بعد ماطبقت هالخلايا، ووصلت دارة الحماية، ووصلت الشاحن واذا في دارة رفع جهد وفيوزات وهالقصص
رحت وبعت بطاريتك الجديدة كلياً للشب الكموني
قلك الشب الكموني، إي وكيف بعرف انو مليانة أو فاضية؟
هون بهاللحظة طلع البوست هاد بوجهك..
بالسوق السورية وحسب مشاهداتنا للمنتجات المحلية، الكل بيعتمد لعرض نسبة شحن البطاريات طريقة من 3 طرق
الأولى، ساعة فولط
التانية، شاشة عرض ع شكل بطارية، وهاد النوع اللي منستخدمو بمنتجاتنا
التالتة، أربع أو خمس ليدات، بيقابلوا قيم شحن من 0 لغاية 100 بالمية من البطارية
مشكلة الطريقة الأولى..مشكلتين صراحة، بداية أغلب ساعات الفولط بالسوق مو دقيقة، وببطاريات الليثيوم ال 100 ميللي فولط بتعني كتير لعمر البطارية ولعنجد شو كم الشحن اللي فيها “جزافاً منقول كل 100 ميللي فولط بتقابل 10 بالمية من الشحن وهالشي لخلية وحدة”
تاني مشكلة بهالطريقة هيي أنو جهد بطارية ليثيوم من 3 خلايا عالتسلسل وهيي مليانة بيقابل 12.6 فولط
وهيي فيها نصفها بيقابل 11.1 فولط
وهيي فيها 20 بالمية بيقابل 10.2 فولط
طيب وشو يعني؟ يعني انو بذهن المستخدم الجهد للبطارية الحامضية أو الجل أعلى من هيك بكتير وممكن يطفيها للبطارية وهيي لسا فيها أكتر من نصفها ويقلك ماعم تشحن عالأخير..لبكة للمستخدم
مشكلة تاني طريقة، اللي نحنا وغيرنا عم نتبعها، طريقة شاشة العرض
الشاشة بتعتمد لتعرض كمية الشحن المتبقية على جهد البطارية، ودقتها مقبولة إن لم نقل جيدة، طيب وشو المشكلة لكن؟!
المشكلة أنو عم نحدد كمية الشحن بناءً على الجهد، وهالشي صحيح فقط في حالة عدم وجود حمل عالبطارية، وللأمانة علمياً منحني علاقة جهد البطارية الليثيوم أيون مع شحنها غير خطي، وبيتطلب قياس تيار وجهد وحرارة لنعرف بدقة نعرض شو بقا فيها شحن
لهيك شاشة العرض بتقدم نظرة بسيطة عن شو بالبطارية شحن لكن كمان بعيدة عن الحقيقة كالطريقة الأولى
الطريقة التالتة بقا سالفة لحال
عادة هاي الدارات بتنبنى باستخدام مكبرات عمليات أو مقارنات، والمقاومات المستخدمة على حسب ماشفنا بالسوق كلياتا ذات دقة 5%
يعني..انسى الدقة وانسى اللي راح
طبعاً بعض الصانعين إن صحت التسمية بيستخدموا متحكمات صغرية لتحقيق الطريقة السابقة، لكن أيضاً مقاومات بدقة 5% ووفق قياساتنا مافي أي معايرة للقراءات، ومصيرها بالنقد مصير أسلوب المكبرات أو المقارنات
هلق فيك ترجع للشب الكموني وتقلو كيف فيه يعرف شو ضل فيها شحن ب 3 طرق ولاوحدة منهم 100% دقيقة
سايبرترون سايبرفيو شاشات عرض ساعة فولط
