صــورة حـــقيقية لـ” مــبيض مُــتعدد الــكِيسات ” كتير

🔴» صــورة حـــقيقية لـ❗” مــبيض مُــتعدد الــكِيسات ” ❗

✨كتير منسمع بهالاضطراب و كتير ممكن تفكري أنو انت مصابة في لأنو رفيقتك عندا يا و أنت عندك أعراض بتشبها ف ممكن حتى تبدي بالدوا اللي ع بتاخدو رفيقتك 🤗.

✨مقالنا اليوم خصيصاً للتعريف بهالموضوع و التوعية حول أهمية تشخيصو من قبل طبيب و ليس بناءً ع تشابه الأعراض مع جارتك اللي عندا يا.

✨بداية ما هو هذا الاضطراب؟
✅ببساطة هو اضطراب هرموني يصيب نسبة كبيرة من النساء حوالي مليون امرأة، يمكن أن يسمى أيضاً متلازمة ستين ليفنتال.
✅لنفهم آليتو، لازم نعرف أنو جسم الإنسان ينتج و بحاجة لكل من الهرمونات الذكرية و الهرمونات الأنثوية، و اللي بصير بهالاضطراب أن نسبة الهرمونات الذكرية أعلى و هالشي بيأثر ع المبيض، فلهيك بتعاني المصابة من اضطراب بالدورة الشهرية، أو حتى غيابها بعض الأشهر، بالإضافة لوجود كيسات ضمن المبيض، و للأسف تعتبر سبب شائع لنقص الخصوبة.

🔴بشو بيتظاهر كمان؟
✅كتير ممكن نشوف سمنة عند المصابات و خاصة بمنطقة الخصر، و بصعوبة ليتم التخلص من هالوزن الزائد، ممكن كتير تلاحظي وجود شعرانية، يعني نمو شعر بأماكن غير شائعة لنموه عند الإناث متل اللحية، الشارب، الصدر، بالإضافة لإمكانية وجود حب الشباب و بقع داكنة على الجلد.
الألم الحوضي و الاكتئاب من الأعراض المحتمل وجودها أيضاً.

🔴ليش بتصير و شو الأسباب؟
✅السبب المباشر لحدوثها لساتو مو معروف تماماً، و لكن المستويات المرتفعة من الأنسولين و مقاومة الانسولين تعتبر جذر الإصابة بالمتلازمة، و كمان في حال زيادة الوزن تكون فرصة الإصابة بها أعلى.
✅العامل الوراثي بيلعب دور كمان، يعني أنت مهيأة للإصابة أكتر إذا كانت أمك أو أختك مشخصة فيا.
✅معظم الحالات بتم تشخيصا بعمر 20 أو 30 سنة، و بحالات ممكن يصيب الفتيات بعمر 11 سنة إذا كانت لسا مو جايتن الدورة.

🔴كيف بتم تشخيصا؟
✅ليتم تشخيصا نحنا بحاجة معيارين من تلات معايير:
1-دورات غير منتظمة.
2-ارتفاع بنسبة الهرمونات لصالح ال LH.
3-وجود أكتر من 12 كيسة مبيضية بالفحص بالإيكو.
و النقطة الأهم أنو تشخيصا يكون من قبل طبيب مختص بعد قيامو بالفحص السريري، الإيكو، و التحاليل اللازمة، و بعد ما يستبعد المشاكل التانية متل اضطراب الغدة الدقية.
✅لهيك نصائح جارتك خليا بس بمجال الطبخ، الطب في مين يفهم في 🤗.

🔴كيف بتم العلاج؟

✅تغييرات في نمط الحياة:
1-خسارة الوزن: هو من أهم الأمور فهوي بيساهم بجعل الدورة أكثر انتظاماً، بقلل من نمو الشعر، بخفف الاكتئاب.
2-النظام الغذائي: كتير مهم تتجنبي يعض الأغذية اللي بتأثر ع مستويات سكر الدم و الأنسولين، يعني حمية شبيهة بحمية الداء السكري.
3-التمرينات الرياضية: اللي تعتبر وسيلة كتير مهمة لخسارة الوزن، صحة القلب، و جعل العضلات أكتر قوة، و بتخليكي تنبسطي أنو وزنك بعد فترة ح يثبت برقم معين، و تخليكي ريلاكس و رايقة.
4-كتير مهم كمان أنو توقفي التدخين.

✅الأدوية لتحسين الأعراض:
1-مانعات الحمل الفموية⬅ لتنظيم الدورة الشهرية.
2-الميتفورمين⬅ لتقليل المقاومة على الأنسولين.
السبيرنولاكتون⬅لتقليل مستويات الهرمونات الذكرية.
الليزر و كريمات إزالة الشعر⬅ للتخلص من الشعر الزائد.

🔴شو الحلول لزيادة الخصوبة؟
✅بدراسة شملت بعض نساء عندن هاي الظروف تبين أنو معظمن اللي خسروا أكتر من 5% من وزنن صارت دورتن أكتر انتظاماً، و فرصة الحمل كانت أكبر عندن.
✅أشهر دوا لعلاج نقص الخصوبة في سياق المبيض متعدد الكيسات هوي الكلوميفين، فهوي بيساهم بإطلاق البويضات الناضجة، بالإضافة لأدوية أخرى بيوصفوها الأطباء، أو بيتم اللجوء للإلقاح ضمن الزجاج (طفل الأنبوب).

🔴و بس تكوني حامل و عندك ه المتلازمة؟
✅إجباري أنتِ بحاجة لطبيب يقيمك مشان يعرف إذا عندك مشاكل متل سكري حملي أو ارتفاع توتر شرياني، مخاض باكر أو ولادة.
✅الدراسات الحديثة بتقترح أنو أدوية الداء السكري متل الميتفورمين ممكن يساهم بتقليل فرصة حدوث المشاكل المرتبطة بالحمل.
✅و للأسف أنو الأطفال اللي بيولدو لأمهات مصابات بالمبيض متعدد الكيسات ممكن يقضو وقت أكتر بالعناية المشددة.

🔴شو المشاكل الصحية المرتبطة بهالمتلازمة؟
✅مجرد ما كان عندك ه المتلازمة فأنت بحاجة لمتابعة دائمة مع طبيبك لأنو ممكن يصير عندك بعض المشاكل متل:
1-مستويات مرتفعة من الكوليسترول ممكن تسبب مشاكل قلبية، متل ارتفاع التوتر الشرياني و الهجمة القلبية.
2-مقاومة الأنسولين، المتلازمة الاستقلابية، الداء السكري النمط الثاني.
3-البدانة.
4-توقف التنفس أثناء النوم.
5-اضطرابات المزاج متل الاكتئاب و اضطراب ثنائي القطب.
6-سرطان بطانة الرحم خاصة عند المتقدمات في السن.

سلامتُكم غاية .

د. رهام يحيى شروف .

مــــيددوز ~ مـــــصدرك للـــــمعلومات الـــــطبية الــــــموثوقة 🛡

(ميددوز)