صار عندي سخونة كتير رحت عالصيدلية أخدت ابرة ديكلون وابرة ديك

صار عندي سخونة كتير رحت عالصيدلية أخدت ابرة ديكلون وابرة ديكسون رجعت تحسنت متل السحر 😅😅😅

⚡⚡ رح نحكي اليوم عن موضوع مهم ألا وهو إبرة الديكلون ومخاطر الديكلون عموماً:

❌صاير هالأيام من السهل انو أي واحد عندو حرارة عالية أو أعراض غريب (انفلونزا) انو يروح عالصيدلية لوحدو ويطلب من الصيدلاني انو يعطيه إبرة ديكلون أو انو ياخد ابرة الديكلون بالبيت
وهالشي مفيد بكتير حالات ازا بدنا نحكي الصراحة إلا انو مالو صحيح أبداً.

⛔ الديكلوفيناك هوو مركب معاكس لمواد مهمة بالجسم اسمها البروستاغلاندينات، وهي البروستاغلاندينات موجودة بالحالة الطبيعية والها وظائف كتير مهمة:
✅حماية المعدة من القرحة
✅توسيع القصبات وجعل التنفس سهل
✅زيادة كمية البول الطبيعي بحيث ما يصير احتباس سوائل عند الإنسان
✅المساهمة بتجمع صفيحات الدم وإيقاف النزف ازا صار عند الإنسان نزف
✅الإشراف على الوظائف المهمة بالدماغ متل تنظيم حرارة الجسم

‼‼لما يصير عند الشخص انفلونزا أو رشح أو غريب فرح تضطر المناعة تهاجم الفيروسات وتصد هجومها عالجسم، وبالمحصلة رح يرتفع مستوى البروستاغلاندينات بالجسم بحالة الالتهاب ورح تظهر أعراض الحرارة وثقل الرأس والأوجاع المعممة

🚭 هلق الديكلون رح يعاكس كل هالآليات صح ورح يخفف الحرارة والآلام صح …
بس ممكن يسبب تأثيرات خطيرة:

1. نزف بالمعدة وقد يكون نزف خطير جداً ومميت ببعض الحالات.

2. تقبض بالقصبات وبالتالي قد يسبب هجمة ربو ازا كان المريض عندو ربو بالأصل

3. احتباس سوائل وبالتالي قد يسبب ارتفاع شديد بالضغط ازا المريض كان عندو ارتفاع ضغط

4. بتتعطل وظيفة الصفيحات بالجسم وبالتالي ممكن تصير نزوف خطيرة غير نزف المعدة اللي حكينا عنو فوق

5. في حالة خطيرة انا بعيوني شفتها عند اكتر من مريض انو ماتوا بعد ابرة ديكلون بساعات بدون ما نعرف شو السبب ويمكن ما تكون الابرة هية سبب الموت بس هية خطيرة كتير

📶 لهيك لازم قبل ما حدا ياخد هالابرة ازا اضطر لازم يعرف شو الموانع تبع استخدامها والأهم من هيك لازم ما ياخدها المريض لوحدو وانما حسب رأي الطبيب

مع الأمنيات بدوام العافية والصحة للجميع

د. سومر شلبي Somar shalaby.

(سماعة حكيم)