كيفية التسجيل على مفاضلة البكالوريا في سوريا

🔴تفاصيل المفاضلة || كيفية التسجيل على مفاضلة البكالوريا في سوريا

هي بوست كيف تسجلوا عالمفاضلة بالتفصيل الممل من وقت تطلعوا من البيت لوقت ترجعوا وكيف الموازي والأوراق المطلوبة وشو يعني تسوية وبطريقة حلوة ورائعة….

المهم البوست رح يكون طويل لأنو فيه كل التفاصيل والذي منو ورح تستفادوا كتير….

قبل بيوم من التسجيل عالمفاضلة بتفكر شو هي رغباتك اللي بتسجلها وبتكتبهن عورقة وبتتفق مع رفقاتك تنزلوا تضيعوا سوا قصدي تتلاقوا عباب الجامعة وبتضبط المنبه عالساعة ٧ الصبح وبتنام….
تاني يوم برن المنبه عالساعة ٧ الصبح بتطفيه وبترجع تفيق عالساعة ٩ الصبح بتحط الهوية وصورة عن شهادة البكالوريا (مو الأساسية) وإذا ما معك ياها بالناقص منها وبتاخد معك شي الفين وخمسمية ليرة للاحتياط وبتنطلق للجامعة بتستنى سرفيس ما بتلاقي بتكمل مشي (أكيد ما رح تطلعلي بتكسي)….

بتروح بتشوف رفقاتك ع باب الجامعة وبتاكل كم مسبة منهن ليش متأخر وبتروحوا سوا تشتروا الأوراق المطلوبة…

قبل ما تفوت عالجامعة بكون في شي الف بني ادم واقف وعم يقول مفااضلاااات مفااضلات، بتقلو شو سعرها مع الطوابع بقلك شي الف وخمسمية ليرة بتكسر على أنفك بصلة وبتعطيه الف وخمسمية ليرة مع أنك بتعرف أنو ناصب عليك….
والأدبي نفس الشي مو يضحكوا عليكن ويعطيكن مصنف اخضر ومدري شو لانو كل سنة بصير معهن هيك وهيك صاروا الأوراق كاملين ومافي داعي للصور الشخصية وهيك….

بعد ما تشتري المصنف بكون فيها أوراق الرغبات (كل رغبة في الها رمز أنت مثلا بدك معلوماتية بدمشق بتحط رمز المعلوماتية واللي هي 15 بس بدك معلوماتية بحلب بتحط رمزها وهي 15وهيك بس بتكتب الرموز وبزيادة)
طبعا بمفاضلة هالسنة رح يكون في رموز لمنح الجامعات الخاصة والتحضيري عام وموازي….

المهم بتعبي رغباتك (بحقلك تسجل أقل شي رغبة وأكتر شي 35 رغبة وإذا بدك تسجل منح كليات طبية بصيروا ٤٥ رغبة) وبتروح تصور هويتك (لا تتحمس زيادة وتنسى هويتك عند المصور لاحق عالتسجيل)
وبوجهك عمكان ما بسجلوا للطلاب رغباتهن (غرف الحواسيب)…
بتفوت لجوا وبتقعد جنب الموظف أول شي بتنقلو رقم الاكتتاب ولغة التفاضل بتطلع التفاصيل عندو كلها وانت وقتها بس بتنقلو العنوان ورقم الهاتف….
وبعدين بتصير تنقلو بس رموز الرغبات وهو بحط الرمز وبيطلع شو الفرع المقابل ألو وهييك….
وإذا أدبي بس بتقلو رمز رغبتك وخالص (سبحان مين ريح لو كلكن اختصيتو أدبي كنتوا ريحتوني من هالبوست واختصرتو بهالجملة)

ووقت تخلص بتعطيه صورة هوية وبيعطيك هو نسختين تلصق عليهن الطوابع (ما في داعي قلكن طريقة التلصيق الشهيرة بس قبل ما تمد لسانك سبع متار تطلع حوليك)
بعد ما تلصق عليهن الطوابع بتوقع عليهن وبيختمولك ياهن وبتضل نسخة معك بتفوت عليها عالجامعة ونسختين معهن…

هي باختصار …..
طيب ياضياء أنا بدي سجل موازي (أدبي أو تحضيري) شوفي شي زيادة؟

نفس الطريقة تماما بس قبل ما تنزل عالجامعة بتروح عشي مصرف تجاري وبتدفع 25 الف طبعا اذا ما طلعلك تحضيري برجعولك ياهن واذا طلعلك بيخصموه من سعر الموازي….

طيب سؤال تاني ياضياء اذا سجلنا ٣٥ رغبة عامة وما طلعلنا شي شوفينا نعمل؟

هون بحقلكن تعملوا تسوية اللي هي عبارة أنو وقت تطلع المفاضلة التانية وما يكون طالعلكن شي بتشوفوا شو بيطلعلكن الرغبة عالمفاضلة التانية وبتسجلوها مباشر متل الأدبي يعني بس عالمفاضلة التانية، وهالحكي حصرا لازم تكون مسجل ٣٥ رغبة عالعام….

سؤال تالت يا مسيو أنا الموازي ومنح الجامعات الخاصة بس للكليات الطبية والتحضيري؟

أي بس للكليات الطبية والتحضيري، أما الموازي لباقي الكليات بتطلع بعد المفاضلة التانية باخر العاشر، ومنح الجامعات الخاصة باقي الكليات بتطلع بالشهر ١٢ تقريبا….

سؤال تاني مفاضلة ذوي الشهداء شو بدهن ؟
نفس الأوراق المطلوبة فوق بس في زيادة وثيقة استشهادة من مكتب شؤون الشهداء

سؤال نسيت الرقم المهم ضياء أيمت وقت التسجيل؟
من 12/9حتى 30/9
ما حدا يتهضمن ويقلي ٩ الشهر تلاتين؟

سؤال نسيت الرقم +١ إذا رسبت بالاختبار شو بصير؟
ما بصير شي بكون ما الك مي تشربهن بهالفرع بتروح تسجل شو بيطلعلك بالفرع (إذا كان بيطلعلك يعنيي)

إن شاء الله تكونوا استفدتوا منيح🥺💓 وإذا ما استفدتوا بتكون انتهت حلول البوستات الأمر متروك لرفيقك طالب الجامعة ينزل معك

وأي استفسار أنا جاهز وإذا بدكن تسروقوا البوست اسرقوا معو المصدر لأنو صايرة وصايرة
ضياء ناصيف
Deaa Naseef