🚩 يوم تبيّض وجوه و تحمرّ وجوه… يوم النتائج!!
لا، يوم الكلاسيكو بين برشلونة و ريال مدريد🔥 …
هاد الكلاسيكو معروف مين السيّد فيه ❤️💜…
بس ياترى في كلاسيكو تاني غير كلاسيكو الأرض اسمو كلاسيكو الفم…
هاد يومياً بصير والحلو فيه انو انت ما بتضل متفرِّج وفيك تشارك وتخلي فريقك يفوز😌🖐🏻…
الطرفين هنن فريق خسف الأملاح المعدنية و وفريق إعادة التمعدن…
عند كل انخفاض لدرجة حموضة الفم, نتيجة الأحماض المفرزة من قبل جراثيم اللويحة السنية ،فريق الخسف بتولع معو الحكاية 🔥 وببلش ينتزع شوارد معدنية من بلورات هدروكسي الأباتيت الموجودة في ميناء السن والمسؤولة عن صلابة الميناء…
فريق إعادة التمعدن يحطها واطية!!
أكيد لا، بيجي وببلش يرجع شوارد معدنية للبلورات بدل ل راحت منها…
التعادل مُسيطر إلى أن يتدخل الحكم 🙂…
عفواً انت صديقي الجمهور 😌…
اذا فاز فريق خسف الأملاح فطبقة الميناء رح تخسر شوي من تمعدنها ومرة ورا مرة رح يصير في عندك نخر…
أمّا اذا فريق إعادة التمعدن فاز، بهالحالة طبقة الميناء بتضل بصحتها و انت بتكسب صحة فموية جيدة…
طيب كيف فينا نكسر هالتعادل لصالح صحتنا !!
بدنا نحاول نخلي درجة الحموضة الفموية معتدلة :
💜بدنا نحرّض إفراز اللعاب لمنعتبروا عامل مهم جداً بتعديل درجة حموضة الفم من خلال عدة طرق منها:
(استخدام العلكة الخالية من السكر، تناول الخضروات الغنية بالألياف بين الوجبات بدلاً عن الحلويات)
❤️عدم اتباع حمية غذائية غنية بالسكريات و تخفيف تكرار تناول السكريات عن طريق الإبتعاد قدر الإمكان عن السناكات الغير صحية بين الوجبات…
💜المضمضمة بالحليب أو تناول قطعة من الجبنة بعد الانتهاء من وجبة الطعام لرفع درجة PH الفم…
❤️والأهم من كل ذلك هوي تحقيق عناية صحية فموية جيدة من خلال تفريش الأسنان واستخدام الخيط السني…
ومرقلك عالطبيب كل فترة 😉…
دمتم أنتم ومن تشجعون بخير… ❤️
vamos Barcalona
كلاسيكو
● إعداد وتحرير : د. مهنّد مالك حمود
🚩اعـتماد : ” مِنصَّـة صِحـة الـفَم السوريَّـة – MedDose ”
المتخصصة بنشر كُل ما يتعلق بطب الأسنـان والصحـة الفمويـة ومُحاربة المُعتقدات الطبيـة الخاطئـة .
مواضيع صحة الاسنان والفم