البوست اللي جاي هيتكلم عن الـ(DNS Prefetch – Prerender – Pre Connect)، فـ قبل ما نتكلم عنهم محتاجين نعرف حبة معلومات مهمة عن الـDNS، وازاي بمجرد كتابة رابط الموقع بتقدر تتصفحه بكل سهولة! متحمس؟ يلا بينا نبدأ
الإنترنت بمفهومه البسيط عبارة عن حبة أجهزة متصلة مع بعضها من خلال كابلات عملاقة في أعماق البحار والمحيطات بتوصل الدنيا ببعضها، هتلاقي في أول كومنت رابط لفيديو من قناة الجميل كودزيلا بيشرح الإنترنت بشيء من التفصيل
وعشان تقدر توصل للملفات اللي على كل جهاز، لازم يبقى في حاجة Unique ينفرد بيها كل جهاز، ومستحيل يشترك فيها جهازين، ايه ده يا سيدي؟ الـIP Address!
وبالفعل عشان تخش على جوجل، المفروض تكتب 216.58.209.238، ووسط ملايين المواقع اللي بتطلع كل شوية، فكرة حفظ الـIP Addresses هيبقى حاجة صعبة جدًا وغير منطقية كمان! ودي كانت تعتبر من أكبر العقبات قصاد إنتشار الانترنت وسهولة استخدامه، وكان لازم حل سريع عشان نقدر نوصل للتطور اللي إحنا فيه دلوقتي، تعرف ايه هو الحل ده؟ أيوة بالظبط، الـDNS!
الـDNS ببساطة شديدة جدًا، بياخد الـDomain اللي انت كاتبه ويعمل Look up عنه، بحيث يقدر يوصل للـIP بتاعه، وبدل ما تكتب انت الـIP عشان تخش ع الموقع، انت هتكتب الـDomain والـDNS ياخده ويجيب الـIP بتاعه ويحولك ع الموقع، وده حقيقي حل عبقري جدًا
ولو حابب تجرب بنفسك، ممكن تفتح الـTerminal وتكتب ping google.com، وهيظهرلك الـIP Address بتاع جوجل، وتقدرطبعًا تجربه في أي موقع تاني على الإنترنت.
وبس كدة، ده بوست تمهيدي سريع للبوست اللي جاي، هيكون مهم جدًا وAdvanced فـ اتأكد انك متابعني عشان مايفوتكش أول ما ينزل، وده الموضوع ببساطة!
الجينيص
الجينيص