فراشات بمعدتك عم تطير قلبك عم يدق ويرجف بلش عندك التوتر والخ

فراشات بمعدتك عم تطير🦋 قلبك عم يدق ويرجف بلش عندك التوتر والخجل هي المشاعر كلها بتظهر عليك لما يكون الشخص يلي بتحبو حواليك أو قريب منك طبعا هي المشاعر رح يحس فيها الشخص يلي خاض تجربة حب حقيقية.. أساساً مين فينا ما حب أو حس بمشاعر حلوة تجاه شخص محدد…❤️

بس ياترى شو تأثير الحب على عقولنا ‼️هاد موضوعنا اليوم.
جاهزين… يلا نبلش 🏃🏻‍♂️

💠 بالبداية رح تقولو شو هالحكي الفاضي شو دخل المخ أو الدماغ بالحب والمشاعر كلنا منعرف انو القلب هوي يلي بيتحكم بكلشي 🤔

🔅 بالبداية رح قلك هالحكي مو دقيق اكيد القلب الو علاقة بالموضوع بس هلق رح نوضح كيف عرفنا انو المسؤول الأساسي هوي الدماغ 🧠

عدة علماء جابو أشخاص واقعين بالحب واجرو عليهن تجربة هالتجربة كانت انو كل شخص يتطلع بالبنت يلي بحبها وكانت النتيجة انو في مناطق بالمخ عم تعطي إشارة نتيجة تأثرها ويلي هيي كانت الجزيرة الانسية والقشرة الحزامية الأمامية وأجزاء من المخطط الظهري…وكمان كان في مناطق بالدماغ معطلة عن عملها ويلي هيي أجزاء من قشرة الفص الجبهي الأيمن والقشرة الجدارية الثنائية والقشرة الصدغية ..

🔅وبعد دراسات عديدة تبين للعلماء انو الوقوع في حب رومنسي رح ينشط مناطق الدماغ يلي بتحتوي على تراكيز عالية من هرمون الدوبامين المسؤول عن الرغبة والادمان العاطفي وكمان رح يخفض مستوى هرمون السيروتونين يلي مسؤول عن المزاج والشهية للاكل 😋

🔅وهاد شي بفسر ليش الأشخاص الواقعين بالحب بركزو على موضوع عاطفتن وما بفكرو كتير بالمواضيع التانية ❤️

💠كتير من الأشخاص لما يكونو مع الشخص يلي بحبوه بحسو بالأمان سالتو حالكن قبل ليش ‼️

🔅لما يصير في مشاعر حب عند الشخص بتتعطل بالدماغ منطقة صغيرة تسمى باللوزة يلي هيي مسؤولة عن مشاعر الخوف لهيك منحس بالأمان…🫂

💠فينا نسيطر عالحب ‼️

🔅بشكل كامل أكيد لا لانو بتضل مشاعر وأحاسيس مافينا نتحكم فيها بس أكيد فينا نخفف من مشاعرنا الكبيرة تجاه شخص محدد رح قلكن كيف … فكرو ب صفاتو السلبية والمواقف البشعة يلي مريتو فيها خلال العلاقة (إذا كان بدكن تنسو ) واذا بدكن تعززو الحب يلي عندكن فكرو ب صفاتو الإيجابية والمواقف الحلوة❤️

💠حكينا من ناحية علمية وهلق بدنا نحكي من ناحية عاطفية … الحب تجربة كتير حلوة بس لما تكون مع الشخص الصح اختارو الشخص يلي بيسعدكن ولا تزعلو على الأشخاص يلي خسرتوها لانو اكيد عقولنا عرفت انو هاد مو الشخص الصح❤️🧠

هاد كان موضوعنا اليوم🤍🤍
كل الحب ل قلوبكن🤍🤍
كنت معكن انا محمد حمامة🤍

(سماعة حكيم)