شو عم تدرسي ؟

شو عم تدرسي ؟
-هندسة
هاد تخصص للشباب مش الك ؛ ياعمي بيقول المثل اعطي الخبز لخبازه ولو اكل نصه، بعدين اخرتك بشي وظيفة ب ١٠٠ ألف

شو عم تدرسي؟
-صيدلة
على ايييش كل هالتعب كله ؟
وبنهاية المطاف رح يسمّوكِ بياعة أدوية .

شو عم تدرسي ؟
تمريض
مجنونه انتِ؟ بتعرفي إنه مصيرك تشتغلي مع رجال ودوامك كلّه شفتات؟ بكرة بس تتزوجي اولادك وين رح تخليهم ..

شو عم تدرسي ؟
-طب
رح تضلك (٦) سنين دراسة، و٤ أو ٥ سنين اختصاص ، يعني بدهن يضيعوا من عمرك وانتِ لسا ماتخرجتي .

شو عم تدرسي ؟
-إعلام
يعني ناقصك أكشن !
وقت الحرب الناس بتتخبى، وانت وقتها بدك تركضي وتدوري ع صور وحقائق، ويمكن تموتي منشان قضية بالأصل ميته من زمان .

شو عم تدرسي؟
-جـرافـيـك
يعني آخرتك تلوني و ترسمي ، هلا من كل عقلك معتبرتيها دراسة .

شو عم تدرسي ؟
طب أسنان
ولك شو بدك بهاد القرف ، (٥) سنين بدك تدرسي منشان بالاخر تحطي ايدك ب تم واحد اكل توم وبصل

شو عم تدرسي؟
– تربية … لغات …. علوم عامة
ولك الأساتذة معبيين البلد وهيك هيك حيطلع جيل فاشل ، رح يضيع عمرك كله وانت راكضة من مسابقة لمسابقة ، يعني رايحه ع البطاله على طوول .

شو عم تدرسي؟
حقوق
اوووهه بدك تدرسي وتتعبي وتصيري محامية، المحاماة مش للبنت لأنها ضعيفه , بتمرمطي حالك من محكمه لمحكمه وبالاخر بدك تدافعي عن حدا ممكن يكون مجرم وقاتل هاي شغلة رجال يابنت .
وكأن القانون فقط (محاماة) .

شو عم تدرسي ؟
والله أنا اختصرت الطريق وتزوجت ، بدون ما كمل دراستي .
له له ليش هيك مستعجله ، يا بنت الناس كنتي كملتي دراستك ، محدا رح ينفعك بهالايام غير شهادتك .

بالمختصر هادا هو محتمعنا شو ما قلتلو دارس ما رح بعجبو وبوقف بطريقك وبطريق حلمك

✅