ليش بس بتجيب بنات أو بس صبيان⁉️
اليوم الميددوز رح يحققلكن أحلامكن ويعطيكن الطرق المفيدة لتحددوا جنس البيبي يلي بدكن ياه 💜
رح نبلش بالصبي مشان يلي حماتا بدا صبي :
🙋♂️️بتشربي فنجان قهوة أو كاسة شاي قبل الجماع.
🙋♂️️لا تنسي تفطري ، الفطور بخلي احتمال انك تجيبي صبي أكبر .
🙋♂️️روحي وتعي وكلي موز ، الموز بجيب الصبيان .
🙋♂️️واخر شي بعد الجماع بتنامي على اليمييين ،
اذا بتتقلبي وانتي نايمة خلي جوزك يربطك بهي الوضعية .
أما يلي بتحب البنات :
💃️عليكي بعصير الفواكه البنات بيحبوا الفواكه .
💃️اوعى تاكلي مكسرااات واذا جابتلك حماتك مكسرات اعرفي بدها صبي .
💃️تسلي بالبوشار كلي بوشار قد مافيكي .
💃واخر شي وقت الجماع يكون صباحا فقط .
للأســف :
🔴لحد هون اذا منوقف البوست رح نشوف الshare للركب وهي يلي عم تخبر جارتا وهي يلي عم تقول لرفيقتا .
🔴للأسف الشديد الكلام يلي فوق كلام من مصادر عربية وأجنبية عن طريقة تحديد جنس الجنين المرغوب ، لكن هي المصادر
و لا أي واحد منها مصدر طبي موثوق أو ولا منظمة صحية ، كلها مواقع مالا علاقة بالطب وحتى لو قالوا انها دراسات ف هيي غييير مثبتة.
وأي حدا خارج المجال الطبي وبيقرأ هي المعلومات مارح تدخل لعقله !!
انه المكسرات ممنوعة اذا بدك تجيبي بنت!!
طيب النطفة كيف عرفتك اذا أكلتي مكسرات أو لأ لتقلب صيغتا؟!!!
⛔⛔منجي للطب والعلم والمنطق
🔴مين المسؤول عن تحديد جنس الجنين؟؟؟
بويضة من الأنثى صيغتا داااايما x ونطفة من الرجل صيغتا إما x أو y
X يعني انثى
Y يعني ذكر
⬅️يعني نطفة تحمل x مع بويضة تحمل x بتطلع بيضة ملقحة صيغتا xx ويلي هيي أنثى.
⬅️نطفة تحمل y مع بويضة تحمل x بتطلع بيضة ملقحة صيغتا xy ويلي هيي ذكر .
⬅️وبالتالي منستنج انه المسؤول عن تحديد الجنس هوي الرجل .
واذا اكلتي من هلأ لتولدي بوشار مارح تجي بنت إذا كانت صيغة النطفة الملقحة y .
⛔طيب العلم عاجز يخلينا نحقق هالرغبة بتحديد الجنس؟؟
لاا طبعا مو عاجز ، والطريقة العلمية القادرة على تحقيق هالشي هيي الحقن ضمن الزجاج IVF ،
منجيب نطاف من الرجل وبويضات من الأنثى وبطرق دقيييقة وتقنيات مجهرية حديثة بيتم الإلقاح بأنبوب زجاجي وبس تتشكل الembryos بمراحلا الأولى بياخدوا من كل وحدة منهن ٣ ل ٦ خلايا وبفحوص واختبارات جينية دقيقة بينتقوا الجنس على هالأساس وبيعيدوا زرع المضغة ذات الجنس المرغوب برحم المرأة .
⛔هني أبدا مو مضطرين يتعذبوا ويعملوا هالأبحاث ويتعلموا هالتقنيات إذا كانت خلطة أم تحسين تبع البيض والطحين بتحدد جنس المولود بهي البساطة .
🔴طيب ليش في زلمة ولاده كلن صبيان ؟ وواحد ولاده كلن بنات؟
بتقول الدراسات أنه الرجال ٣ أنماط من حيث صبغيات النطاف يعني :
رجل عنده نسبة النطاف y أكبر من نسبة النطاف x
رجل عنده نسبة النطاف x أكبر من نسبة النطاف y
رجل عنده النسبتين متساويتين تقريبا .
وبالتالي مثلا الصنف الأول ممكن يجيب أنثى x بعد عشرين صبي y واكيد مافي حدا بيضل بجيب عدد هائل لتطلع البنت لهيك منقول ذريته صبيان بس .
وهي الصفة الجينية قالت الدراسات انه ممكن يرثا الابن ، يعني إذا الأب كل ولاده صبيان ، احتمال كبير انه ابنه الصبي يجيب صبيان متله.
❤ياريت نوعى ونوعي يلي حوالينا حتى مايجي حدا يضحك عليهن ويستغل مصاريهن وعواطفن لهيك غايات ، ويلي رح تقلي جربت طريقة أم تحسين وغيرا ونجحت …
ف هي أكيد صدفة اسما مجرد صدفة وليس أكثر …
❤وبشوف انه الرغبة بإنجاب جنس معين هيي شي خاطئ وغير منطقي ،
لانه البنت انتو بحاجة جمالا وحنيتا ورقتا ، والصبي انتو بحاجة دعمه وسنده وقوته .
وهي إرادة ربانية انك تجيب بنات بس مثلاً ، يمكن لو يجي صبي يطلع عينك ، والعكس صحيح❤.
◼د. علياء حرب
◼المصدر : newhopefertility / sciencedaily
(ميددوز)