في علامات بتخليكي تتأكدي بنفسك اذا الاباضة عم تصير عندك شهر

في علامات بتخليكي تتأكدي بنفسك اذا الاباضة عم تصير عندك شهريا أو ﻷ …..

👑انتظام الدورة :دليل انو دوراتك اباضية وبالتالي وظيفة المبيض طبيعية والمحور الهرموني بالمجمل طبيعي

👑انك تشوفي دم خفيف بمنتصف الدورة
يعني باليوم 14 اذا دورتك 28 يوم (منبلش عد من أول يوم دورة ) هالدم يعني تمزق الجريب وصارت اباضة

👑تغير مفرزات عنق الرحم بتصير قليلة وبتقل سماكتا بينما قبل الاباضة بتكون كثيفة وسميكة

👑شعورك بألام مغص أثناء الدورة

الدورات اذا كانت قليلة جدا وخفيفة بس مشحات، غالبا بتكون لا اباضية

💡في كيتات جاهزة بتشبه اختبار الحمل المنزلي بتنعمل من اليوم العاشر للدورة بتكون نتيجة التحليل ايجابية اذا طلع خطين يعني الهرمون المسؤول عن الاباضة انفرز بشكل طبيعي والاباضة حتصير قريبا

👩بقية الشغلات بتعملون الدكتورة:
بتبلش بمتابعة نمو الجريبات بدءا من الأيام الأولى للدورة لحتى يوصلو لحجم ينقال عنن نضجو وتتأكد انو عم تتمزق هالجريبات وتطلع البيضة

💉اضافة لاختبارات دموية بتقيس مستويات الهرمونات يلي بتدل انو صارت اباضة أو ﻷ

💡اللا اباضة بتندرج ضمن 🎈تصنيفات🎈 حسب سببها، موضوعة هالتصنيفات من قبل منظمة الصحة العالمية لتساعدنا بتحديد العلاج المناسب حسب السبب :

🎈الأشيع فيهون هو اللا اباضة في سياق المبيض متعدد الكيسات بتشكل حوالي 75% من الحالات

🎈اللا اباضة بسبب فشل الوطاء والغدة النخامية وهدول مراكز بتعطي الأوامر للمبيض على شكل هرمونات بتتحكم بتطور الجريبات بالمبيض

ممكن تتأذى هي المراكز اذا عملتي تمارين عنيفة وريجيم قاسي بحيث ينزل مشعر كتلة الجسم لأقل من 20

وحالات تانية ممكن تكون خلقية أو مكتسبة ومنها بكون مجهول السبب بتعطل هي المراكز وبتأثر عالاباضة

🎈اللااباضة بسبب قصور المبيض الباكر
هون بتكون المراكز العليا(الوطاء والغدة النخامية ) عم تفرز بشكل طبيعي وترسل أوامرها للمبيض يلي بيصير فيه متل شيخوخة مبكرة بتقل جريباتو متل مابصير ب سن الضهي بس بعمر أصغر

وممكن يكون عدد جريباتو بعدو طبيعي بس عم تقاوم الهرمونات وماعم تستجيب للأوامر يلي عم تجي من الغدة النخامية

🎈وفي عنا اللااباضة بسبب فرط برولاكتين الدم يلي حكينا عنو ببوست سابق

حالات ممكن تأثر عالاباضة :::::::
💉تناول مضادات الالتهاب غير الستيروئيدية بفترة الاباضة متل البروفن والديكلون بتوقف انتاج مواد مسؤولة عن تمزق الجريب
💉اصابتك بأي مشكلة بالغدة الدرقية ممكن يأثر عالاباضة
💉التصاقات الحوض لأي سبب متل البطانة الرحمية المهاجرة أو الداء الحوضي الالتهابي هالالتصاقات ممكن تعيق انفجار الجريب وخروج البيضة

💎الخلاصة💎
انتبهي لدورتك اذا منتظمة أو ﻷ واستشيري طبيبك اذا حسيتي بأي مشكلة 😊😊

دمت منطلقا للحياة🎄
د. بتول رضا

(سماعة حكيم)