دكتورة يا دكتورة الألم عميق كتير بركبتي ، كل ما بقوم من قعد

👨🏼‍🦳 دكتورة يا دكتورة الألم عميق كتير بركبتي ، كل ما بقوم من قعدتي ، كل ما بمشي مسافة طويلة ، حتى أنو لبسة الحذاء صارت توجعلي ركبتي 💔 شو الحل دخيلك ..

👩🏼‍⚕️ قديه عمرك عمو ؟ وقلي بتحس أول الصبح شي نص ساعة أو أقل أنو ركبتك ميبسة ؟

👨🏼‍🦳 عمري 70 يا دكتورة واي بحس هيك وحتى أنو الوجع صار يجي حتى وأنا مرتاح !

👩🏼‍⚕️ طيب يا عمو رح أفحصك هلق وتعمل صورة بسيطة لركبتك وبعدها منحكي .

متل مو شايف يا عمو بالصورة الشعاعية وحسب الفحص السريري فأنتَ مصاب بمرض اسمو التهاب المفصل التنكسي وحتى أشرحلك شو عم يصير معك جيب دماغك وتعال ندخل لجوا المفصل ..

في عنا عظمين متقابلين بيناتهن بنية عظيمة اسمها المفصل الها مكونات كتيرة .. غضروف وغشاء زليلي وسائل زليلي ومحفظة وكل هدول هدفهم يحموا العظم من الصدمات ويأمنولوا الدعم والمرونة ..

مع تقدم العمر يا عمو بصير في تغيرات بالجسم شي بينقص إفرازو وشي بوقف إنتاجو وهيك بالمفصل بقل إفراز مواد طبيعية اسمها الكولاجين والبروتيوغليكان ونتيجة هالشي السطح الغضروفي للمفصل بيترقق .. بصيرو العظمين المتقابلين قراب أكتر لبعض فبتتغير طبيعتهن .. بيتسمكوا وبيتكثفوا ليتحملوا هالضغط الهائل عليهن .. خلايا الغشاء الزليلي بتتعظم والأربطة والعضلات حوالي المفصل بتتشوه نتيجة الالتهاب وهيك المفصل كلو بيتشوه وبيخرب !

هالمرض يا عمو بصيب كبار العمر يلي بعمرك ومن الشغلات يلي بتزيد خطر إصابتو البدانة ، الأعمال المجهدة ، الرضوض السابقة ، وأي اضطراب أو مشكلة بتصيب المفصل من قبل ..

بصيب النساء أكتر من الرجال .. وللوراثة دور فيه !

مو بالضرورة كل الكبار بالعمر يصيبهن .. هاد الو علاقة بطبيعة الشخص ولياقتو كمان ..

العلاج يا عمو أساسو غير دوائي فهلق بدي منك أهم شي تنزل من وزنك .. تبعد عن الأعمال المجهدة .. وتعمل رياضة تقوي فيها عضلات رجليك وبحالة الألم تحط كمادات مي باردة أو حارة .. ما نفع بتاخد سيتامول .. ما نفع منحول لمضادات الالتهاب اللاستيروئيدية موضعي بعدين فموي .. ما نفع بتراجعني ومنشوف شو منعمل

ممكن نعالج بحقن كورتيزون بالمفصل وممكن نلجأ للعمل الجراحي ..

وبس ❤️

عليك العافية وعلى قلوب كل كباريتنا الصحة والقوة 🙏🏻

كنت معكم سَماح صالح محمد ♥️

(سماعة حكيم)