعاج بعدين ١٥ ثانية المينا لحالها .

⁦⚠️⁩ الغسل الجيد والتجفيف [ بيطلع عنا مظهر طبشوري ] .

⁦⚠️⁩ تطبيق البوند بفرشاة البوند وتصليبه لمدة ١٥ ثانية .

⁦⚠️⁩ تطبيق الكمبوزيت على دفعات ….👇

▪️أول طبقة هي المنطقة الحنكية / اللسانية مع نقاط التماس ( المنطقة الملاصقة ) .

▪️رح نطبق طبقة رقيقة بأداة حشي المواد اللينه و نصلب لمدة ٢٠ ثانية ..

▪️بعد ما بنينا الجدار الحنكي و الملاصق صار فينا نشتغل براحتنا 😌 ..

▪️رح نطبق الكمبوزيت بسماكة [ ٢ ملم ] كل مرّة و نصلّب لحد ما نرجّع شكل السن .

⛔ الإنـهـاء المرحلة ماقبل الأخيرة :

▪️رح نبلش بسنبلة إنهاء الكمبوزيت [ بتتميز بخط #أصفر عليها ] .⁦

▪️بعد ماشلنا النتؤات و الزايد من الحشوة، منروح للمنطقة الملاصقة مننهيها بواسطة شرائط السحل [ مندخل الشريط بين السنين و بكون الوجه الخشن باتجاه الكمبوزيت و منبلش سحل الزائد من الحشوة ] .

⛔ أخــيرا مرحلة الـتلمـيع :

▪️نستخدم أقماع مطاطية [ منبدا بالأبيض بعدين الأنعم و هو الأصفر بعدين الأنعم و هو الزهر ] .

و هلا صار فيك تفك الحاجز المطاطي عالهدى😌 ..

وتصـوّر هالإنجاز كذكرى وتعطي مريضك التعليمات

ولا مانع أنك تكافئ نفسك بكاسة نسكافيه يا بطل 💪 …

إعداد وتحرير : د. نـيفيـن طرابـزونلـي .

مــــيددوز ~ مـــــصدرك للـــــمعلومات الـــــطبية الــــــموثوقة 🛡.

مواضيع صحة الاسنان والفم