عارف ايه اغرب Bottleneck هتسمعه؟ ايوة هو اللي هكلمك عنه النهاردة، أكيد مش الكوكاكولا، هاخدك دلوقتي في لفة سريعة على عنق زجاجة كارت الشاشة مع الشاشة نفسها، متحمس؟ لأ؟ مش مهم يلا بينا 😂
الأول يعني ايه عنق زجاجة؟
تخيل معايا اننا في ماراثون دلوقتي، أنا سريع جدًا وسرعتي بتوصل لـ36.5 كيلومتر في الساعة زي Akani Simbine، وانت ياعيني راجل غلبان ويادوبك بتمشي 10 كيلو، وقدامنا فرقة تانية كل واحد فيهم بيمشي بسرعة 15 كيلو بس، تفتكر مين فينا هيسبق؟
بالبديهة انا، بحكم ان سرعتي أسرع منهم الاتنين على بعض! طيب لو من شروط الماراثون ده ان كل أعضاء الفريق يبقوا مربوطين مع بعض ومايفعش حد يسبق التاني؟ اااااه هنا بقى الموازين هتختلف
لأن أنا مع سرعتي العالية جدًا دي، كل اما احاول أجري مش هعرف لأني مربوط بيك، لازم يبقى احنا الاتنين سرعتنا متساوية عشان نمشي بأريحية تامة، حلو الكلام ده؟ حلو
دلوقتي بقى تعالى نطبق عملي، معاك كارت شاشة RTX 3090، ومركب بروسيسور Core i3-10100F، تفتكر الـRTX 3090 هيديك أداء جامد؟ إطلاقًا، لأن البروسيسور نفسه ضعيف فـ كارت الشاشة هيطلع فريمات بأعداد مهولة والبروسيسور مش ملاحق، فـ المحصلة النهائية أداء سيء زي أي كارت متوسط!
وده نفس الكلام عن الـBottleneck (عنق الزجاجة) بين كارت الشاشة والشاشة نفسها، لو رجعنا لنفس المثال وجبنا كارت الـRTX 3090، وركبناه على شاشة 1080p 60Hz، تفتكر هتشوف أداء الكارت بشكل ممتاز؟ إطلاقًا
هو هنا انت معندكش عنق زجاجة بالشكل الفعلي، ولكن الكارت بيطلع ييجي 200 فريم والشاشة يادوبك أخرها تعرض 60 فريم! مش مستفيد انت حاجة إطلاقًا بالفريمات الزيادة!
ولو في حاجة عاوز أطلع بيها من البوست ده، هي انك لما تشتري كارت شاشة شوف هتشغله على أنهي شاشة، لو شاشتك 1080p 60Hz انت حرفيًا أي كارت متوسط او اقتصادي كمان هيقضيلك الغرض وزيادة.
وخد بالك في Bottleneck دلوقتي عندك، تخيل محتوى بالعظمة دي والتفاعل عليه ضايع كدة؟ يعمل عنق زجاجة ده بذمتك ولا لأ؟ تحله ازاي؟ بسيطة، اعمل لايك لو البوست عجبك، ومتنساش تعمل Follow للصفحة عشان مايفوتكش أي بوست جديد
وبس كدة، ده كان الموضوع ببساطة.
الجينيص
الجينيص