حنونّة قلبي يا ماما بعرف أني عم عذبّك ووترّك ببكيي وصراخي

👶🏻 حنونّة قلبي يا ماما ♥️ بعرف أني عم عذبّك ووترّك ببكيي وصراخي 🥺 وأنتِ دوماً حنيّتك بتكون أكبر بكتير من تعبك ولهيك أنا جاية اليوم أحكيلك بالعلم عن كم طريقة تساعدك تخففي توتري وتعرفي تتعاملي معو بسلاسة أكبر .

👶🏻 أول شي بدي ياه منك تحطي حالك محلي ، حاولي تقلبي طفل وتفكري تفكير طفل يعني لو أنتِ جاية تحمميني فوتتيني شلحتيني تيابي وطلعتي نسيانة الشامبو وركضتي تجيبيه .. حترجعي تلاقيني عم أبكي وشد عحالي لأنك تركتيني بالبرد .. بعرف مو قصدك بس أنا لساتني صغير ومزاجي صعب وغير متسامح .. غنوّج ومدلع اي لأنو لسا مو متعلم المرونة والتحمل 🙄

تاني مرة حاولي جهزي كلشي وحضريني لكلشي بدك تعمليه يعني مسكيني شلحيني بهدوء وناغشيني .. تأكدي أنو كلشي جاهز .. ما تكبي المي بسرعة لاء شوي شوي لأنو كلشي جديد عليي صعب فبدي دوماً منك تهيأيني ❤️

👶🏻 تاني شي يا ماما لمساتك الحنونة حضنك كتير بخففوا من توتري .. حضنك بيرفع بجسمي هرمونات الريلاكس من أندروفين ودوبامين ❤️ حقيقي حضنك دوا .

👶🏻 ومتل ما بتقلك تاتا وقت أتوتر حمليني وأمشي فيني هالشي كتير كتير بهدّيني 👌🏻

👶🏻 تواصلك معي كمان بخفف توتري .. لازم تحطي ببالك أني أنا بفهم .. بفهم عنظرة الحب يلي بعيونك ، علمستك الحنونة ، عنبضات قلبك وهوي حاببني .. والمشاكل يلي بتصير قدامي بحس فيها وانزعاجك بحس فيه ..

أنتِ شمسي منك أنا باخد الطاقة ، الحب ، الأمان وكلشي ماما كلشي فكوني منيحة لكون منيح 🙏🏻

👶🏻 ركضت عالصوبيا وخبطتها .. حرقت حالي وشحورتلك الدني .. روقي وخدي نفس وحطي حالك محلي لساتني جديد عشي اسمو صوبيا حابب اكتشفها .. خلص عرفت أنها واوا 🙆🏻‍♀️ صفقيلي لأني جربت شي جديد ونبهيني بعد عنو لأنو طلع مؤذي وواسيني وفهميني أنو هيك دوماً في شي بفرح وشي بزعل .. ويلي بزعل نبعد عنو أوعى 🤫

👶🏻 آخر شي بنصحك فيه هوي وقت النوم .. حقيقة أنو وقت تجي تقعدي معي وتأمنيلي جو هادي وحب ورواق لنام وتبقي حدي لأغفى هالشي بينعكس عليي إيجاباً الليل كلو والنهار كلو والحياة كلها !

تذكري أنو التوتر بيعملي أمراض لبعدين نفسية واجتماعية وعضوية حتى وأنو التربية يا ماما ويا بابا صعبة وبدها منكن تكونوا رايقين متجاوبين وتحاولوا قدر الإمكان ورغم كلشي صعب تتعاملوا معي برّقة بحكمة وبكتير من الحب .. ♥️

الحبل السري لساتو موصول بين قلبي وقلبك ولساتني من رحمك من صلبك وبروحك وحدك أنتِ يا حنونة أنا مكمل ومنيح ومبسوط ♥️ بحبك يا روح الله جوّاتي

كنت معكم سَماح صالح محمد ♥️

(سماعة حكيم)