رح احكيلكن اليوم عن الخناق أو الخانوق كونو حالياً منتشر ك

رح احكيلكن اليوم عن الخناق أو الخانوق 😷
كونو حالياً منتشر كتير عند الأطفال والأهل عم يفكرو كور ونا

🔴 أول شي بدي ياكن تسمعو سعال الطفل الي بالفيديو بالتعليق الأول 👇👇

🔴 بالطب بنسميه “السعال النباحي” هوي تعبير عن طبيعة هاد السعال.. ولقربلكن ياها أكتر بكون صوت السعال مبحوح وخشن… وحتى الطفل لما بيبكي او يحكي بكون في بحة بالصوت.

🔴 السبب بهاد الشكل من السعال هوي التهاب الحنجرة وبالضبط بصير في وذمة بالحبال الصوتية ..ومن هون بتجي خطورة الحالة.. لإن بالنهاية الطفل ما عاد رح يقدر يتنفس 😢

🔴الخناق او ال Croup بينتج عن الاصابة
بفير وس نظير الإنفلو نزا او فير وس ال RSV .. وممكن كمان بالاعمار الأصغر يكون سبب جرثومي أو يصير اختلاط بجرثوم

🔴 هاد المرض بصيب الأطفال من عمر اشهر لعمر ٦ سنوات .. أكبر من هيك ما بينصابوا إلا بحالات مضعفي المناعة.

🔴 بقية الأعراض غير السعال وبحة الصوت وضيق التنفس.. ارتفاع الحرارة والانهاك العام..وضعف الشهية..والاهم صوت “الصرير” متل الي طالع بآخر الفيديو .

🔴 كل إم بتسمع طفلها عم يسعل بهاد الشكل :

🤚النصيحة الأولى هي : لا تخليه بالبيت أو ضمن جو مغلق

🤚افتحي الشباك.. خلي الطفل يستنشق هواء قدر الإمكان .. وخاصة اذا كان الجو بارد .. ممكن يخفف من هي الوذمة

🤚في حال استمرار ضيق التنفس مراجعة اقرب مشفى

العلاج : عن طريق الستيروئيدات (كورتيزون) .. بالإضافة لارذاذ الايبنفرين أو مشابهاتو وبالحالات الاشد بيحتاج الطفل لقبول ضمن المشفى وتدبير الضائقة التنفسية .

🌸🌸🌸🌸🌸🌸🌸🌸🌸🌸🌸🌸🌸🌸🌸🌸

هيك بكون حكيتلكن عن ال croup او الخانوق
وبتمنى من كل إم طفلها مصاب بالسعال وبشكل متل هاد ما تجيب ادوية عشوائية من الصيدلية ممكن اتضر الطفل او تفاقم حالتو لا سمح الله

طبيب الأطفال فقط قادر على تشخيص وعلاج هي الأمراض

🌸🌸🌸🌸🌸🌸🌸🌸🌸🌸🌸🌸🌸🌸🌸🌸

وصلوا هل المعلومات لكل حبايبكن 😘

مع محبتي الكن وتمنياتي لكل الأطفال الحلوين يضلو بخير وسلامة 😘😘

د سهير الحسين
ماجستير بورد سوري في طب الأطفال

❤

(سماعة حكيم)